Lifetime Achievement Award ngahna tungah lamdang kasa

Lifetime Achievement Award ngahna tungah lamdang kasa

Sia Francis Khampi in Malaysia UNHCR zumpi panin Lifetime Achievement Award 2015 hong ngah manin ih lungdampih mahmah hi. Hih Award a ngahna vaitawh kisai in ama tungah alungsim ombang hong pulak nading in ka na ngen uh a, hih anuai ah ama ii lungsimpan hongphulkhia lamdang asakna leh lungdam akohna kong suaksak uhhi. ZD Sawltak #zomidaily

Lifetime Achievement Award ngahna tungah lamdang kasa

Cikmah hun in hihdan pahtawina ngahding ka lamen ngei kei a, tua ngah na ding in bangmah ka sem kei hi. Tua ka ngah mateng ci in tupna zong ka nei kei a, hih ngah ding kilawm ka kisa kei zaw hi.

A hizong in kilawm hetlo ka kisak kawmkal ah hih pahtawina ngah kha zenzen ka hih man in lungdam ka kipaak hi. Hih pahtawina kangah theihna ding lampi tungah hong tawnsak, theihloh kaal in tha hongpia te tungah lungdamkohna ka nei nuam hi.

Hun le vai te kigaak mahmah in a om hang in lungduai tak in tha hongpia den ka zi tungah le ka U Man le sanggam u le nau teng tungah lungdam ka ko masa pen hi.

Ka nasepna a hi Dignity for Children Foundation pan thunei siapi te le seppih lawm le gual tungah lungdam ka ko hi. Lamet hetloh pi mahin Obama na leng ka nasepna lui munteng ah na hawh mawk a hih teh na hoih ih sep teh lametna nei sese lo in sep le bawlna te ah dikna le hoih na a om nak le ei lametna sang in a kicing zaw le a picing zaw in hongpia thei mi khat om a hih lam hong kilangsak hi. Kum 8 sung ka sepna ah a lamdang khanlawhna le siamsin na tuamtuam zong ka nei beh thei a, tua te in nisim nuntakna ading in zatloh phamawh siamna te na hi gige mawk hi.

Ka nasep bulpi a hi, gambeel sangsia te khasum pia ding cih kongkhak pi hong hontak ciang in mi nam kim tawh a kithuah thei ding le tungsiah nuaisiah a neu a lian tawh a kiho thei ding in nang kiva mahmah ni teh ci in kei kiang ah hongzawn masa uh hi. Muanna tak tawh hongzawn uh a hihman in kipaak tak in ka sangpah hi.

Tua khitteh ka nasepna pi le pu te thukimna tawh kizui in hih nasep hongguan uh in tawlpi khat kum 5 sung bang nasem man ka hihmanin UNHCR te ii muanna le panpihna pen kei ading bek hilo kei tawh a kibang mitampitak te ading a noptuam nasepna a hih teh ka lawp mahmah in ka hih theihzah le tungsiah te tawh mapang khopna nasiatak ka nei thei hi. Hong lamsang, hong pantah, hong hilhcian beklo a tawpna ah US ciang dong ka tuntheihna ding in lampi kongkhak te hong honsak UNHCR te tungah lungdamna lianpi ka ko hi.

Kum 6 sung tawn tung Sani, nipi le nitaak lam pawlkhat sung vak kawikawi Catholic thuzui te kaikhawm in KL sak le khang ka kivei laitak in bangmah launa le lunghimawhna om hetlo in mabaan te kizom thei hi. Tuma kum 6 lai in Catholic thuzui mimal 40-70 pan in tu in member 3000 val bang kikaikhawm kik thei in St. Joseph biakinn, Sentul, KL ah kha an vakna le leitung taksa an vakna bek thamlo nisim nuntakna ah kisam thu hoih le thu gina tampitak in hamphat lawh in nopci mahmah hi.

Malaysia gamsungah Catholic thunei teng tawh a diakdiak in KL Archdiocese zum le Vatican Embassy dong ah limcitak in kizopna omto thei dinmun a hihman in Siadaw Felix Lian Khen Thang le Siampi te tungah lungdam beh lai hi. Malaysia gamsungah Zomi Catholic thuzui akuamah ciat tungah lungdamna a nuai abang in ka pulaak nuam hi.

2012 kum a kipan in Zomi Association Malaysia ah thudotpi ding in hong kiseh a hihman in lawptak in ka sang hi. Kipawlna khat le Zomi te taktak ading a hun, a sum a bei ngam palaai tampitak te in nasepna a hihman in ka hun neih sunsun a hoih theithei in minam sungah a kitangsapna dungzui in sepding a om nak le sem ding ci in ka lunggulh mahmah hi. Kei thudotpi panmun hang in hamphatna le khantohna tampitak mit tawh muh pah veva ding a om kholloh hang in miphawl khat te in kha muanna om le ZAM ka muan na uh hong khangto zaw hi ci in hong hopih ngei bel omlua leuleu hi.

Hih a tung a khempeuh ka sep laitak in lungkiatna pan hong thakhauhsak, cidamna hongpia tawntung, gentheih hamsatna le lauhuai khempeuh pan hong kipelhsak tawntung le lungmuanna, khamunna hongpia hong kemtawntung Biak Pasian hang bek mah a hihlam pen ka telzaw a, phatlo in ka om thei kei a, lungdamlo in ka om thei kei hi. Hih teng khempeuh a piantheih nang in Ama lamlahna le makaihna a hihi. Francis Khampi