Jesu Christ suangpi tui-nak nei
(…6. En in, Horeb-a suangpi-ah nangma mai-ah ka ding ding hi. Nang in suangpi na sat ding a, mite in tui a dawn theihna dingin tua suang sung panin tui hong phulkhia ding hi,” a ci hi. Israel upate’ muhna-ah tua bangmahin Moses gamta hi… Exo.17:1-7)
Israelte Sin gamdai apan in Rephidim mun a hong tung uh a, tua munah puanbukte a kai uh hi. Hih munah dawn ding bangmah a omta kei a, mite’n Mosi a kinakpih uh hi. Mosi in bang dinga hong kinakpih a Pasian ze-et a phunphun na hi uh hiam? chi’n mipite a dong hi. Mipite’n lah, “Ka dawn ding uh tui hongpia in! dangtak a ko leh katate uleh ka gantate uh hong that dingin bang ding a hong pikhia na hi hiam?” achi uhi.
Tuachi’n, Mosi Topa mai ah a kap a, “Hih mite tungah bang ka hih ding hiam? a phun uh a, suang tawh hong denglum dingin mansa in a om uh hi, ” chi in Topa a dong hi. Topa’n Mosi kiangah, “Mite’ mai ah pai zel in la, Israel upate tonpih inla, Lui na satna chiang tawi gige inla pai in. Ngai in Horeb ah suangpi tungah na mai ah ka ding ding a; tuachi’n suangpi na sat/khen dinga, tua suangpi a kipan tui a hongpawt dinga, Israel tate’n a dawn theihna ding un,” achi hi.
Topa’ thu bang zel in Mosi in Israel upate mitmuh in ma kai a, Horeb a suangpi sat in Israelte a dingin dawn ding kiningching tak tui a hong pawtta hi. Israelte’n suangpi a pan hong luangkhia tui a dawn ua, nuam a sa mahmah uhi. Tua ziak in hih mun dingin Mosi in “Massah” tua pen Pasian ze-etna chihna ahi. Ahih keileh “Meriba” zong kichi a, tua pen hel/kinakpih chihna zong ahi hi. Israel tate’n Mosi kinakpih uh a, Pasian i kiang uah a om na hiam? A chihna ziak uh ahi hi.
Israel dangtak a liangvai leh lamvai kisa mahmahte puitu leh dawn ding tui piatu Pasian ahi. Suangpi tungah Topa ziakin tua suangpi Chiang a a sat leh tui kiningching hong luangkhia hi. Hih Khovel gamdai a i khualzin sungin gilkial leh dangtak a liangvai tampi ki om hi. A hih hangin dawn ding kiningching tak Jesu Christ sungah om kiihkeih hi. “Hih tui dawnte a dangtak kik ding ua, ke’n ka piak ding tui a dawnte bel bang chik mah in a dangtak kik nawn kei ding uh hi.” (Jn.4:13-14).
Hih khovel I khualzinna ah haksatna leh demna, phun-nawina leh helnate I tuah hun chiangin Topa’ deihna banga ‘mite’ mai a pai a, ei bek omlo a Israel upate tawh kithuah ding leh chiangkhun tawi kawm a pai ding pen Topa’ deihlam ahih mah bangin, mipite’ mai ah, Jesu zui in pai lehang, I ma hong puitu- Lai Siangtho leh a thil hihthiehna zangin, misiangthote tawh kithuahna ah Topa’n I haksatna, I gentheihna, I liangvaihna leh I chihmawhnate hong dawn ding a, I dangtakna su no dingin tui hing I mu thei ding uh hi. Jesu’ nak a liamna sisan leh tui hong luangkhia tuni a mikhial genthei dangtakte’n a dawn ding un a kiningching kiihkeih hi. Jesu Christ I Suangpi tuinak ahi. AMEN!
Pastor laikung pan……
Zomi Christian Fellowship, Delhi
Comment piaknop aomleh...