I Was Born Too Soon!! :: Mungno in na omna uh lah gamlapi hi a, hong ngak dahin innah na om hithiat le uh cin hoih zaw mah ding hi ven, guahzuk tawh bangtawh ko hangin hong gim sak hong tawl sak lua ung.. a cih leh, nai guk dong ngak hong sawm ka hi uh a, nai 6:00PM sat leh bel ciah a sawm ka hi uhhi hong ci hi.
Tua banah ko hong ngak kei le ung inn thei lo ding na hih uh ciang a, ka lung uh a nuam lo hi, hongcih ciangin Mungno in dawngkik pah a, phamawh lo hi, ko GPS keng ung, na address thei peuh le ung hong pai thei veve ding hi ung.. acih leuleu teh, GPS na cih bang ahiam thei keng.. hong ci hi.
Ken ka theih sunsun pen khat hi bilbel ahih manin, a mau thugenna sungah kiheltheih theihna peuh ding deihna kawm tawh, kitheisak nuam lua kisa, ‘Global Positioning System’ acihna hi cia Mungno dawn kik maa, ka gen samsam vial leh; Aw… hi maw ken tuhun a van piang thakte thei nawn lo, “I was born too soon!!” hong ci–in ithuai takin hong nui biahbiah hi.
Ka tun zawh uh a sawt lo in Lianpi inh a piano zaknop takin hong tum a innsung ka lumsuah pah uhhi. Mungno leh Pastorpa’ lah putu kimu bangin hong holim mahmah uhhi. Innteek nu’n an nee phot un anneek khitteh ciah un, hong cih ciangin an lah kine nailo takpi ahih manin ka thukim pah lian uhhi.
Maangno in sianu hong huh thei pah in, a sawtlo in Mikang-an Mikangte mah tawh ka ne khawm uhhi. Anneek ma in ka tutna ding uh Pastor pa in hong sehsak a, ama hong seh bangbangin ka tu pah cinghtengh uhhi. Apple juice leh pongmoh sandwitch ka neek khit uhteh gongkhupna (dessert) in cake moh, nahtang, lenggah ka ne uh a, gil hongvah pha mahmah simtham hi.
Ka lawmte kiho kal in a laibu khawng ka enen a, a diakdiak in National Geographic Magazine te ka et leh na deih leh na deih zahzah pua in hongci a, ka puak zawhzah mah ka la pah hi. Zan nai 9:00PM hong sat petmah ciangin ka ciah uhhi. Ka ciah uh ciangin den a GPS na cih uh mu nuam ing ci’n guahzu supsup laipi mah hong en a, Mungno in hoihtak phatak mahin a zat dan gen phapha hi. (Tua zawh kum 7 – November 2, 11:00PM 2015 in a tenna khua pan Pa’ kiang hong zuatsan hi.)
Lampi ah khawl peuhmah lo in ka pai suaksuak uh leh ka zin uh zankim lianin ka tung uh a, tung limmah mangpha kipaihin ka lupna ciat uh ka kideenna/zuan pah vingveng uhhi.
Azom omlai…
Agelh: Awn Za Pau
Comment piaknop aomleh...