Topa ompihna tawh Zomi ading ZAM mapangna lawhcing toto
Khampat khuami a hi ih sanggamnu Ciin Lam Mang@Lalam pen tuma kum 2/3 laipek in a nasepna Kepong-veng pan in nasep a ciahna pan motor cycle in na phukha in a khe taklam kitan ban ah khua zong phawklo in Selayang zatopi ah nipi kalkhat valbang lum himah taleh a don ding, avaan ding sanggam tanau kuamah neilo a hihman in a neihsa sum leh paai in a kibawlna ding cinzolo ahihmanin zato pan tuakkhia in kawlte nupi khat in hehpih huaisa in tawlpi khat na kepsak hi.
Tua bangteng tawh hunte hongbei toto in a khe kibawlzolo, mi pangbel in a na om kawikawi khat hi aa hehpih huai mahmah hi. Nungkum 2018 kumsungin Zomite ihzumpi a hi ZAM tawh contact kingah aa, zato tuamtuamte ah ki buaipihpah in a UN zong (mangsak, a file no. zong thei nwn lo) UN Card tawilo in kum2 valbang na om cip hi aa, UN zong hoihtakin kivansak kik theipah hi. UN Card zong hong ngahkik hi.
Sanggamnu a khepen hong sawtlua ta a hihman in Dr. te in Operation bawlleng Ringgit tul 30-40 bang bei ding hong cihtak ciangin zumpan in sponsor ki zonsak pah aa, tuma kum 3/4 a kipan ZOMI te hong vei mahmah ahi, Pasian a zahtak mahmah gammite (Sen) a hi, Ms.Eliza ki hopih sakpah in aman zong Pasian azahtakna leh Zomite hong vei na hangin sanggamnu khe tawh kisai Operation bawlna ding vai khempeuh tavuan honglaksak pah hi. Topan lem asak leh a sawtlo in sanggam nu khe pen ki bawlkik ding hong hita hi.Hihbang a ZOMI te hongvei Ms.Eliza mahmah zong Topan thupha hongpiaksak tahen. Sanggamnu Lalam pen nung Zomi bup crusade aa ZBCA (USA)pawlpi te in damlo cimawh te ading huhna apiak sungpan khat in aki hel a hihi.
MAPANG KHAWM NI ZOMI KHUADO 2019
Zomi Khuado pawi bawl ding tawh kisai in 22 July 2019 (Wednesday) ni-in ZAM zum ah thudotpi te tawh kikup khopna kinei in, Zomi Ngeina Khuado Pawi limtak bawl dingin thukimna kinei hi. A mun dingin Zomite Khuado Hall, Chin Woo Stadium mah ki kipsak hi. Khuado pawi nasiatak a bawlna dingin sum leh pai tampi hong kisam ahih manin muanna leh lametna lianpi tawh Khuado Committee in anuai a bangin mapang khawm dingin kong zawn uh hi.
- 1. Khua kipawlna pan RM200 pan a tungsiah,
- 2. Biakna pawlpi khat ciang RM300 pan a tungsiah leh
- 3. Khua kipawlna leh Pawlpi panbek hilo in, mimal in zong ma ih pan khop na dingin kong ngen uh hi. Khuado ni dingin 15 October 2019 (Tuesday) ni dingin kikip sak hi.
Zomi te kumkhen Khuado pawi ah Malaysia leitang tung a om Zomite khempeuh khatzong pelemlo a, ih kihel kim theih nading deihna tawh kong theikhol sak uh hi. Tuasung ah Zomite maban ding thugenna, Zomi Idol Malaysia 2018, Laam tuamtuam, lasaknate a kipan kivakna/talent show tuamtuam zong om ding a hihmanin khuahun sia leh thusia tuamtuam te tawh kipelh nadingin thungen ciatni.
Zomi Khuado pawipi muakna in ih neihngei sa mah bangin in Zomi League kimawlna zong om ding hi. Tua ban ah tukum in Gym kimawl te in Body Building Competition kidemna zong om ding hi. By: Khuado Committee 2019
ZOMI KHUADO 2019 COMMITTEE TENG
- 1. President : Rev. Dai Sim Mang
- 2. Vice President 1 : Sia Hau Thang
- 3. Vice-President 2 : Rev. Thang Do Khen
- 4. Vice President 3 : Rev. Peter Dal Khan Lian
- 5. Secretary : Sia Kap Za Khup
- 6. Joint-Secretary : Rev. Gin Khan En
- 7. Treasurer : Sia Joseph Tuan Sawm Tuang
- 8. Accountant : Sia Simon Pau Khua Muan Lal
- 9. Accountant 1 : Pa Thang Suan Piang
- 10. Auditor : Rev. Thang Za Cin
- 11. Auditor 1 : Rev. En Cin Pau
MEMBERS
- 1. Rev. Khen Za Dal 6. Sia Thang Zo Mung
- 2. Pa Thang Za Khai 7. Sia Kam Sian Mung
- 3. Rev. Thawng Khan Sut 8. Sia Mamang
- 4. Rev. Pau Sian Piang 9. Sm Cing San Huai
- 5. Rev. Ngin Khat Thang
ZOMI KHUADO 2019 ADING PANPIH NA HONG PIA SA TE
- 1. Sing Za Cin (Mualbeem) RM100
- 2. Zomi State Fund International, ZSF (I) RM200
ZOMI IDOL
Kumsim ih neih ngeisa om mah bangin Zomi Idol zong tukum kinei dinga, hih Zomi Idol tawh kisai in hong makaih sak dingin
- (1) Rev. Thawng Khan Sut – 016 6443 011
- (2) Rev. Gin Khan En – 017 3342 760
- (3) Pa Thapiang – 016 2543 352
- (4) Sia Kam Sian Mung – 018 312 2957
te muanna tak tawh kiseh hi. Zomi Idol a lut nuam te in min sazian zong kipia pah thei ding hi. Kidem ding ni leh a thu akicing zaw in atel nuamtein a tungaa siate kiang ah kidong thei ding hi.
