Zatui azangkhat mihing sin aneknoptha suakin avengpa thatlum
Thai gamsung ah kum 24 aphakhin zatui “Drug” azangzang khatin avengpa thatlum in asin neksawm cimawk hi. Tuapa pen Yaba leh Marijuana khamtheih zatui azangzel khat kici hi.
Thai Police te genkhiatna ah hih thupiangpen abeisa Saturday ni in Bun Kan’s Bung Khong Long District sungah thupiang ci uhhi. Mi kithahna om cih Police te’n atheih azak uhciangin tua vengsung ah delhpah uhhi.
Thahlup athuak innteekpa pen akum tamkhinkhat hi a, kum 79 phakhin hi. Palik te atun ciangin tua puteekpa ii aluang pen guatukkhap lupna akibawl tungah na om ci uhhi.
Tua puteekpa pen agawl ki atsak in, agilpi zong kikhei cimawk hi. Ageinai ah mithatpa ii azat letmat 9 apha temta khatzong sitawh kidim in kimu cih The Nation te’n genkhia hi.
Tua mithatpa pen kum 24 aphakhin Pere Jongthong minnei khat hi a, apuan khempeuh silehnai tawh kidim in tua vengsung mahpan in Pol Captain Wikrai Sriwasuk in mankhiapah cihi.
Tua mithatpa akimatkhit ciangin apumpi kivel a, abombi ipsung ah puteekpa ii asin napua cimawk hi. Tuapa pen palik te’n mancippah uh a, kemcip suakpah uhhi.
Tuapa thusitna abawl ciangin agenkhiatna ah Yaba leh Marijuana (kanza) kazatkhit ciangin ka vengpa inn ah kahawh cihi. Tualaitak in mihing sin “Liver” neknopna lungsim thakhatthu in hong suakkhiavat in, avengpa athatlum cimawk hi. Tuaciang in ageinai aom temta khattawh avengpa athatlum ahihi.
Hihbang in avengpa athahlup laitak khuasungvak te’n mukha uhhi. Tua amukha Witness te’n agenna ah Pere Jongthong in puteekpa ii agil kheisak in, asungah zonzon khat nei cimawk uhhi. Aveng apam te’n lauthawnggawp in ki otsan ngeingai a, tuaciang in Pere Jongthong pen taikhia vingveng ci uhhi.
Related: USA ah mithat vaitawh Hrang Lian Mang leh David Sui Ceu kiman
Police te’n thu hoihtak sitding uh a, mithat tawh thong kiading cih kiza hi. Guihtheih khamtheih “Drug” zat ahoih hetlohna pen hih thuthang in honglak phapha hi. Guihtheih khamtheih azangte’n asia apha khenthei nawnlo in, alungsim sungah asuakkhatpeuh semsuk, gamtatsuk pahpahthei uhhi. Leitung thuthang tezong lipkhap huai semsem mawk ei maw….. Sawltak #zomidaily
Comment piaknop aomleh...