AirAsia vanleng sungah Chinese pasal khatin zatep ahih manin kiman

AirAsia vanleng sungah Chinese pasal khatin zatep ahih manin kiman

Malaysia, Kuala Lumpur khuapi panin Sabah, Tawau City zuanin aleng AirAsia vanleng sungah pasal khatin zatep ahih manin kiman cih Harian Metro pan kiza hi. Tua akimanpa pen China gampanin Malaysia gamsung ah khualzin in ahawhpak Tourist khat hi a, kum 41 aphakhin “Chinese National” khat ahihi.

China, Yunnan City panin alawmte Chinese National vive mi 10 tawh Malaysia ah ahawh, azinpak uh hi a, Semporna, Pom Pom Island ah zannih giakding in azin uh ahihi.

Zanni Wednesday ni in Kuala Lumpur Airport panin Tawau Airport nai 3 sung AirAsia vanlengtawh alen laitak, vanlengsung aom dailenbuk “Aircraft Lavatory” sungah lutin, zatepding in kipan hi. Cigarette zatep panin meikhu apusuahkhiat ciangin Smoke Alarm te gingpah ziahziah hi.

Tuaciang in vanlenghawl Captain in vanleng sungah nasem Cabin Crew te kiangah Lavatory sung asitding in sawlpah hi. Tuaciang in Chinese gammi khat dailenbuk sungah zatep in aom aki mukhia ahihi.

Vanleng Captain inzong hih buaina vaitawh kisai in Tawau Civil Aviation Department te kiangah zasakpah hi. Tua AirAsia vanleng pen Tawau Airport ah 1:47pm hunin buaina omlo in tuthei uh a, dailenbuk sungah zateppa pen Airport Police te’n mansuakpah uhhi.

Palik thuneipi ahi District police chief Assistant Commissioner Fadil Marsus inzong hih buaina vaitawh kisai in thupiang pen atakpimah hi a, zatep akikham himahleh vanleng sungah zatep teitei ahih manin, “Section 100 of the Civil Aviation Regulations 2016” thukhun tawh thukibawl hi ci’n genkhia hi.

Vanleng sungah zatep pen akikhamcip hi a, atep teitei tepen RM2500 liausum kiliau sakthei, bekthamlo thongzong kumkhatbang ki kiasakthei hi.

Abeisa nungkum August khasung inzong Iran gammi khat vanleng sungah zatep ahih manin, RM2500 kiliausak in, thongzong ni 2 sung akiading in Sepang magistrate’s court te’n thupia uhhi. Tuazong AirAsia te vanleng sungmah ah hi a, Tehran City panin Kuala Lumpur City azuat laitak, vanleng sungah zatep ahih manin, aki liausak ahihi.

More: Gamdang mite painopna Thai tuipinawl te ah zatep kikhamding

Zatep te’n azuihding thukhun leh thukham pen tam mahmahkhin himahleh kibehlap totolai hi. Vanleng sungbek thamlo, khuasung mipilak, Shopping Mall te akipan pak huan “Park” cihte nangawn ah zatep pen akikham vive hizawta hi. Zatep theite’n pilvanghuai a, akidekzawh uhleh amau cidam nadingin hoihzaw kankanlai hi. Apil asiampen, zalianpen, sumhaupen, melhoihpen nahiphial zongin za natepleh hongthuaklah mahmah pawlkhat omthei cih phawkgige in. Huih nadiksim in na naksung pan apusuakkhia huihte pen zagimnam khauhmahmah a, midangdang genloh na tangek te’n hong thuaklah phadiakding cih phawk in…. Sawltak #zomidaily