Dear Tawngno,
Leitung ah tai tampi apai nailo nang adingin tai tampi a pai khinsa na pa in kapai sungin ka muhkhak thu tampi te lak ah ka phawk khakthu tawm hong gen nuam ing. Tua hileh nang adingin hong huhtuam dingin um ing.
Tu hun in:-A kisin pilna te nidang hun sangin sangzaw pekpek hina pi-in, apil asiam ding mi hongtawm tektek ta hi. Pilna nei, siamna nei mi hongtam tektek na pi-in, buaina zong hongkhang tektek ta hi. Zato hoih leh Siahuan siamte hongtam tektek na pi-in, natna lamdang zong hong piangpiang in adamloh mi hongkhang tektek hi.
Lungnopna dingin a kizang sum tam tektek na pi-in, nuihmai tawh aomding mi hongtawm tektek ta hi. Ihmut hun tawm tektek na pi-in, laisimna ding hun tamzaw tuan peuhmah lo-in kiam zaw tektek ta hi. Hong thuhilh nuam tam tektek na pi-in, itna takpi tawh hong sepsak ding mi, tawm tektek ta hi.
Zeisu hong kumsuk kik ding angak lah tam tektek na pi-in, a vengte takpi a hopih nuamlo mi hongtam tektek hi. Leitung bup ukzawh na dingin thu ngenngen na pi-in, a mau pumpi zong a ukzo lo mi hongtam tektek ta hi. Thupha ngah minam, minam lian te hi hang cici na pi uh in, mi deidan na a ultung sak mi hong tam tektek ta hi. Piakkhiatna ding bekbek genbel in nei na pi-in angsung ding bekbek tawh buaigai ta uh hi.
Khantohna ding leh gualzawhna dingin thulian tampi gelkholhna kineih mah tase leh gualzawhna in hong taisan tektek ta hi. Hun saupi tak na kisem zo napi in, sawtpi angak zo ding mi kitawm tektek ta hi. Technology khan to tektek in kiho pihna, ki thuzakna nop tektek in manglang tektek na pi, khat leh khat kiho na, kihawh na, kikup khopna hun hong tawm tektek ta hi.
Khawlmun nuam ding tampi kilam in ki behlap tektek na pi-in, a khawl man ding mi, a tu man ding mi tawm tektek ta hi. Nupa in sum zong khawmin thalawh khop hun hina pi-in, sumzat kisap tektek hun hong hita hi. Inn hoih inn nuam sungah teeng khawm in omkhop hun hina pi-in a kitam innkuan vive hikhin gai ta hi.
Ka luphun ta in hihzah hong gelh ning.
Hong it,
Na pa
Columbus, OH
August 27, 2016
Comment piaknop aomleh...