Laimal ‘Z’ ih thupha naak hi ~ Zomi Quavadis

Laimal ‘Z’ ih thupha naak hi ~ Zomi Quavadis

Laimal ‘Z’ pen kei ading manpha diak se hi. Bang hang hiam cileh ‘Z’ om kei leh ka khualui Zampi leh ka pianna khua Zozaang kigelh thei lo dinga, ut lopipi in min dang vawh a kul ding cihna hi mawk hi. Tua banah ka minam Zomi zong ‘Z’ om kei leh laimal dang tawh gelh hong kul ding ahihmanin ‘Zomi’ hi ingh a kici thei lo ding ka hi ta zen hi. Laimal ‘Z’ pen laimal bawlte’n kei hong khualna tawh hong tuam bawl sak ngiat uh hi ding hiam ka cih khak hun tam liang hi. Pasian in zong laimal ‘Z’ a deih ngiat dinga pasal in hong bawl hi a ci nuam liang ka hihi.

Laimal ‘Z’ om kei leh Zomi pen ‘J’ aw tawh ih gelh hong kul ding a, ‘Z’ awsuah tawh Zomi hi lo in ‘J’ awsuah tawh Jomi/ Jhoumi cia ih kisap hong kul ding hi. ‘J’ tawh Pasian thukim lo hi. Jomi/Jhoumi dingin Pasian hong bawl lo hi. ‘Z’ – Zomi ngiat dinga Pasian hong bawl ih hihmanin laimal bawl mipilte lungsim sungah laimal ‘Z’ bawl ding thusuak Pasian in a om sak ahihi. Tua hikeileh ‘J’ tawh lungkim ziau kha mai lel ding uh hi.

Pasian geelna leh a sepzia pen lamdang lua hi. Mihingte lungsim tawh tel zawh ding hi lo hi. Leitungah Pasian in Zomi te hong bawl ahihmanin laimal ‘Z’ zong a om hi pah hi. Hih thu hangin Zomi cih pen Pasian thukimpihna om hi cih kilangh mahmah ka sa hi. Tua ahihmanin Zomi pipi Chin ih kicih teitei leh Pasian a langhpan ih suak ding hi. Zomi leh laimal ‘Z’ pen a kikhen thei lo, ih suahpih laiguizom khat hi cih mangngilh kei ni.

Laimal ‘Z’ pen laimal om teng lakah a tawpna a hihi. Siang gen lehang laimal dang tawh minam min a kigelh thei teng khempeuh pen khangto mang khin uh a, ei Zomi te pen a khua phawk nai lo teng ih hihi. Himahleh Laisiangtho in “A nawnungte hong masa dinga, a masate hong nawnung kik ding hi” na ci hi. Laisiangtho sung thu khempeuh a piang lo om lo hi.

Tua ahihmanin tulaitak a khangto lo pen minam ih hih hangin lungneu pah kei ni. Pasian in ih minam Party ahi ZCD tungtawn in ih khantohna ding lampi ong honsak ta hi. Ih maia minam khangto masa teng a makhelh dingin a kithawithawi ih hi ta hi. ZCD pen laimal ‘Z’ mah tawh a kipan ahihi. Laimal ‘Z’ pen Pasian in ei Zomi te ading ngiat thupha a piak ahihi.

Hun beisa te enkik lehang Malaysia ah ZAM tungtawn in Pasian in Zomi te gualtung hong tuang sak a, USA ah zong ZIUSA tungtawn mah in UNO ah dinmun sangpi hong ngah zo sak hi. Zogam ah ZYA hangin khantohna leh phattuamna tampi ih ngah hi.

Tua banah ZOLUS Magazine zong Zomi te Magazine bawl khempeuh lakah a kikhawng pen hi in, Zomidaily zong Zomi te neihsa website teng lakah a kilim lutna penpen ahihi. Hih ih gensuk zanghzangh teng pen laimal ‘Z’ vive tawh a kipan ahihi. Zomi te leh laimal ‘Z’ pen a tonkhawm den ahihlam mangngilh kei ni. Jehoah ‘Z’ire….. Zomi Quavadis