Dear Tawngno,
Tawngno aw, hun ngah in inn ka om ciangin tuhun thuthang tuamtuam te leh thului kigelh tuamtuamte kasim theizel hi. Mipil tampitakte in‘college kah ding pen thupi taktak lo hi, degree khat peuhpeuh ngah ding pen thupilo hi,’ ci-in agenna uh news tuamtuam panin simkha thei zel ing.
Ahang in tu laitak leitung ah mihau pen Bill Gates leh Facebook founder Mark Zuckerberg pen a college kahna Harvard panin sangman manlo-in, tawp ahih manin amaute nih etteh in, gengen mawk uh hi. Ei khua ah zong sum hau, mihau pawlkhat pen college na kahlo takpi ahih manin nu leh pa tampi tak in zong amau etteh in college kah ding dik asalo tampi na om mawk hi. Ka neulawm Thangpu nu mahmah in zong ‘college kah khawng thupi kei! Nungak leh tangval kimuhna hilel hilo maw,’ hong ci ngei-in, atate tan – 10 azawh uh hangin khat mahmah zong college kahsak lo takpi hi.
Na pa ngaihsut zia leh hih mite ngaihsut zia pen tawmkhat kibang lo hi.
Tunung deuh in Jonathan Wai – Research Scientist, Duke University leh Heiner Rindermann – Professor Of Educational and Developmental Psychology, Chemnitz University Of Technology; in U.S aom mihau te, mi lawhcingte leh makai minthang mi (11,745) te thu nakan uh hi. (Tuate pen CEOs, Federal Judges, Politicians, Multi-millionaires, Billionaires, Business leaders leh the most globally powerful men and women, cihbang te hi.)
Tuate lak ah 94 % pen college man vive hi-a, tualak ah zong 50 % pen college mawkmawk hilo, Ivy League schools (Yale University, Harvard University, University of Pennsylvania, Brown University, Princeton University, Columbia University, Dartmouth College, and Cornell University) panin aman vive hilai uh hi. Forbes’ te most powerful people ah zong 80 % pen college man mah hi.
Bill Gates leh Mark Zuckerberg etteh in college i manloh hangin a kihau theilua hi, cikha kei ni. Steve Jobs zong Technology sangkah kei, mithang veve, hau veve!Thomas Edison zong Technical School nikhat zong kah kei, mithang veve! Hau veve!’ cikha peuhmah kei ni.
Leitung mihing 7.5 billion (7,500,000,000) lak ah amaudan mi pen amau bek mah hipah hi.
US President lui Barack Obama ngaihsun dih ni. Mikang hizah ta lai-ah banghang in amah hua Inn Kangpi sungah va tukha vilval mawk hi ding! Pilna sangpi aneih man leh apil manin White House ah ava tukha bek hi!
College kah sese loh hangin a kilawh cing thei leh aki hau theilua himah. Ahi zongin college khat limlim panin degree khat peuhpeuh va ngah masa phot leng, tua in i pai nopna lampi, i hon nop kongkhak te honna dingte ah i hon theihdan ding leh i pai theihna ding ziate hong hilh in hong huh ding uh hi.
Tawngno, hih bang thute konggen ciangin ‘college kah pen thupi sa kei teh,’ hong cinuam leh ‘na sanglai te hahkat nuam kei teh,’ ci-in hong mawhmat nuam hilo hing. Tuhun ciangin mi tampi tak in ‘college kahloh hangin ki hau thei veve, ki gualzo thei veve’ cih ngaihsutna nei uh ahih manin , tua bang ngaihsutna te na neihkhak ding lung himawh na tawh hih laikhak hong gelh hi ing.
God bless you!
Hong it,
Na Pa
April 15, 2017
Comment piaknop aomleh...