Covid-19 leh Zomi te khamuanna ~ Neng Za Khup

Covid-19 leh Zomi te khamuanna ~ Neng Za Khup

Zomi te Shalom! Leitung mun khempeuh a om ka it ka Zomipih te aw, ka omna Shillong, India pan in itna, phawkna leh a dah-akapte thuahpihna khut tawh ka innkuan na khut uh kong len masa uh hi. Tulaitak a I tuah buaina leh haksatna pen ei Zomite bek in I tuak hilo cih I thei ciat hi. A zawng, a hau, a pil a siam, a hat leh hat lo, mivom mikang, sak mi khang mi cih a khen hiau lo, mihing mit tawh I muh theih loh mihing khempeuh, leitung a om khempeuh in I tuak leh I thuak a hi hi.

Tua ahih man in kamsia tuam kisak khak, thuak diak kisak khak ding hilo hi. Mihing I hih man in I lungkham mahmah ciang leh I lungdam mahmah ciang in I nu-ipa, I u I nau, I beh I phung, I khua I tui leh I lawm I gualte kingai phadiak ahihman in ka it ka Zomi pih migam mi lei a hih hun haksa a tuak leh a thuak, it leh ngaihte tawh Van gam a kimu kik bek ding a kikhenna a tuakte a ding in haka diak kha ding hi. Ahihhang in I Pasian, Emmanuel eite tawh hong omkhawm pa in ong taisan tuan lo in, I mit tawh I muh theih loh hang in I kiang nai ah hong om pih den hi cih phawk ni.

Ei bek a thuak hi kei hang Tuhun a I tuak natna pen leitung buppi in a thuak hi. Gam hausa leh gam zawng khen lo hi. Mizawng mihau zong khen tuan lo hi. Mipil mihai cih zong khen tuan se lo hi. A hatte leh a zawngkhalte zong deidan lo hi. Tua ahih man in ei Zomite a kamsia diak, a thuak diak bang in kingaihsun kei ni. Koi mun koi gam ah om tase leng tutung a natna pen I tuak ciat ding a hi hi.

I lawhcin ciang mi sang a lawhcing zaw kisak khak baih mahmah a, I kamsiat ciang zong misang a kamsia zaw a kikoih khak baih lam mahmah hi. Tua bang hikhin lo hi cih I phawk ding deih huai sa mahmah ing. I la khat in, “Lung-gimna, dahna na tuah leh, Nang sang siangzaw Pa’n zong thuak khin” na ci hi. Ih Topa Jesu mahmah in zong haksatna kamin a gen theih loh ding na thuak khin hi. Aman hong thuakpih hi.

Ei hong nusia ngei lo khat om hi. Sinkham-lungkhamna, dahna kahna I tuak ciang in I lawm I gual leh midang khempeuh in ong nusia in ei bek a om bang in kingaihsut baih mahmah hi. Ei Zomi Khristiante bel tua bang I hi kei hi.Adiak in, tulaitak a Zomi gamthumna leh mun dang dang a omte’n na khua na na tui uh, na inn na lo ciat uh ngai mahmah d ing hi uteh.

Pasian in, “Nang hong nusia ngeingei lo ding ing a, zong hong taisan ngeingei lo ding hi’ng” ci hi. (Heb.13:5). Sun leh zan a lusu vet lo, hong cing den khat I nei hi (Late 121:4). Emmanuel Pasian eite I omna khempeuh ah tu mahmah in I kiang ah a, I dah I kah, I khituite mu in, ong ddah pih, ong thuak pih, ong kahpih hi. Khamuan huai mah si e!

Eite lametna neite I hi hi. Ei Khristiante a koi-a koi ah om in, bangbang tuakta leng midangte’n ong theih pih loh a nungta leh a manpha mahmah “lametna” a neite I hi hi (Tita 2:13). SAwltak Paul in, Thessalonika Pawlpite kiang ah , “Sangamte aw, midang lametna a nei lote bang in om kei un..” ci-in ih Topa ong paikikna ding thu tawh khamuanna thu na gen hi (!Thess.4:11f). A taktak in, tua bang lametna nei lo hile hang Khristian I hihna pen a mawkna suak ding hi. Tua ahihman in, ka Zomi pih Khristian leitung mun tuamtuam a omte kiang aha nungta lametna a nei te I hih man in hih thu in I omna mun ciat ah kikhamuan lehang a hampha I hi ding hi.

Eite hong it mahmah lawm muanhuai khat I nei hi. I La khat in, “I mawhna leh I dahnateng, A pua ding Zeisu I Lawm…Na khempeuhte Pasian kiang ah thumin I kohl oh hang hi” na ci hi. I lungkhamna I mangbatnate Pasian kiangah I kohl oh hang hikha thei. Hong it mahmah I lawm muanhuai Zeisu kiang ah I lungkhamna khempeuh puak in ap ni. Tua Zeisu I lawm pe’n a nuam bek ah I lawm hiklo in, “Dahteng thuakpih nuam Zeisu bang, Lawm man dang mu zo ding maw” ci in I la a dawng nihna ah I sa hi. Tua ahihman in I lungkhamna leh dahna te Zeisu kiang ah ko ni aw. Hampha mahmah hi hang. HIh I hamphatna mangngilh kei ni.

Pasian I kiang ah om den a hih man in ka it ka Zomi pihte aw, a diak in gam nihna leh gam thumna hih haksatna a thuak leh a tuakte khempeuh – Topa I bukna suangpi, I lungkham I mangbat lai a zong I kiang a om a hong huh ding a mansa a om tawntumg pa phawk in, I Pasian La khat in a gen mah bang in Na khempeuhte Jesu kinag ah thum in ko khial kei ni. I mawhna leh I dahnate a pua ding Jesu I lawm… Ka lung khamna khempeuh Jesu kiang gen ning, Keitung ah bangbang hjong tung zong Jesu’n a pha bawl ka thei..cih late sa in tua thute in kikhamuan ciatni.

Lungkhamna van gik bang lel in, Zawngkhal in, na tha nem maw; Manpha Honpa I belh hi in, Ama kiang thu ngen in aw; Mi’n hong sim mawh hong huat ciang in, Zeisu kiang I pai ding hi; A angsung hong pom hongs al ding, Lung nopna hongpia ding hi”.  Shalom – Akicing Khamuanna ka it ka Zomi pihte khempeuh tung ah hong tungta hen! (S. Nengzakhup leh innkuante, Shillong – June 29, 2020)