India gamsung khuaneu khatah numei te Mobile Phone zatding kiphallo

India gamsung khuaneu khatah numei te Mobile Phone zatding kiphallo

India gamsung aom khuaneu khatah numei te khuasung vakna, khuasung mipi lakah Mobile Phone zatding kikham cih AFP pan kizasawn hi. Numei te Mobile Phone zatna panin pasal tetawh kithuza, kimu in thunung thuma tampi omthei cihi.

Tuahang in numei te leh pasal te innpualam ah baihtak, olno takin aki zopziauziau theihloh nadingin numei te innpualam ah Mobile Phone zat akikham cihi.

Tuabang thukhun athak akibawlna pen India gamsung aom Uttar Pradesh State sungah ahihi. Uttar Pradesh State, Madora akici khuaneu khatah numei te Mobile Phone zatding akikham hi a, tua khuasung mite pen avekpi phialin Muslim biakna azui vive ahi uhhi.

Tuahang in numei leh pasal zulhtakna aomloh nadingin “Numei te Public ah Mobile Phone zangtheiloding” cih thukham abawl uh hi a, azang akimuhleh Rupees 21,000 kigamding cimawk hi.

Rupees 21,000 pen khuaneu khuata aom te adingin mannei mahmah a, khatampi nasepciang bekin aki thalawhzo panding ahihi.

Local Police Chief Arun Kumar Singh kici in agenkhiatna ah Madora khuasung aom hausa, upa “Village Council” te’n numei te Mobile Phone zatding kham cih kaza uh cihi.

Ahi zongin tuabangin thukhun bawlpen Constitution tawh kituaklo “Against Constitution” ahih manin, Action ki lading hi ci’n genkhia hi.

Village Council te ngaihsutna ah nungakno pawlkhat in Mobile Phone zang uh a, tuapan in nulepa phallohpi khawngin pasal tawh kitaipih cihkhawng omzelzel cihi.

Tuaban ah numei tepen pasal tetawh aki zopna kiamtuamding, khakcipna namkhat hiding ahih manin aki vaihawm ci uhhi.

Human Rights leh Rights tuamtuam aci phadiak, aki neisak phadiak te’nbel hih thukhunpen diksa hetlo khamahding uhhi. Ahi zongin Mobile Phone aom khitzawh, aki zatkhitzawh nungak tangval kiheldan, kihodan pen baihtuak zawthammah hi. Facebook tungtawn in akithei akiteeng cihkhawng midang hilo, Zomi sung bekbek ahzong tamnawnlo khading hi.

Tulai khangthak te’n Technology pen zatsiamleng metna hi a, zatsiam keileng supna ahihi. ZD Sawltak #zomidaily