Zika Virus hangin Singapore gamsung khualzinding ki patau mahmah

Zika Virus hangin Singapore gamsung khualzinding ki patau mahmah

Singapore gamsung ah abeisa Saturday (27 August) ni in Zika Virus kimukhia ahih manin, leitung gamtuamtuam kumpi te’n agammi te uh Singapore gamsung azinding uhleh kidopding taangkoko ta uhhi. Zika Virus akilawh pen mi tamsemsem, khangsemsem a, tuni ciangciang Zika Virus ngahpen mi 56 hita ci’n Straits Times te’n tangkokhia uhhi.

Aki muhcil in numei khattungpan aki mukhia hi a, tuapan in mi kibehlap toto ahih manin, thuneite’n adangzong aki behlap toto khadiam ci’n lunghimawh mahmah uhhi.

UNITED KINGDOM
UK kumpi te’n agammi te uh Singapore gamsung ah azindingleh adiakdiak in nupi naupaai laitak te, naupaai sawmte in amau ii zat Doctor tetawh hoihtak Travel Plan bawlkhawm in kikupding zaksakna nei uhhi.

AUSTRALIA
Australia Department of Foreign Affairs and Trade te’nzong agammi te uh Singapore gamsung ah azinding aomleh thokang kipehsak hetlohding, hoihtak ki kepbitding amau ii zat Website tungtawn in tangkona nei uhhi. Naupaai tezong athupi mahmah ahihkeileh zinlohding banah, Singapore pan ciahkik khitzawh khanih sungbang naupaai lohding cihtezong theihsakna nei uhhi.

TAIWAN
Taiwan inzong agammi naupaai te Singapore ah zinlohding leh adang azinkhin tezong thokang kipehsakkhak hetlohding lim vaikhak mahmah hi.

MALAYSIA
Malaysia panin Singapore gamsung nisim alut apusuak te lakah Bus tawh apaite Johor panin Bus tawh apaite Thermal Screening bawlding uh cihi. Motorcycle, Taxi leh Car tawh apaite ahihleh cidamna tawh kisai theihsakna laihawm piading uh cihi.

Hih Zika Virus pen thokang panin kilawh sawnthei ahih manin, eizong ih omna peuhah thokang ki petsakkhak hetlohding hanciamni. ZD Sawltak #zomidaily