ZOMI LEAGUE
Ih bawl ngei a om mah bangin Zomi League 2019 zong nopci tak in kibawl ding hi. Tukum Zomi League pen kuanpi kimawl loin Futsal kimawl ding in kikip sak hi. Zomi League leh Body Building Competitions te hong makaih dingin Sport Committee zong vai hawm pah a, a nuai a bang ahi hi.
SPORT COMMITTEE TENG
- 1. Rev. Pau Sian Piang – 016 3185 296
- 2. Rev. Thang Za Cin – 012 661 0046
- 3. Sia Kap Za Khup – 016 383 8014
- 4. Sia Thang Zo Mung – 017 663 6087
- 5. Sia Joseph Tuan Sawm Tuang – 016 254 4093
- 6. Sia Kam Sian Mung – 018 312 2957
- 7. Sia Mamang – 018 231 1365
- 8. Sm Cing San Huai – 017 282 4801
Zomi League Futsal tawh kisai min sazian pia nuamte in kipia thei ta a, a nunung pen September 08, 2019 ni ciang kisang ding hi. Lutman pen team khat ciangin RM 500 hi ding a, Deposit RM 200 hi ding hi. Kimawl ni ding pen September 16, 23, 30, 2019 nite hi ding hi. Dotnop tuam tuam te zong kidong thei ding hi.
BODY BUILDING COMPETITIONS ZONG OM DING
Zomi khangnote sungah Gym kimawlte adingin zong Body Building Competitions om dinga, tua sungah a kihel nuam ih om leh zong min sazian kipia thei pah ding hi. Khuado ni ma in kidem khol ding a, pahtawina te pen Khuado ni in mipi mai ah kipia ding hi. Hih Body Building Competitions vai a lunglut te in a tunga Sport Committee te tungah min sazian kipia thei ding hi.
TABLE TENNIS KIDEMNA OM DING
Zomi Khuado pawi muakna in Table Tennis kimawlna zong om ding a, a lunglut te in Sport Committee te tung ah sazian kipia thei ding hi. Lutman pen mi khat ciangin RM100 ta hi ding a, mimal kidemna hi ding hi. A kidem nuam te in August 31, 2019 ni a nunung pen in min sazian kipia thei ding hi. Kimawlni ding pen September 02, 2019 ni hi ding hi.
ZAM FREE CARD KINGAH TA
ZAM in kumsim a man ngenloin Malaysia Zomi khua ki pawlna makaipite, ZEC sangah sia asem sangsia te leh pawlpi kem Pastor te’n ZAM zum ah August 1st-31st sungteng nisim 9:00AM-6:00PM kikal hunngah ni khatpeuh ah ZAM Free Card nong bawlna dingun ZAM zum pan zahtakna lianpi tawh kong zasak uhhi. A thei kha nailo a om leh MZCA, ZCMC leh kipawlna tuamtuam te pan nahilh sawnsak un.
ZAM ZUM AH HONG HAWH
BAG pawlpi ah Pasian nasem ahi Sia Hau Lam Tuang@Hau in Malaysia gam ah hong hawh sung in Zomite a it aveina tawh kizui-in ZAM zum ah hong hawh in thapiakna leh thungetsakna hong nei ahih manin kilungdam mahmah hi. Topa’n siapa nuntakna hong zang semsem tahen.
ZAM ZUM AH HONG HAWH
Tedim Theological College ah a sem Rev. Dr. Pau Suan Kam in Malaysia gam ah hong hawh sungin Zomite a it a veina tawh kizui in ZAM zum ah hong hawh in thapiakna leh thungetsakna hong nei ahih manin kilungdam mahmah hi. Topa’n siapa nuntakna hong hong zang semsem lai tahen.
