Mi tawh kikholh na siamhiam? (1) ~ Hau Za Cin

Mi tawh kikholh na siamhiam? (1) ~ Hau Za Cin

Mi tawh kikholh na siam hiam? Nang thu bek deih vilvel mi na hi hiam? Nang thu ahih kei peuhmah leh a langpan, a nialcip, thu in a simvetlo pawl na hi hiam? Nang hong kidot kei peuhmah leh a heh pah te pawl na hi hiam? Siaji, Buji mun hong kipiakloh ciang, kuppih na hihloh ciang a lungkim ngeilo mi na hi hiam? Ahih kei leh mite ngaihsutna haihuai tawh kibang nangawn a sang siam, a telsiam mi na hizaw hiam? Mite tawh kikholh na siam hiam?

Mite tawh kikholhsiamna in nangma kizattheihna khangsak hi. Tua bang na hih kei leh nang hong lauh kihtakte bek tawh na kikhol thei dinga, tuate in zong nang hong kholhpih nuam taktak hilo in hong lauhman bek hikha ding hi; nang muhloh ah hong zahtaklo lai ding uh hi.

Midang khualna na neih ciangin mite tawh kikholhsiamna a kipanpah hi. Midang khualna nei vetlo a nangma angsung bek na khual pah leh midang tawh kikholhna a siamlo ding na hipah hi. Midang khualsiamna tawh mikholhsiamna na neih ding a kisinpah na hi a, midang khualsiamna cih ciang mite lungnoploh ding, mite nopsakloh ding khualna pan kipan hi. Na kampau pan hi in, na gamtat pan hita leh mite nopmawhna ding, mite kisuanlahna ding, mite hehna ding na kidoppah ding ahi hi. A thugen uh ngaihsak ding, a ngaihsutna uh theihsiampih ding, nang ngaihsutna bang ahih kei leh zong ‘ama ngaihsutna hi’ ciin theihsiampih ding kisam hi. Mite haksatna, mite lungsim nemna te theihsiampih in a nopmawhsak ding uh na khualsak mahmah ding ahi hi.

1. Mite thanemna leh minsiatna ding hih ngei kei in: Mi na khual ciangin aktui tambaih bangin dopbawl in. It bawl inla, a lungneuna ding uh, mite lakah a maizumna ding uh pholak ngei kei in. Mite lakah a om uh ciang mite in hihpa, hihnu tuapa in tuaci gen in tuaci mi hi ding hi acih khak ding kidawm in. A dik, a maan a theilo te in um ding uh a, amah in gencian ngam kei leh mite lak ah nuamsalo ding hi. Tua pen mikangte in ‘character assasination’ ci uh a, mite minsiatsakna, mite zumsakna, mualphosakna, maizumsakna, mite muhkhialhtheih dinga ahoihlohna lam khempeuh pulaksakna ahi hi. Mite cinlahna leh thanemnate pholaksak cihna hi. Hih bang hih ukmi na hih leh mite tawh na kikholhsiamna pen niam cihna hi.

2. Mite zahtakbawl in lawmbangin kikholhpih in: Mite zahtak ding na ut leh mite na zahtak kisam hi. Mi khat na zahtakbawl kei leh amau zong hong zahtakbawllo ding hi. Naupang khat na ngawn thusimloh bawl, zahpih, ko, gensia lecin hong zahtak cih thadah hong ngai theilo ding hi. A hai pen in zong kizahtakbawl theisiam a, a mawl pen in zong kizahtakbawl nuamsa in, a cinglo pen zong zahtakbawl leng thanuam hi. Zahtakbawl cih ciang zahtak taktak cihna hilo a, zahtakna nei kawm in kholhpih, zawhthawhlo, neubawl ningnianglo, thusimlolo cihna hi. Mihing i suah i khanna, i kipatna kibanglo ahih manin a neu pen, a zawngkhal pen, a hai pen nangawn in ki thupisim ding a ut, a deih, a lamen kihi ciat hi. Tua banga kikhualna mun ah nopna kipan hi.

3. Mite limtak bawl in: Mite limtak zindo in cih tawh kibang hi. Ahih kei leh mite huhnopna, panpihnopna takpi tawh sepsak in. Thupi bawl, seppih nuam, lamto nuam, domkang nuam takpi hi hang cih thei le uh mite in nuamsa in thalawp uh hi. Hong kinengniam nuam hi, hong ki minsia sak nuam hi cih mite lungsim ah a om khak ciang mite zong na hoihkim tuan samlo uh ahih manin thanem in lungduailo thei veve uh hi. A khankhiatna uh tawh kituak in mite siamna, theihna lunggulhna kibanglo hi.

Tuate telsiam in nang lunglut lam bek hong lunglutpih ding, nang hihnopte bek hong hihnuam dingin lamen kei in. Kimawl uk om dinga, kikholh uk om ding a, lasak uk om dinga, thupi takei leh kamkup uk om dinga, thu leh la khat pepeuh kinial bawl nuam a sa zong om ding hi. Kamnem tawh kikup nuam asa om dinga, kam khauh tawh puak phekphek nuam asa zong om ding hi. Kamdam leh kamnem mah mi kim in kizang leh nuamsa zaw uh hi. Tua dingin mite limtak bawl in. (zop lai ding) Hau Za Cin