Zogam Khuahun Pawlkhat (April 18, 2015 Updates)

Zogam Khuahun Pawlkhat (April 18, 2015 Updates)

Dear All,

Tutungin ih Zogam Tedim, Tonzang, Cikha leh Haiciin khua dong ka va
phakna sungah kihop sawn nop tawmlai om a, phawkbat teng hih a nuai a
bangin kong gelh hi.

1. Zogam Lampite kikeek beh:-

Ih Zogam khuata khat-le-khat kikawmna motor lampite kilimsial pha
mahmah a, lungdamhuai kasa hi. Tedim leh Tonzang kikal pen lampi
kikeek beh a, pi 24′ a zai-in kikeek a, nopci mahmah ta hi. Tuaban ah
Tonzang leh Cikha gamsung teng pen pi 18′ a zai-in keek beh uh hi.

Tulaitak Singgial taaang pan Zampi, Tuimang dung pan Haiciin dong
limphatakin kisial hi. Hih lampi tawhna ah Rhema Foundation in JCB
honkhat tawh nasem uh hi. Nidang a laipi om ngei nai lo, Mauvom leh
Vaivet kikal zong motor lampi pi 18′ zai mahin Lotdaw Hau Khen
Kham'(Chin Pyine Hlotdaw ohkathah) ii deihsakna tawh kito khin ahi hi.

2. Kawlgam Kumpi laivuanna kitel ta:-

Tukum a beisa laisin kum ahi, 2014-2015 pen tan 4 leh tan 8 pen kumpi
laivuan ci-in kineisak kik a, April 17, 2015 ni-in laivuanna kitel ta
hi. A munmun ah laikia tam pha mahmah a, a ong tawmzaw pek tham ci-in
kigen ciat hi. Kumpi laivuan ahih zah khat in hamsa sak diak hih tuak
hi. Tua lote nangawn a kia zong nidang bang lo-in om zeuh zeuh thei
zel ahi hi.

Hih laikiate pen hehpihna tawh May 12, 2015 ni a kipan Exam kiksak
ding cih thu kiza a, mitampite boarding ah om tawh a pua pan a tuition
pai tawh kisa ngeingai keei ahi hi. Tua hi kei leh 1/3 pawlpawl bang
bek in lai ong uh hih tuak hi. Bawda omte nangawn tampi kia tek uh hih
tuak hi.

3. Taingen Thungetna Thalawp-huai:-

Tuma lampek a a kigen gen ahi, Taingen khuakhung galmual ah Thungetna
innpi leh room neuneu te kibawl a, kizo siang dek ta hi. Thungetna
innsung room neuneu te ah mi tamsim thunget theihna dingin bawl uh a,
combine service bawl nading hallpi a lam laitak uh ahi hi. Tui zat
ding zong om khin a, innnung lam vai kisam ding te zong zo khin uh hi.

Amun lah nopci-in thangah huai mahmah hi. Kawlzang nangawn panin
thungen a pai, a kileh tawh a giak tawh mi om thei zel hi, cih inn
cingpa, Pa Thian Thang in hong gen hi. Tuatak ah sum-le-pai tawh mapan
khop theihna dingin kong gei mun nih ah bung kikoih hi.

Hih mun leh hih bang nasepna hong phuangkhiate nakpitakin thupi kasa
hi. Tua hi kei leh i lawm te’n a inn zum zehzah te khawng uh hong
tungkha pelmawh dingin upmawh huai ahi hi. A mun in pia ngiat ahi hi.
A phual dong ah motor tungsak uh hi.

4. ZIS min tawh Panpihna maban:-

Zomi Innkuan Singapore (ZIS) te in Pasian’ nasemte innkuan panpihna a
piakkhiat uh pen tutungin zong a maban uh hong zom toto thei uh a,
Kawl gamsungah Zomi Pasian’ nasem innkuan 30 te pen Inn khat ah
Ks.70,000/- ciat tawh panpihna hawmkhia kik ta uh hi.

5. Sim Card deihbangin kilei thei:-

Ih gam khantohna tawh kizui-in Sim Card pen deih bangin saite ah kilei
thei ta hi. Hunkhat lai hmatpongtin lah kul a, tu’n tuabang kulsak
nawn lo uh hi. GSM 25/6….tawh kipante Ks.2,000/- tawh kizuak a,
Telenor te Ks.1,500/- leh mun pawlkhatte ah Ks.2,500/- tawh kilei thei
hi. Ahizongin Telenor Tower pen a kibawlsan laitak ahih manin Upper
Myanmar lam ah kizang thei nai lo deuh hi. CDMA 800 te zong a luite
Ks.5,000/- leh a tuamtuamin kileithei lai hi.

6. Zogam Singtang Lo-te kihal khin ta:-

Zogam ah Lo kihal khin tham pek a, buhtuh leh khaici tuamtuamte kituh
tek ta hi. Lohal nunungte pen guahzuk in lap a, lo kang vet lo a,
mangtom tawh a kinahvawh lai zong bel na om zel ahi hi. Lohal gamkatna
hangin meikhu na veng thei nai lo ahih manin hmattan-tinna pen lem zo
pha lo hi. Tu bang dan a guahtui hong pai suak leh kum pha thei dingin
lamen uh hi.

7. Zogam Khuate ah mei tang zihziah:-

Bullam pan a huhna tawh Zogam khuate ah a beisa kumte a kipan Solar
mei kibulh sak a, khua tampi in nuamtuam khin uh ahi hi. A masa lam in
i Zogam, Tedim gamte ah Thangkai kual teng ah kibulhsak a, tunung lam
a kipan Tonzang leh Cikha gam khuata pawlkhat ah kibualh sak a, nuam
tuam mahmah a, i khangtohna lianpi khat mah ahi hi.