DAHPIHNA PULAKNA
Zonuamzang khuami, Gualnam beh Pa Pum Za Biak leh Nu Niang Ngaih Luan te tapa Hau Sian Khai in 16 August 2019 ni-in a nasepna Muar pan in hong nusia hi. ZAM/ZSM member a hihna tawh kizui in zum vai om teng kivan sak a, a vai teng a sian ciangin kivui ni ding kiza sak kik ding hi. ZAM/ZSM pan in zong a dah akap te tawh kibangin dahpihna I pulak khia hi.
WELCOME TO ZAM
Kawlgam, Vaigam, tuipigal leh gam tuamtuam pan Malaysia ah hong zin Zomi makai te’n Zomi zumpi ahi Zomi Association of Malaysia(ZAM) ah nong hawh/phak hamtang in thapiakna leh idea tuamtuam piakna nongneih na dingun kong zawn phapha uhhi.
ZAM ZUM AH KILEI THEI
ZAM zumpi ah I ngeina van tuamtuam ahi Zopuan Design tuamtuam, Zoniik Design tuamtuam, Puanten, Puandum, Zodial(Silk), Puanlaisan, Zokhi, Tanghciin, Khep -hiau, Zolukhu, Zothungkuah, Zodial cihte akipan naupang puan tuamtuamte deih zahzah kilei thei hi. Tua bek loin khui tuamtuam leh anuai a laibu te zong kilei thei hi.
PILVANG TAK IN OM SAWM NI : Ih omna Malaysia gam ah nisim phial mah in amun mun ah kimat kihen om thei den ahihmanin ei lam pan zong kidawp mahmah ding I kizasak phapha hi. Hidan in kimat kihennate hoih tak etphatna I neih ciangin atamzaw pen I vakna leh I kim I pamte in hong thuaklah in zum ah hong khiatna tawh kiman kitam zaw hi. Hidan dinmun I tuak loh nadingin ei mahmah zong I om dan I khawldan te a kipan I pilvang ding kisam mahmah hi. Ei suaktakna in midang te anawngkaisak ahihloh ding ngaihsut huai semsem hi.
Malaysia gam sungah I om sungin kipawlna khat limlim ah hoihtak I kihel ding, Pawlpi khat limlim ah hoihtak member I lut ding leh I khua kipawlnate hoihtak kancian in kipawlkhop ding thupi mahmah a, tua dan I kipawl hamtang dingin zong I kihan thawn pha pha hi.
Malaysia om Zomipih a kuamaciat I omna gam huih nun zia tawh kizui-in kidawm ciatni cih hong zasak pha pha ung. Kiim leh pam a om mite in hong muh khialh loh dingin I om dan I khawldante kikem siam kawmsa in om ciatni. Vai thupi mahmah lobuang zong vakvak kei zaw leng hoih zaw ding hi. Grab tawh na vak leh zong na tuan ding motor hawlte hoihtak teelsiam lecin nang ading hoih pen dinghi. A diadiakin mitamna munte ah tam vak kei leng ei ading hoih pen zaw ding hi. Azenzen in kimat kihenna khat natuak leh ZAM zum ah hong zasak pah in
ZATO LAM BUAIPIH TENG
- 1. Thang Hau Dal (Suangpi) Klang zato ah
- 2. Ciin Lam Mang (Khampat) Seminyak ah kibuai pih
- 3. Dal Sian Muan (Vangteh) UN laidal kingah pih
ZATO LAM TAWH KISAI : Zato lam tawh kisaiin vai khat peuh na neih leh ZAM zum ah hong ko in. Nang a dingin ZAM palai te kiging sa in om den uh hi. Contact :Sia Mungpi 018 3122 957
THONG LAM BUAIPIH TENG
- 1. Thang Sian Khual 15 August 2019 ni-in Oparasi tawh kiman in palik zum ah kikan sak thei.
- 2. En Muan Khai (Laaitui) Punceh Alam ah kimuh pih
- 3. Cin Deih Piang (Laaitui) Punceh Alam ah kimuh pih
Tulaitak khuahun hoihlo kimat kihen tam mahmah ahih manin vaksuk vaktohnate ah kidopsiam ni. Deihloh pen in kimatna khat na tuak leh ZAM palaite hong ko pah in.
KIMAT KIHEN NA TUAK LEH :Zomite sungah kimat ki hen natuak zenzen leh hih phone no. te ah na hopih pah in. Nang adingin atawntung in kigingsain om den uh hi.
- Sia Tuang Pu : 016 254 4093
- Sia Zo Mung : 017 663 6087
- Sia Maa Mang : 018 231 1365
- ZAM Hotline : 016 293 9027
NASEP TAWH KISAI :Zomi nasep neilote in nasep tuamtuam om hi. A lunglut leh dot nop aneite in Sia Maa Mang : 018 231 1365
LUNGDAM KOHNA
1. Evan Thang Sian Mung (Kapteel) RM30
Panpihna hongpia khempeuh tungah genzawhloh lungdamna lianpi ZAM pan kong tangko uhhi. Hi danin I pan khopnate hang in tuni dong a kalsuan zo I hihi. Topa’n Zomite adingin mapang zo semsem dingin thupha hong pia tahen.
Comment piaknop aomleh...