ZEC Pahtawina pawi thugenna (ZEC Graduation speech)

Baihlo Hi, Piangthei Hi
(Too Difficult But Possible)

Zogam pualam ah Zomi Siamsinte graduation nopci takin abawl masa pen hikha ding ihih manin, ZEC kipat cil pan tuni ciangciang thatang, sum le pai, hun khempeuh pia aa ma pang kha mimal khempeuh pahtawi zawhding aa kilawm, Zomi khangthakte aa ding nasemte ih hihlam tuni kiphawk thak ding deih masa hang.

Kum khat khit kum khat hanciamnate hong tangtung ahih manin, ZEC pen, Malaysia aa Education lam vaipuak nei Zum thupi khempeuh leh Media/Thusuah tuamtuamah kician takin mun ngahzo aa, Zomi a tawisang, Zomi a pulak khia ZEC hong suak hi. A hunhun aa Lai hilhlo pi, Sang honglo pi, Kidemna tuamtuam dem lopi, galtai Sangte mai-ah pahtawina ngah lopi-in ih ngahkhiat gualzawhna hilo ahih manin, ZEC pan Sang naupangte gualzawhnate kong gen kholkei zaw ding aa, ih ngimna bulpi khat ahi Minam tawisan’na leh tuaciang dinmun tun’na ding bangdante kisam hiam cih enkhawm nuam hang.

Sang naupangte pahtawizawhna din’mun ciang tun’na dingin Siate pahtawi ziahziah ding zong phawkhuai aa, mailam ah a picing semsem ding ih lunggulhna-in, a beisa hun aa ih hanciam ziate etphatna vive tawh tha la ding aki hanthawn khol hipah hang.

Tua tawh kizui-in, Siate leh ZEC kipat lam thute gen ni-in, Malaysia ah Kipawlna bulphuh Sang tuamtuamte tangthu paizia theihna dingin zong aki hawmsawn hihang. ZAM in a masa pen Sang naupangte ZAM zumsung mahah Lai hilh masak 2007 kumbei lam hi-in, tua hun pan limlimin, kuama phuk ngamloh, kuama ngaihsut khakloh, kuamah’n a teel masak ngamloh ki piakkhiatna tawh Siate, Sianute nisim in ma kipang hi. Ki piakkhiatna cih teh, ZAM pan ahi zong, Sang pan ahi zongin cialna-guaihna piakding ki vaihawm zawh genloh, a Sang vai vaihawm pen Sia teng mah a hihkul mawk hi. Lai hilhkawm leh Sang inn sap, tui manh, mei manh cihte aa kipan Siate mah ki lungzing den hi. Haksatna, lungkiat dekdek hun tamvei mahmah tawh ki pua teta-in, 2008, 2009 khawng ciang, Zomi naupang veng tuamtuamah ih tam semsemna zui-in, ZEC-Cheras te, ZEC-Klang te aa kipan ZEC-Sg Long, ZEC-Kajang cih bangin, kei ki piakhia ning a ci ngam teng mah ii thuak ngapna, gim ngapna tawh ki picing semsem hi. A lamdang mahmah thu khatah, a vei, a lainat taktak teng mah ii nasepna ahih manin, ih Zomi naupangte pattahna-ah namdangte’ nuai ki-om hetlo pah hi!

Lamkhat leuleu pan, ki piakkhiatna ahih manin a semsuak zolo zong pawlkhat om hi. Innlam pan Lai tansang degree tuamtuam ngah ahi zong, Lai hilh experience hau mahmah a cite tata va zawn le’ng, kha khat bangzah kingah cih vive ahih manin, pil ingh, hilhthei ingh aci khempeuh ii sepzawhna ZEC hilo hi. Zomi sungah Education lam ahih kei leh laihilh thei ciangciang, zum nasep semthei cihdan kitawm maw, ci le’ng, hi deklo hi! A semthei, avei veve Zomi tam simsim mah ZEC ahilo Sangdang ahih kei leh Zum tuamtuam ahi thamanh/khasum ngahna munte-ah semzaw uhhi. Iplah huaithei veve ahih manun, gamthumna tungkhin tawh, Malaysia aa omlai tawh, ciamteh ning ki cici lo na pi inghin, a mi-in ka theihlai tam peuhmah aa, lamkhat pan ZEC tangthu laimai tawmbeek gelh khalo uh suak hi. Tuhun ciang, ZEC mah aa ka sep tantan ka hamphat zawklam ka phawk semsem hi.

2011 masiah ZEC hiciang ih tun’na ding nisim in puak hak pipi ih puak tantan, ih sep tantan lai aa, semthei, semsiam veve ZEC ah ni lang a’i zong, hunbit a’i zong hong sem hetlo, tuhun teh ZEC ah ma hong pangnuam a om peuhpeuh na welcome un, cih, kei muhna zong ong behlap pak ingh. Ahi zongin, naupangte makaih taktak aa, hunbit lai a hilhloh phamawh ding hi; Education cih Siamsin sakna nasep ah, athu vaan pak ding, ngaihsutna pia ding, activity khat vaihawm pih pakding ciang cihbang omtheilo hi. Tuadan ciang nasepte pen, kum (5) sung ka mapan’ khakna zui-in, haksa peuhmahlo leh a tawntung veina hi hetlo in mu ingh! Tua hunlai khawng aa om, tuni hiah a kihel lai ZEC Sia pen tam nawn samlo ahih hang, a kicingzaw bangin hong genthei lua ding uhhi. ZEC leh Zomi na vei leh, na dong hamtang in.

