Vondeih Kep Ding – 85 (Dimno’ Pa)

Dear Tawngno,
Lengtong Pauno in a thugenna khat ah, ‘kei zong thugen gen thei pawl ka hih ciangin bangteng gen leng ahoih tam, cih sangin bangteng gen kei leng ahoih zaw tam, cih hi zaw kei apen, ci-in thupatna hong nei hi. Tuapen diksa mahmah ing. Na pa’n zong genloh dingin trash can sungah ka koih khitsa laikhat kasim kik leh hoihsa in,tua thu hong gelh kik ning.

‘Edison aneu lai-in a sanginn panin a siate in laidal khat anu’ sim dingin hong pua sak hi. Inn hong tun ciangin anu kiangah,‘ka siate in na nu pia-in nasim sak in, ci-in hong vaikhak hi,’ ci-in a laidal hong pia hi.

A nu’n zong a tapa zak dingin khitui nawl kawmkawm sa-in hong sim hi.

“Na tapa Edison pen teilua mahmah ahih manin ko sanginn ah amah tawh kituak in lai a hilh zo ding sangsia om nailo ahih manin inn ah nang mahmah in na hilh in,” ci hi.

Sia le pha a khenthei nailo naupang Edison in a sia te’n amah a pahtawina lai asim ciangin a nu lungdam lua in a khitui aluang sa lel hi. Tua zawh akipan a nu in Edison pen sanginn ah kha nawn lo-in ahih theihzah in inn ah laihilh hi.

A nu in hong sihsan zawh kum tampi hong pai khin ta hi. Amah zong leitung ah aminthang scientist, inventor khat hong hi khin ta hi. Nikhat a innsung teng hong phek leh bizuu kawm khat ah lai kikhep khat hong mu hi. A et phatphat leh a neulai in sanginn panin a siate’ puaksak lai ahih lam hong phawk kik in asim leh,

“Na ta uh Edison pen a lungsim acinglo khat hi. Na tapa uh ko sanginn ah hong kha nawn kei un,” na kici mawk hi.

Hih lai hongsim khit ciangin sawtpi tak hong kap in, a nisim ciaptehna diary bu sungah laigual khat hong gelh hi.

“Thomas Alva Edison pen lungsim akicingno naupang khat hina pi-in, nu hoih aneih manin leitung ah aminthang inventor khat suak hi,” ci hi.’

Tawngno aw, na pa in leitung ah mi minthang, mi lawhcingte ka om muan in hihci ka et ciangin a nu te hangin ana lawhcing na tamsim sim hi. Nang zong numei na hih loh hangin numei te’ manphatna, numei te’ thupitna leh a diakdiak in nute’ manphatna a thukzaw in telthei le cin ut ing.

Hong it,
Napa

Columbus, Oh
December 21, 2016
Facebook ah Dimno’ Pa Page non na Like sak ve vua!
https://www.facebook.com/dimnopaa/