ZAM Thupuak :: 24 July 2016

ZAM Thupuak :: 24 July 2016

REG, RSD, DSU / UNHCR LEH MAKAITE KI MUHKHOPNA :: 21st July ,2016 Thursday ni 9:30am – 2:00pm dong UNHCR conference Hall ah UN zumpi pan Department Head REG, RSD, and Durable Solution Unit (DSU) te kilaih ziahziah in meeting thupitakin kinei thei hi.

REGISTRATION (REG) ZAKSAKNA : UN mi a hi khinte minkhumna lampan zaksakna ah innkuan lutpihna tawh kisai in “First Come First Serve” ci-in nong laikhiat na tunga a ni mahbangin ka system sunguh ah hong kiciapteh sak hi. Lai nong khiatbaih uh leh hong kisambaih ding a, nong zekai uh leh midang te sang na zekai zaw dinguh cih limgen mahmah uh hi. Innkuan lutpih thei nailo te cihnopna hi. Lai tawh huhna nanget sangin a thulut zaw omlo hi. Phone leh email ah na ngetsangin laimah tawh huhna ngenzaw in. Zumpi ten phone set ziau sangin laitawh huhna nget thulut sazaw hi. Nang sepsak dingin zong kituat zel in.

RSD LAMPAN ZAKSAKNA: Refugee Status Determination tawh kisai in thukhen omsa bangmah kilaihna om nai loin, gambelmi khat hihna ah ama thu a kicing tel khitciang, a lotheilo te pawlkhat kipiapia lai mah hi. Tua a hihman in na UN Card renew ciang na lutpihnopte khawng uh hong mawk tonpih kei un, interview kibawl man dihdih lo hi. Appointment tawh interview lopi in kuamah card kipia, lakik cihbang om lo hi.

UNHCR PAN CARD PIAK DING KIPHAL NON LO: Hih tawh kisai in UN ulian te kiang dotna kinei in UNHCR Deputy Officer Mr. Brian zan nitak lai kasim kha mah a, tu zingsang UN mai ka tunciang bangmah na om sam kei, ka lungdamna khat hi cih tawh kam honna hong nei hi. Hih dan thupen hihteng bek hilo gam tuamtuam ah hih bang om theizel mah hi. Hih thu hangin laupah ding zong hi kei, gamnei kumpite tawh na kimu ding hi ung. Ahih hang gambel ih hih leh gambelmi bangin om sawm ni.

SVP VAI TAWH KISAI UNHCR PAN SAPNA: 2015 July pan 2016 February kha sung teng a SVP/UNHCR zumpi pan in interview a ki reject teng khempeuh SMS tawh sapna na ngah kei uh leh UN zumpi ah 1st August -12th October 2016 sungteng na pai hamtang na dingun ko tangko uhhi.

UNHCR/IOM TEN A CIAHKIK NUAMTE VAIHAWM PIH :Hih pen leitung thukhun tawh kizui a kampau na khat hi-in, kuamah kisawl theih/kikham theih zong hilo, mimal khat ciat kizawhna tawh kalsuan ding a hihmanin gamthumna lengte tawh i roadmap a kibat hang i ma suan/ban/manawh gam in bang phattuamna hongpia zo/thei ding cih zong gelh masak ding thupi mahmah a, pawlkhat te a ding a lungdam huai mahmah a bat hang I tup/sawmna atung theilo te a ding UN te thusiam tawp na hi. Hihtawh kisai a lunglut khempeuh in FRIDAY ni sim-in UN ah kikan thei a, ciah dinga UN te thukim na neih khitciang zong na-ut kei kik leh zong kikhawl kik theilai hi. Kawlgam na tunciang ut kei kik maiing nacih hang UN ten Roadmap No.8 ah na file teng hong khak cip sak khin ta ahih manin kikhel thei nonlo ding hi.

Limtak ngaih sun in.Na kalsuanzia ding a nuai a No.1-9 bang a pai ta ding hi.

1.Ei thu tawh UN ah vagen ding

2.UN te tawh interview limtak bawl ding

3.Thu a kicing tak a hong kikup pih ding

4.UN vai nazawh khit ciang IOM hong ap phei ding

5.IOM ten vanleng letmat hong vaihawmsak ding

6.Lenkhiatma cidamna sitphat na om ding

7.Leng viauviau ding na lamkiatna ah

8.Na UN file ki khakcip ta ding

9.IOM /UNHCR te a kisambang hong vaihawmpih ding.