A deuhdeuh in 2010 June kha masiah ZEC aa ma pang kha peuhmah pen, pahtawina pia ding bang hile’ng bangdanin pia ding ihiam cihzong ngaihsut hak liangding hi! Athei ki tamzaw in cin, ZEC kipat 2007 November pan 2010 June kum nih leh lang val pen a lamdang takin Ki Piakkhiatna Hunpi sung kici thei hi. Cialna-guaihna kipia zo kilkello hi! A patpan ki piakhia tawh, kum nih ki piakhia tawh zahtak-pahtawi huai thei mahmah hi. Pulak dingin a mi tamsim hikei leh, 2007 pan a kumkum aa ZEC Sang tuamtuam aa semteng ii Min teng kikem sitset aa, ke’n zong file khempeuh copy kemlai hi’ng; Tangthu ding hi!

2010 June kha aa kipan compensation/incentive cih min vawhin UNHCR in 2009 aa Sang Sia kipan khinte khasum dan hong vaihawm sak tasam uhhi. Tua 2010 aa ZEC Sang Sia hong kipan tampi tak mahin ngahthei tuan nailo zel bek thamlo, a kumkik 2011 aa ngahthei nailo ki omto lai ahih manin, tua lai aa, a seppih alui tengin kha simin nektawm khop ngahta leh amau ngahlo pipi a sem tantan teng zong pahtawi huai kasa hi. (ZEC Sang 6 pan tuadan ka theih sitset Sia 9 bang om hi.)

Zomi-Malaysia Tangthu ah, ZEC in, ih sep nailoh pi, ih vaihawm lohpi, sum ahih kei leh thamanh ombek teh, UNHCR te maimuh bekteh na kisem panlo hi, cih pen thu namtui mahmah anei gige ihihi. Tua hi-in, Zomi naupangte veina anei pen minam mailam ding a lunghimawh taktak khat hi; A vei ciang bek, athei ciang bek hilo aa, asem tangtangte minam vei hi; Sep tangtangna ding haksatna tampi kawmkal pan ahun khempeuh a piakhia ngam, a piakhia zote minam nasemte ahihi.

Kum 3-4 sung asem masate’n zong nisimin van gik mahmah na pua tentan zo buang ahih leh, tulaitak aa semte leh mai kha, mai kum aa sem toto dingte-in, tha san aa, hun neih zahzah piak ngam lohna ding om kilkello hi. Ni khat aa ih sepnop zah hun cihkhat ih ciangtan mawk leh bel ih veina dan atuam hiding hi. Kei theihkhak ciangciang bang, UNHCR in Hun-bit Siate bek Sia/Sianu khat in ciamteh hi! Tua UNHCR ii ciapteh ding manin Hun-bit kisem pan hilo zaw leuleu, cih, ei ZEC aa sem peuhmah ki khentat zawhna neihding kisam den hi. Tua tawh kizui-in, hunbit sepding omkei aci ih omkhak leh ih naupangte aa ding leh ZEC maban ding khasiat huai mahmah ding hi. Ih muhna, ih sawmna/tupna zaisak semsem le’ng Malaysia ah palai nasep pen nisim in hun kicing khollo hi!

Ei mimal haksatna tengtawh Zomi naupangte hunbit aa makaihna pen baih asa omlo ding hi. Ahi zongin, kei theihkhak ciang ih gualzawhnasa pawlkhat enkik pak le’ng; ZEC in hunbit-nibup lai leh theihna, pilna kician hilhna neizo tawntung hi. ZEC in, UNHCR/HTC ah Siate training paisak den hi. ZEC in, UPSR laihuannate kilut, ki gualzo zo hi. ZEC in, minam puan leh ngeina laam tawh namdangte mai-ah teelna kingah den hi. ZEC in, Computer lamah Best Center pahtawina kingahzo hi. ZEC in, 2008 pan 2012 kikal kimawlna lamah namdangte sang’ a tamzaw Gualzawhna Cup tuamtuam 20 val kingahzo hi. ZEC in, Faisal Cup a vaihawm lak aa kihel ding community lam panin committee mi 2/3 lakah 2009 pan 2012 kikal panmun kingah den hi. ZEC in, 2010-2012 kikal Malaysia aa om galtai Sang, Sang Siapi khempeuh ii Tangmi (representative) dingin teelna kingah den hi. Tua sung mahin, namdangte Sang Siapite na lengin UNHCR tawh kizopna pawlkhatah ZEC ii panpihna hong ngenden uhhi. ZEC Sangte a kigawm Sports Day ki vaihawm khawm zo hi. UNHCR makaihna tawh Teachers Day nopci takin nihvei kibawl aa, a pawi vaihawmna-ah committee panmun tawh ZEC in thatang leh hun tampi bei-in ma kipang thei hi. UNHCR in, UN phualpi Geneva pan ahi phial zongin, Malaysia aa Galtai Sang tawh kisai a en ding, a kanding hong pai simin ZEC hong hawhsak den hi; Education vai Media tawh kimuh ding simin ZEC hong ap uhhi. Malaysia aa galtai Sangte tawh kisai vaihawm thak ding thu khat a omsim in ZEC hong kum masa den uhhi. A thupi penpenah, ZEC in mindang neilo Zomi min tawisang den hi!

Sepkhopna tawh gualzawhna tampi kimu aa, hunbit Sang Sia sep pen, haksa mahmah ta leh piangthei mahmah hi. Too Difficult, But Possible!

Vekpi tung lungdam!

Tg. Kham @ Khampi