Japan gamah Phone panin dailenbuk a awng zontheihna Service ki panding

Japan gamah Phone panin dailenbuk a awng zontheihna Service ki panding

Japan gampen hun ahawmthawh phadiak, nasep ahanciam phadiak in akigen gamminthang khat ahihi. Bangzah in hun pamaihsa uhhiam cihleh dailensuak khatin dailenbuk (Restroom) a awng aomhiam ci’n azonkawikawi pen hun pamaihsa uhhi.

Tuabang in ekbuk zonkawikawi akulloding, koimun ah ekbuk a awng, akizanglo bangzah om cih theihcian nading Service pen March khasung in kipan tading uh cin Japan Times pan kiza hi. Japan gamsungah Telecommunications Operrator khat ahi KDDI te’n tua Service pen mawhpuak lading uh a, koimun koiteng ah dailengbuk kizangthei cihpen Smartphone leh Computer panin ettheih ziauziau dingin bawlding uhhi.

Tuabang in ekbuk a awng theihciantheih nadingin ekbuksung ah Sensor koihding uh a, tuapan in Data Transmit khiasak in Real-time in bangzah kizang, bangzah awng cihpen kitheiding cihi.

Toilet koiah a awng om cihbang, ahih keileh asungah aomkhak apualampan ngak cihbang in mite’n hun mawkbeisaklua uh ahih manin, tuabangin hun amawk beinawnloh nadingin hih Service pen akibawl hi ci’n KDDI Spokesman Daisuke Maruo in genkhia hi.

Tuaban ah Toilet khatpen sauvei kizanglua, asungah mikhatpeuh sauvei omlua cihbang ahihleh Facility Administrator te kiangah Notice lutding a, asungah mi khatpeuh Accident in omhiam cih ki kantheiding cilai hi. Pawlkhat dailen laitak in lung amcip in atukkhawng omthei a, tuabangdan Accident aomkhakleh ahunlap in atheihsawm uh ahihi.

More: Leitungbup Ekbuk Kipawlna “World Toilet Organization”

Hih Toilet Service pen amasapen in Office Buildings te ah kithuah masading a, tuakhit ciangin Sport Stadiums, Train Stations, Shopping Malls cihte ah abanban in kithuahding cihi. Mawtaw Parking Lots bangzah awnglai cih Service tawh kibangding a, mipi adingin hunbei phatuam mahmah khading hi. ZD Sawltak #zomidaily