Zomi A’ding Ka Deihsakna

Zomi A’ding Ka Deihsakna

Ka Muh Daan (My Prophetic Message for Zomi)

Gamdang tung ih sanggam teng mah in Zogam Zomi vei in, lai a gelhgelh uh, thu hong sunsun teng hang mah un, hih ciang a tung hi hang. Lai pheng gelhgelh cih huai lo hi. Lai pheng gelh kuamah om lo uh hi.

Gam sung lamah ZCD Pu Cin Sian Thang te pawl in biakna makai sem kawmin gam thu meekuang lui se loin piangthak mahmah Christian khat ahihna uh tawh gam ading mapangin a sepna uh etteh huai hi. To nih nasem khawm lo ding cihna hi. Galkap bu khat in kumpi na a sep kawmin Lungdamna thu tetti pang thei uh a, gen thei uh hi. Kumpi nasep kawmin Pasian’ na kisem thei hi. Ahi zongin Pasian nasem tuucing Pastor, Evangelists, Missionaries te in kumpi nasep tawh sem khawm, thuah khawm thei lo uh hi. Tua mah bangin Pasian’ nasemte in naingngaanzi le Lungdamna thugen thuah khawm thei lo ding uh hi. Naingngaanzi le Christian Upna thu hong khen loin hong gawm gawp manun C le Z in i Up Pa’ thu Naingngaanzi dinmun ah a tun ih hi hi. Tuucingte, Pasian’ thugente in Lungdamna thu pen naingngaanzi ahi minam kideidanna thu tawh gen loin Singlamteh laitat itna thu tawh hong gen peuh uh leh, Pawlpi mite sung panin gammakai, gam uk hoih nono hong piang khia ding hi zaw hi.

Gam thu hi ta leh biakna thu hi ta leh, kipawl khopna, sepkhopna, Mite’ theihpih thupit sak luatna hangin kibatna teng gawm khawm in kibatlohnate puaseh ding, hemkhia ding, gen lo ding cih thuhilhna pen a maan lo ahihna tu-in hong kimu ta hi. Khatna ah, C tawh ih kibatlohna tak mah Z tawh dinpih hi hang. Nihna ah, biakna dangte tawh ih kibatlohna, ih tumdanna ahi tua Jesuh’ le a Singlamte Thawhkikna le Upna Bek thu pen Kawl kumpi te le Buddhist te lakah hangsan takin a kigen, a kigelh ngam loh manin Pasian in zong nalian nalamdang ong sem lo ahihna kimu thei hi.

Zo, Zo le Mi, Tedim, Sihzaang, ZCD, GZA, WZA cihte tu tadih koih phot in, Zomi ci a, census ah ih gelh photphot ding le, a dang thu buainate den ciang damdamin phisian kik zaw ding hi hang.

Zomi te adingin thukham (10) sung pan, Zomi te in hih kum zalom 21 sungah ih kidop pen ding le ih kipuahphat pen dingin a kisam mun in thukham (3)na ahi hi, “Topa note’ Pasian’ min a sia lamin na zang kei ding uh hi. Banghang hiam cih leh Topa in ama min a zang khialte gim pia ding hi.” Zomi te in Topa ih Pasian’ min ciamnuihna in zangin kizangkhai bawl lua ka sa hi. Popular slogan “Pasian kitai san thei a, Minam kitai san thei lo hi”. Minam kitai san thei lo hi cih pen hoih mahmah a, Pasian kitai san thei hi cih pen a kul lo, a kisam lo thu ahi hi. Topa’ min a sia lamin zatkhialhna hi ta hi. Na zi kima thei a, Minam kima thei lo hi, cih khawng hi leh phadawm zaw lai ding hi ven. Pasian’ min lawh baih sak mahmah ve hang aw.

Pastor khat thungetsak dingin inn khat ah pai a, a kongkhak kisungkalh hi. Pastor pa in Mangmuhna 3: 20na mun laidal no khat tawh kong khak ah nusia a, innteek nu in tua lai a muh ciangin Piancil 3: 10na mun gelh kik in Pastor pa khak kik hi cih bangdaan ciamnuihna, an pho in, ni taang zel, guah zu zel ahih manin anpho pa in, na Pata un na hih cih manun hong kithat ai ve. Jesuh zong ong pai masakin tuahsia gawp a, ong pai kik ngam nawn kenteh ci a, Pasian’ min zangkhai bawlin Minam sungah ciamnuihna le zulhzauna om mahmah ta mawk ahih manin, kidawm pha mahmahin kipuahpha ni. suangdalZomi aw, Pasian’ min a kiciamnuih bawlna, a kizaangkhai bawlna thu ah nui kei in. Kihem khia in. Christian kipawlna liante in zong laibu, Magazine khawng ih bawl ciangin hih bang zia ciamnuihnate guan huai lo a, hih bang ciamnuinui mite Christian min tawh nasepna le khawmpite ah kihel sak huai lo ding hi ci-in prophetic message kong gelh khia hi.

Minam ih thupitsak nop leh Pasian masak ding hi hang. Minam thupi sak nuam lua in Pasian kinusia thei ih cih mawk leh, tua thu pen a hi ding a bat hangin Pasian’ min a kisam lopi a, va guan pheina, va zaangkhai bawlna, va pheng bawlna hi a, ih Minam bup in tua bang ciamnuih gu ih thuak loh nading kidop huai, kipuahphat huai mahmah hi. Ciamnui lel in la ih Topa Pasian min zang se dah lel heuh in. Lai Siangtho sungah Topa Jesuh ciamnuihna le nuihna kimu lo hi. Jn 11: 35 ‘Jesus wept…Jesuh a kap hi’. Thukham sawm lakah thumna sim pha in kipuahpha ciat ni. Paikhiatna 20: 7. You shall not take the name of the LORD your God in vain, for the Lord will not hold him guiltless who takes his name in vain.

Evan. Suang Dal