USA gamsung Oregon State, Portland khua ah ih sanggamte nih Motor Accident in hongnusia, aluanghawm zong kivui khinnailo in, tu’n adangkhat in tua khuasungpan mahin tuni hongnusia cih Tua Mung (FB) tungpan ihzak leuleu ciangin ihdah mahmahzel hi.
Tua a hong nutsiatbeh pen Tg. Langh Sawm Kim hi a, kum 37 phakhinpan hi. Akham khualui pen Heilei hi in, Pa Zel Za Cin tapa ahihi.
Hong nutsiatna ahangpen sunglam natna, sin leh kal natna cihte nei ahih manin, tua natnate tawh Adventist Hospital, Portland Oregon panin hongnusia ahihi.
Sanggampa Langh Sawm Kim pen Zomi Bethel Church Portland Oregon ah akihel pawlpi member khat ahihi. Ama ii luanghawm pen Wednesday 03 August 2016 kivui theipahding cihzong Tua Mung (FB) tungpan kizakbeh hi.
Sihvui hunbawlna Funeral Service pen Omega Funeral Home ah 11m in kineiding a, hun mankhit ciangin aluanghawm pen Forest Lawn Cemetery ah 2pm in lei ah tuhkikna keineiding hi.
Motor Accident tawh hongnusia sanggamte nihlak ah Peter Lianpi ii luanghawm vaitawh kisaizong zumvai, hanvai teng lemkhinta ahih manin, asawtlo in ki vuitheipahding cih Francis Khampi tungpan kiza hi.
Portland khuasung aom ih sanggam 3 te luanghawm teng lungkimhuai takin ih vuitheih nading in thungetna ah phawkciat ni.
Tuaban ah Singapore ahzong Zomi khatmah in hongnusia hikawikawi mawkin, Nu Piang Ngaih Don ii luangvai, zumvai khempeuh zong nawngkaina aomloh nading thungetna mah kisam hi. ZD Sawltak #zomidaily
Comment piaknop aomleh...