Ka pianna Saipimual khua nangawn ah innkimin kibulhsak a, nidangin Ak
kang lai zong vom zo, a kicih hun tawh tehna-in nasia lua ta mai ahi
hi. Solar dal khat leh Bettary bung khat tawh mei bulb tawh a kimin
bulhsak ciat uh ahi hi. Hibangin khua tampi in kinoptuampih khin ahi
hi.

8. Vangteh Siamsinte Kilawmtakna:-

Vangteh Siamsin kipawlna min tawh April 15-19, 2015 sungteng Vakteh
khua ah Kilawmtakna leh Crusade khat bawl uh a, Revd Tang Khen Pau
(Asst.Ptr.Tahan A.G) thugenpi dingin zanguh cih thu kiza hi.

9. Kawl Tuibuah pawi man khin ta-uh:-

Tukum Kawl Tuibuah pawi pen nasiatak a a bawl dan uh ahi hi. Nidangin
zingsang nai kua pan zintak nai nga dong bang tuibuah hunin zang zel
ta le uh tukum pen Kalaymyo ah zingsang tungtung nai giat bangin kipan
uh a, a tawp ni bang pen nitak khuazin ciang nangawn in buaklai uh hih
tuak hi.

Palik te’n lim cin mahmah ahih manin accident tawh mi si pen tawm
tuamin kigen ta leh khuapua lampan a liam a bai pen tam mahmah cih
zato nasemte in gen uh hi. A tuampian khat leh a angtanhuai thu khat
ah, Yangon a om Tedim Association cih, Dr.Tuannote pawl vaisiana min
tawh i Zo ngeina lam pawlkhat va lak uh a, mipi in thangah leh siam sa
mahmah uh ahih manin pahtawina zong ngah cih kiza hi. Lungdam leh
angtanpih hang.

10. LST Sang zo Lungdampihna:-

Tg.Pau Suan Zam (a) Zampu, Revd Tuan Suan Dal’ tapa in APTS,
Philippians a Sang minthang khat panin M.Div. zo-in hong ciah a,
zani-in a teenna Kalaymyo hong tung khin ta hi. Amah pen AMC pawlpi mi
khat hi a, Pate’ khualui, Gamlai khua ahi hi. Amah pen Music tuamtuam
zong kiva a, Shillong khawng ah zong sangkah a om ngei khat ahi hi.

11. Mopawi Lungdampihna:-

Tedim khuasuak, Tg.Dal Sian Kam (Singapore) a om, Revd En Khan Mang
(Asst.Ptr.BAG) te’ tapa, Dr.Sawnpi (MB.,BS) Kalay General Hopital’ i
sanggampa leh Lia Donbawi (Suangzang, Tedim Tsp) te in March 31, 2015
ni-in Bethel A.G ah Revd Dr Khai Khan Suan’ tungtawnin Pumkhat-suahna
nei uh hi.

12. Dahpihna:-

Cikha aa teng, Haiciin khua mi, Sia Nang Suan Dal (Kum 62) in April
16, 2015 ni-in gilsung lam damlohna tawh a inn panin hong nusia hi.
Amah pen (Pa Pum Kho Mang), Cikha, Tg.Pau Lun te’ ii makpa hi a,
Sangsia pension khat ahi hi.

13. Boarding Home te’n mi khon keei ta:-

Boarding, Bawda a om ding sangnaupang te kaikawm in a munmun ah mi
vaksak ziahziah ta uh hi. Bawdaw minthang ding, sum ngah ding mah
ki-ut ciat ahih manin Bawdaw nei pawlkhat in mi zol keei uh a,
pawlkhat in agent zangin a munmun ah mi sawl keei cih zong kiza hi.
Hite i mawhsakna hi lo-in a khuahun zui a mapannate i genna ahi hi.
Hih zong i khantohna khat mah kicithei ding ahi hi.

Tan 10 laivuan kitel ciangin Distinction tampi a ngahna Bawda te
kilunglut pha diak thei ciat ahi hi. Ahizongin Exam mi bangzah pha a,
mi bangzah in lai ong, lai zo hiam, cih a percentage tawh a en thei
zong mi om a, ngaihsut dan kibang kim lo hi. A masa-in laisim, laipil
a thupit bangah ki-makaih dan leh cidamna lam tawh kisai a thupisak
bawda zong om ahih manin hite zong phawksiam huai kawm dingin ka mu
hi.

14. Tuailai Khawmpi a nih veina:-

ZTK anih veina Pawipi ah pawi sim dingin a munmun panin khangnote kisa
ngeingai ta uh a, lawphuai mahmah hi. Singapore panin Dr.Cinpu,
Khawmlay te a kipan a kihel theih dinguh banah Lamka lampanin i
sanggam unau Zomi makai pawlkhat leh khangno honkhat zong va kihel
thei cih kiza hi. A malepin mikang lai sinna zong nei thei uh cih thu
kiza a, lungdam angtanghuai mahmah ahi hi.

Hih pawi ah Dr.Cin Khan Lun (Lamka-Singapore) Research lam a sem zong
va kihel thei ding cih thu kiza hi. Hong lawhcin nading uh thungetna
tawh phawkpih ciat ni. Laisim mimal tungah Pasian in thupha a thakin
hong pia ta hen.

(Ka Khamtung zinna maan, photo tawmkhat hong hawmsawn ing).

Peter Khampu
CMedia, Kalay