ZAM FREE CARD KINGAH TA :ZAM in kumsim in man ngen loin Zomi khua kipawlna makaipite leh pawl pi kem Pastor te ZAM zumah August 1st-31st sungteng

nisim 9:00am-6:00 pm kikal hunngahni khat peuhah ZAM Free Card nonglak na ding un ZAM zum pan zah takna lianpi tawh kong zasak uhhi. A theikha nailo a om leh MZCA,ZCMC leh kipawlna tuamtuam te pan na hilh sawnsak un.

AZANGH DING OM A HIH MANIN PIA ZAW:Malaysia Zomi Genvai kipawlna (ZSM)ah na kipawl naikei leh hong kipawl mengmeng in, tukum Malaysia leitang pan hong nusia Zomi luang (18) te sungah nang panpihna leh gaalna a piakhia/kihel nailo na na hihlam kiphawk in. Nisim in ZAM zum ah ZSM member sum ki pia thei hi. Malaysia ah aluangphum nuama hongkuan kuamah omlo hi. Na zat kuan ciang bekin pia kenla, a zangh ding om a hihman in pia zaw in. “God helps those who help themselves”

Hymns Worship Night :Zomi Tapidaw adingin a tul theilo Phatna late ahi ZBC Labu(Hymns) late tawh Pasian phatkhopna Worship night khatnei khawm nuam ihih manin nong kihel nading un itna tawh Kha zih min in kongsam uhhi.

Ani :July 31, 2016

Ahun :Nitak 5:00pm-8:00pm

Amun :IZCC Biakinn, Menara Putra Apartment, 1Floor, 15-1-5,

Lorong Tiongnam 5, 50350, Chowkit.

Paidan ding: KTM ongzui te’n Putra station, LRT hong zui te’n

PWTC, bus tawh hongpai te’n Chowkit bus stand ah tuak ding.

Contact :Pastor Haupi 011 176 01217, Sia Cin 012 661 0046, Upa Cinpi 0173791327

ZOLAI SIMBU :Zogam mipil, miliante laisinna bulpi Zolai Simbu Tanlang – Tanli dong leh namkimbu, Zolai gualhzia, Zolai Grammar tawh a kithuah laibu hoih mahmah khat RM 30 tawh ZAM zumpan kilei thei hi.

ZAM ZUMPAN LAIBU KINGAH TEng

1. Tutmun mikang pau

2. Eden ah ciah kik ni

3. Cope Centenary Jubilee

4. ZYA (Tina Jubili)

5. Lamlak Pulpit Laibuno

6. Zingsol

7. Bawa So Tae Sa Oat

Ngeina Van Tuamtuam KiLei thei :ZAM zum pan I ngeina vantuamtuam ahi Zopuan Design tuam tuam, Zoniik Design tuamtuam, Puanten, Puandum, Zodial(awh), Puanlaisan, Zokhi, Tanghciin, Khephiau, Zolu -khu, Zothungkuah, Zodial cih te akipan naupang puan tuamtuam te deihzahzah ki leithei hi.

RHB Insurance kilei thei Lai :ZAM zumpi ah ni sim zum hon hunsung khempeuh in RHB Insurance ki lei thei hi. Hih Health Insurance pen a deih khempeuh in kilei theilo a, UN Card neite bekin leithei hicih mang ngilh kei ni!Insurance leina dingin UN card copy, om na inn address cih te kisam hamtang hi.

ZAM ZUMPI PAN :ZAM card tawi member khat peuh peuh, kimat kihen a tuakte kihuh den hi. Damlo zato ki lak nuamte zoto vai tengah ki buaipih den hi.Nasep nei lote nasep ki zonsak den hi. UN maban a kisam theilo te, lai kigelhsak den hi. Na kisapna bangbang uh hong zasak un. I Zomi Zumpi ahi, ZAM zum pan ka hih theih tawp un hong panpih ding hi ung.

Zato na paiciang Address kisam :Hospital ahih keileh Clinic khat peuhpeuh napai ciangin tulai tak na omna Address kisam tawntung ahih manin, aki gingsa in omgige in. Address cihciang in avengmin bek hilo a, innKhan nambat, dawlbangzahna, lampi min leh pin code cihte hi a, natheih keileh na tui/mei bil te tungah en in. Na telcian zawhkei leh tua bill te khat keng pah in.

