Alungdam huai thuumna ~ Peter Suumpi
Akiteen khit uh hang in akingaih lai bang in alawmpa tung ah anuak lai veve hi… Nikhat meltheih te tawh ki muhna neiding in inn pan anih un ading khia khawm uh hi. Inn pan hong pusuak tuung in bel ahioh. Lampi pan alawmnu ahih leh angei bangin nuak hong kipan ta hi. Apasal pen om hithiat in akam tawm mi ahihi. Ahihang tu aa ahihleh apasal zong lungduai zolo hi. Alawmnu lampi laizang ah nusia in inn ah aciah kik hi.
Khat vei zong ama tung aa aheh ngeilo alawmpa tuni in hibang aa ataisan ciang in khasia lua in lampi laizang ah amah guak khitui luangsa in adin khawl hi. Ahihang numei te ngeina bangin nuak ding cihpen akip let bikbek hi.
Zan 11pm ciang in inn hong ciah kik hi. Inn atun ciang khua zing diipdeep hi. Amah ihmu khin aitam? … aih keh avakna pan hong tung nailo ahitam? Bell tumselo in atawh la in inn ahon sawm leh kongkhak tung ah lai khat ana kisuang amu hi.
“Nong thum kei leh kilawmlo ding hi” cih lai akigelh amuh ciang aheh hong suak mahmah hi.
Inn sung ah lutin meihong, kong akhak leh kongkhak sung lam ah zong lai khat mu leuleu hi. “Nong thum kik nop kei leh ka but siangtak in nataih sak peuh lecin ngah lel e” cih lai akigelh amuh ciang ahehsuak lua kisa “Bang hang taih zenzen ding ka” ci in alungsim tawh apua hi.
Akhedap suah in khedap tau ah akoih leh lai khat amu leuleu hi. “Bang nuam mawh aa taih ding” cih akigelh lai amuh ciang anuih hong za kik vat hi. Alungsim sung ah “thum kik ding ee … hi hi hi kalkhat sung khawng hong kinuak ziau ding ai … nang bang kisa” ci in alungsim sung ah aci hi.
Khutsil maiphiat ding ci in siangthona khan apai leh man tung ah lai na kibelh hi. “Hong bang ci thum ding cih natheih kei leh laibu tau tung aa laibu kawm ah om” cih lai amu hi.
Amah zong thei nuam lua in laibu tau lam ah atai phei pah hi. Laibu tawh akitep lai dal khat amu hi. “Anung aa laigual nih aging khia in sim in” ci in kigelh hi. Amah zong alai dal ii nunglam a en hi. TV sung aa kilak advertisement khat aa kammal khat amu hi. “Kha sim numei te lungham hun aom pen numei te ngeina hi.”
Tua advertisement laisim in anuih aza hi. Sun thapai aa alungkim lohna teng, kal khat sung khawng hong nuak ning acih angaihsutna te zong hong bei hi.
Akhut akhe silin lumding in hong kitawi hi. Alang lam ngat in a ihmu alawmpa them zong a hem et kha kei hi. A ihmut ma aa laisim azong satna hangin asimsa laibu sim zom ding in hong kithawi hi. Laibu kawmpan laidal khat hong kia hi.
“Nang zong nalungnop lohding hong thei mah ing. Kei zong kingaih sutphat huai mah ing. Ka mawhna nong zon laitak ih gal ah kalawmte ka gal muh lian hi. Kei zilel ci aa hong ciamnuih nading uh lampi azon laitak uh ahihciang aa. Ei akinial hipeuh mahlo hi hang. Pasal hisam hiveng… inn ah kazi bangzah in ka ngai aa ka kihtak phialzong apua lam aa mite mai ah maipha ngah nuam hi veng. Zite in ih thu hong manding cihpen pasal khempeuh ilung gulh tek hi ven.”
Tua lai asimkhit ciang akhialh lam akiphawk kik hi. Amah aval lam akiphawk kik hi. Alungnuam lolua in alanglam anga apasal ama lamah ahei phei leh amai ah laikhat anakibelh amu hi. Tua lai tung ah “Hong nam in” ci … 🙂 Peter Suumpi (iBook.idv.tw)
Comment piaknop aomleh...