Vondeih Kep Ding – 133 (Dimno’ Pa)

Vondeih Kep Ding – 133 (Dimno’ Pa)

Tawngno,
Gam khat a khantoh theih nadingin thukhun hoih a kisap ban ah makai hoih a neih ding uh zong kisam sa ing. Tua mah bangin khua khat khantoh nading zong hausa hoih kisam a, innkuan khat khantoh nading zong pa hoih, nu hoih kisam hi. Innkuan khat ah pa ahi-a, nu ahi zongin a ginat kei leh tua innkuan pen kiam pah hi. Tua bang mah in gam khat ah gam makaite a hoih kei leh tua gam zong kiam suk pah hi.

North leh South Korea gam te economy kimakiah zia ka theihsun tawm hong gen nuam ing. Numbers tam kihel simsim in cin, la ngaikawm in na sim leh na tel loh khak ding lung himawh ing.

South Korea pen1960s kiim pawl in leitung ah gam zawng penpen hi phial a, ahi zongin kum 2004 ciangin a gam GDP uh $ 1 trillion ah hong tung to-in, nung kum ciangin $ 1.4 trillion hong hi-in, tu laitak leitung economy ah no. 13 na hita hi.

Nasem 10,000 om na ah robots 632 bang om a, gam population tawh kizui in leitung ah robot tam penpen na gam zong hi lai hi. Germany ah 309 robots per 10,000 workers hi-in, technology lam ah a khangto mahmah Japan gam ah 303 robots per 10,000 workers bek hi zo pan hi. US gam ah robot kizang pen tawm mahmah lai-in, 189 robots pen 10,000 workers hi bek hi.

North Korea gam GDP pen kum 2014 in $ 27.5 billion hi-a, South Korea gam a tawh i tehkak ciangin a zah 52 bang in South Korea te-a lian zaw tham pek mawk hi. Thutheite in a gen uh ciangin North leh South a kikhen cil kum1945 lai-in North Korea te GDP pen, South Korea te a sangin tam zaw hi, ci uh hi.

Makai hoih nei leh makai hoih nei lo te makaih zia, limtak in kimu cian thei leh kilawm sa ing. Hun khat lai-in i gam zong Singapore sangin nasia zaw ci mah uh hiven, en lah thei kha ban khang ei mataw! Ei hun ciangin ei thieh khak bel sum zong in, maizum thuak in Singapore, Malaysia, Thailand cihte ah kileng khin gai ta hi. Malaysia te bang i gam ah sum thalawh in hong zin hun uh zong om ngei, cimah hiven! Makai hoih i neih loh manin tuin i makaite in leitaw pek ah hong tunsukpih khin ta uh hi.

Hih bangin kong gen ciangin hong uk kumpite tung bekbek ah mawhna khempeuh na puaksak ding hong thei khin sam lo hi ing. Kong deih pen in makai hoih nei leh nei lo te hangin a piang thute na ngaihsut kak theih ding hi. Tua hi leh nang hun ciangin na makaih zia ding thei tuam ding hi teh!

Na nu tawh, na nau tawh na vek un hong phawk mahmah ing. Na nau tawh milak khawng ah kam na kinialnial kei un maw!

Hong it den,
Na Pa

Columbus,Oh
February 5, 2018