Jakarta khuasung ah Bomb kitam ngekngek

Jakarta khuasung ah Bomb kitam ngekngek

Indonesia gam ii khuapi ahi Jakarta khuapi sungah Thursday ni dendiak mahmah in migilo te’n Bomb abanban in sukham uh a, thau kikapna zong piang cih Fox News in genkhia hi.

Associated Press te pulakkhiatna ah migilo te atawmpen mi 3 peuhmah in amau leh a Bomb uh ki puaktam sakkhawm uh cihzong genkhia hi. Tuapen Jakarta khuasung aom Starbucks Coffee zuakna sai pan hi a, tualo amundang ahzong atawmpen 3 veipeuhmah Bomb puaktamging kiza cimawk hi.

Tri Seranto kici Bank Security Guard khat in AP News Reporter te kiangah agenkhiatna ah migilo te 3 tak Starbucks Coffee saisung ah 10:30am hunpawl in luksuk uh a, amautengthum khatkhitkhat hong puaktam phangphang uhhi cimawk hi.

Tuakhit ciangin thautawi mi nih zong hongki zuisuk leuleu uh a, palik te omna lam ah paisuk uhhi. Tuakhit asawtlo in thauging kizapah a, palik khat ki kaplum in, adang palik 3 zong nakliam mahmah uh ci’n ama mitmuh teng genkhia hi. Tuabangteng apiankhit ciangin palik dangte’n delhhuan uh ahih manin, tua thautawi migilo nih te zong taimang uh cihi.

Jakarta khuapi sungpen tulaitak buaimahmah, aki patauh mahmah laitak hi a, hih Bomb sukham in abuaisak kuate cih ki theician nailo hi.

Sarinah Shopping Mall mai leh Police Station mai ahzong Bomb puakkham om kici a, UN United Nations) te zumpi mai ahzong Bomb puakkham kici kawikawi hi.

Hih Bomb puahkhapna munte pen adiakdiak in Luxury Hotels aomna leh kumpi zum, gamdangzum Embassy leh Office thupi aomna munte hiphadiak hi. French Embassy, Turkey Embassy, Pakistan Embassy tetawh Bomb puakkhampen kinai mahmah kici hi.

Jakarta aom U.S. Embassy inzong Emergency Warning Message hawmkhia uh a, American Citizens khempeuh Sari Pan Pacific Hotel leh Sarinah Plaza te nanawk kha het kei un, tuakuam sungah kikapna vengnailo hi ci uhhi. ZD Sawltak #zomidaily