Kimat kihen na tuahkhak leh: ZAM member te kimat kihen na tuahkhak uh leh Sia Tuangpu: 016 254 4093, Sia Go Mang: 018 202 1216. Hih phone number te kem khol/lotngah in. A hun ciang zontawm sang hoih zaw kha ding hi.

Na UN Vai Nakan Nuam hiam? :Na UN vai lung himawhin kannop dotnop khat peuhpeuh nanei hiam? UN Department tuamtuam ah lai gelhsak nop naneih leh ZAM Member te adingin pekkhat zong mangenlo in ZAM zumpan lai ki gelhsak theiden hi.

ZAM member I cihpen ZAM Card bawlngei cihbek hilo in UN card neihkhit hanga renew/hingsak dente mem -ber hi den cihna hi. Refugee na kicih sam hang UN Card na neih naikei leh UN ten kami hong cithei tuan lohi. Tua a hihmanin Zomi na hih leh ZAM card bawl in. A mau pan pih na kisapnai kei leh huh zaw phot in.

“ZONU TONGLUAN” pan zaksakna

“ZONU TONGLUAN” laibu tawh kisai khathum ciang khat vei kihawm pen tukum sung aa dingin sum hong ki dong nailo phot ding hi. Maikum a kipan a la nuam te’n a nuai a nambat tawh nong zasak na dingun kong zasak uh hi.

1. Sm En Ngaih Lun -09 2540 38348,

2. Sm Cing Lam Lun -09 4210 60391

ZCF klang Camping Sapna :A tung a thu tawh kizuiin ZCF-Klang in Zomi sungpan Lai Siangtho bang aa pianthakna ngah nailote ading it-na tawh camp ki bawl ding a hihmanin a lunglut khempeuh ta ding ZAM Thupuak pan zeisu min tawh kong zawn uh hi.

Camp Lutni : 18 August, 2016

Camp Hunsung : 19-20 August

Amun : ZCF-Klang (Biakinn)

Lut man : RM 60 leh lamsap RM10

Contact Persons:

Rev.Tuang Sian Mung ‎(017 6082 757)

Upa Do Khan Khual ‎(017 249 2285)

Evan Nang Siam Mung ‎(016 607 4053)

Theih Ding: Nek leh dawn leh giah nang pawlpi pan ki vaihawm hi.

Tukal zatolam buaipih teng

1. Dai Teng Mung-Suangpi Khua, Salayang zato ah 3 veina

2. Sian Lun(Kapteel) leh Lian Cing te Pudu Clinic ah ki buai pih

3. Go Mun Pau(Thalmual) HUKM zato ah kibuai pih

Tukal THONGLAM BUAIPIH TENG

1. Pau Tung Thang(Maalsuangzang) Semenyih camp pan kawlgam ciah ding kibuai pih.

Sang Sia/Siama (1) kideih :Wangsa Maju Tadika nau pang sangah lai hilh kiva English or Malay pau athei Sia/ Siama (1) kideih hi. Sun ann vak ding hi. A lunglut te’n Sia Khuppi ‎016 383 8014 na hopih un.

OFFICE a sem DING KIDEIH :Office a sem ding ki deihhi.Computer tawh lai khen thei hi ding. Nasep tuam tuam zong kidong thei hi. Contact: Sia Khuppi ‎016 383 8014

Tzu Chi Clinic Numei nasep kisam :Tzu Chi Clinic ah numei nasem ding khat ki deih hi. Mikang, Malay leh Kawlpau sungpan namnih a pau thei hi ham tang ding hi

I Khuado pawi muakna leh Zomi khangnote sungah ki lawm takna a khansemsem nading deihna tawh i neih ahi Zomi League ah Football(Tukpeng) leh Volleyball om ding a hih manin biak piakna pawlpi zui-in ih kipum khatzia i Zomi pihte kiang lak khawm/hopsawn na pawi zong suak sak nuam ih hihi. Khang thak Zomi te Ngim na thak, thathak,gualzawhna thak te mu dingin lungsim thak tawh hong kalsuan ciat un. A hunzui in hong ki zasak toto ding hi.“Gualzawhna pen tualpi laizang pan hilo in, na lungsim pan hongkipan khia hizaw hi./…”

Note :: PDF tawh na simnop leh
Hih link >>> PDF File tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.

Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…

Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna Biakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh Zomi Daily website tungpan kongsuaksak zelzel uhhi.