Nang na lum in, kei tho ning ~ Peter Suumpi

Nang na lum in, kei tho ning ~ Peter Suumpi

“Tua kammal khat in tuni ciang dong ka lungtang sung ah khalumna hong pia zo lai hi …” TV broadcasting zum khat ah programe khat om hi. Tua programe pen numei mipi te tung pan “hong lungnuam sak penpen kammal khat”cih thulu tawh kisai in ngetna tawh kizui in vaihawmna ahi hi.

Hih bangdan vaihawmna om hi cih atangko khit uh asawt lo in amunmun pan mipi te in laikhak tampi te tua TV broadcasting zum ah hong khak ngei-ngai uh hi. Tua bang lai akikhak khempeuh lak pan atawpna ah “nang na lum in, kei tho ning” cih kammal in akhatna hong ngah hi.

“Nang na lum in, kei tho ning” cih kammal ii nung ah tangthu khat na om hi.

Akhangno lai nupa te pen akiten zawh uh asawt nailo in ta hong nei uh hi. Naucing ding mi cialzo zah dong dingin sum neilo uh ahihman in azi in inn nasep le naucin vaipuak hong la in apasal in nekledawn zong ding in sum thalawh in kuan khia hi.

Ahizong in tua ataneu uh pen amau ii lam-et bang in hong cidam hetlo hi. Aci eng zel, a awmbing zel in hong dam mawh mahmah hi. Azi zong sun tawh zan tawh manlah tak in tua adammawh anau uh khoi hi.

Tua atano uh hong cidam ding hi cih lam-etna tawh amau gel nupa pen khat le khat kimuanna, hansanna te hong kiguan kikkik uh hi. Nasepna pan hong ciah apasal in, innsung a lutma in athogawp asam te hong zun sitset in apuan te hoihtak silh sitset in agim mel mahmah amai te ki maitai sak tawm in agimlo bang in innkong hong kiu den hi. Azi in zong apasal kheging azak phet in agim atawlna teng sel in asamte hiatin kipuah sitset in maitai takin apasal na dawntuah den hi.

Nikhat ni ciang apasal ii thusim pen azi in hong thei hi. Ahizong in akhitui te amanlang in nul in amaitai sa mah in apasal kong khak hon in hong muak veve hi. Apasal ii gimna tawlna teng thei in ahehpih azi in zan in nau akah ciang bang zah takin amutnang zongin apasal phong ngamlo in amah guak in nau va khem sim zel hi.

Azi ii thusim teng apasal in atheih ciang in azi pen nidang sang in hong hehpih zaw in ngekbawl zaw hi. Zan ciang naupang akah lian leh amah mah hong thoto in azi kiang ah “nang na lum in, kei tho ning” ci in azi lumkiksak hi. Ata neu uh pen cidam lo ahihmah bang in zan simphial in hih kammal pen azi in za tawmtung pian hi.

TV programe avaihawm te in hih tangthu agen khit ciang in mipi te lakpan samkhang khin pitek le putek nih khut kilensa in hong dingto hi. Piteknu in khitui kicing sa in mipi te hong etkawm in “hih tangthu sung aa pasal pen amah hi. Ko ka kiten zawh uh tu in kum 58 phakhinta hi. Tua kammal pen in tuni ciang dong ka lungtang sung ah khalumna hong pai zo lai hi” ci in gen hi.

Piteknu ii kammal azak ciang in ha nei nawnlo putekpa zong hong nui hi. Mipi te ii biangah khitui te hong luang hi.

“Hong lungnuam sak pen kammal khat in” ih lungtang sung pan hong luangkhia itna man tawh gamtatna ahi hi. Tua bang itna man gamtatna khat in ki –itna te hong khangsak semsem hi. Leitung teng itna gimnam sak zo hi.

Nang hong lungnuam sak penpen kammal in bang hi ding hiam? (Gelh sin in)

Amah alungnuam sak penpen ding kammal khat ama tung na gen nai hiam? Peter Suumpi Source: greenland-book