Tuzawh kum 50 sung Zomite Khapi or Space tung i kahzo diam?

Tuzawh kum 50 sung Zomite Khapi or Space tung i kahzo diam?

Nung July 23, 2019 pen USA te’ Apollo 11 Spaceflight tawh Khapi (Moon) tung atun zawh uh kum 50 cin na hi ta aa, pawi leh thu kikupna pen ka nasepna ah nopci takin kibawl in, tualai ah ko Department ah agol pen Secretary of Commerce- Mr. Wilbur Ross, Director of USPTO -Mr. Andrei Iancu, NASA Administer- Jim Bridenstine, NASA Astronaut Paul Richards, American Numei lak pan Space tung akah masa pen NASA Astronaut Kathryn Sullivan te leh Ulian tampi hong kihel uh aa, thu genna, thu kikupna te nopci takin nei uh hi.

US Federal Kumpi khut nuai aaom Tu laitak nasepna department ahi USPTO – Department of Commerce leh NASA te pen Khapi tung leh Space tung tun theih nading na tampi semkhawm uh aa, tutung kikupna te ah tua teng mah pualaak khia uh in, thupi thei mahmah hi. Tua lai ah Kawlgam mi lak pan kei zong va kihel kha thei ing.Tua lai tak ka ngaihsut na sungah ka phawk khat thu in ei Zomite sung pan zong tu zawh kum 50 sung Space tung i kah/tung zo diam cih ahi hi.

USA gam om Zomi khangthak te sung pan Scientists/Engineers tampi kiom hen la, US Kumpi NASA khawngah nasep ngah in, tua Zomi Scientists/Engineers te lak pan in Astronauts pawlkhat om zo leng Khapi tung leh Space tung tun zawh nang lampi hong hi dingaa lunggulh huai mahmah kasa hi.

NASA Astronaut suah theih nang bang teng kisam?

Amasa in NASA ah nasep ngah ding mah hong kisam masa pen ding aa, NASA pen US Federal Kumpi Department 15 te lak ah akihel lian loh hangin, US Federal Kumpi ii “Independent Agency” khat hi aa, US Kumpi pa (President) in Administrator khat koih in direct in len hi. US Federal kumpi nasep te dan mah in NASA ah zong nasep ngah theih nang pen hamsa mahmah in competitive mahmah hi. US Federal kumpi sung nasep ngah zawh nading akisam te: https://www.facebook.com/thomas.mung.1/posts/10160431683630078 ah kisim thei hi.

NASA Astronaut suah theih nang akisam (Qualifications) teng:

1) Engineering, Science (e.g. Physics, Biology), Mathematics khat peuh peuh tawh Bachelor degree khat neih kul hi.

2) NASA ah nasep ngah phot in Scientist/Engineer khat suah phot ding kisam hi.

3) Astronaut tawh kisai professional experience kum 3 sung neih kul hi.

4) NASA’s astronaut physical examination awn (pass) kul hi. Gentehna – mit tha hat kul aa, I tun zong san kul hi. Tua bek thamlo in thuak manglang zong kul hi.

5) Vanleng hawl hun (pilot-in-command time on jet aircraft ) atawm pen nai 1000 neih kul hi.

6) Astronaut tawh kisai Training tuamtuam kum tampi sin kul lai hi.

NASA Astronaut khat suah zawh nading kum tampi mah asin khit zawh ciang in NASA te vaihawmna tawh International Space Station ah kah to in nasem uh hi. Astronauts te pen Space tung akah kei uh leh atam zaw Training kah uh aa, NASA ii mission tuamtuam te ah huh in sem uh hi. NASA te in kum 2030 ciangin MARS tungah Astronauts te va khah sawm uh hi.

USA tung Zomi te lak pan pilna siamna nei mipil tampi kiom ta aa, US kumpi sung leh Company minthang tampi te leh mun tuamtuam ah na sem kiom ta hi. Zomi khangthak te lak pan Scientist/Engineer lam kiom to to in US Federal Kumpi sung nasem i om toh toh ding kilunggulh aa, Khapi tung, Space tung ciang akah zo Zomite i hih nang Topan thupha hong pia ta hen. Thomas On S. Mung ( Thomas Mung Guite) Washington D.C September 10, 2019