Mangpha Pa Thang Khan Dal, Thatmun beh, Kum (44)

USA gam, Pennsylvania State, Philadelphia khuapi a teng Pa Thang Khan Dal  Kum 44 (Thatmun beh) in abeisa October 11, 2016 ni zingsanglam nai 5:40 AM hunin Philadelphia khuapi sunga om Mercy Fitzerald Hospital Zatopi panin mual ong liamsanta cihthu izakmanin Zomi Innkuan USA kipawlna in nakpitakin kidahpih, ki lainatpih hi.

Pa Thang Khan Dal pen Zogam, Tedim uksung, Khuasak khuami Pu Cin Pau leh Pi Kim Go Cing ten ta 7 a neihna sung uhah a upapen zom hi-in a it mahmah a zi  Nu Khup Za Niang, a tapa Tg. Pau Khan Khai, tanu Lia Cing San Nuam, tapa Tg. Thang Lam Mung te tawh nuntakhuasakna anuamzawding lunggulhna tawh abeisa 2009 kumin USA ongtung uh ahihi.

Pa Thang Khan Dal te innkuanpen Philadelphia khuapi bulphuh Zomite kipawlkhopna Zomi Innkuan Philadelphia kipawlna ah  pawlmi kiciankhat leh USA gambup Zomite sihnavaiah luangkiphamnadinga kiphuankhia ZIUSA Genvai kipawlnaah Active member khat ahihna uhtawh kizui-in  ZIUSA Genvai thukhun ombangin Pa Thang Khan Dal pen Zomi Innkuan USA kipawlna in USD 10,000.00 (Tulsawm) luangphamnadingin kipiakhiadinga Paakkual khattawhzong Mangphakhakna kinei dinghi.  Hih akipiakkhia luangphamna sumtepen USA gamsung muntuamtuampana ZIUSA Genvai thukhunpom pawlmi 8,000 valtekiangpana ongkhakkhop uh sumte ahihmanin Vaphual lungtang neia ZIUSA Genvai ah ma ongpangkhawm Zomipih khempeuhtungah idahna ilunglenna kawmkalpanin lungdamna lianpi iko hi.

I it mahmah Pa Thang Khan Dal tawh a nunungpen hunzatkhopding pen ongtungding October 15, 2016 (Saturday) ni zingsang nai 9:00 AM to 10:30 AM hunin Marvil Funeral Home, 1110 Main Street, Darby, PA 19023 ah luangetna/Viewing/Visiting hun hidinga 10:30 AM ~ 12:00 kikal PMCC Pawlpite makaihna tawh a nunungpen hehnep hunbawlna tua mun mahah kineiding hi. tuakhitciang 12:00 PM hunin Mt Zion Cemetery, 1400 Springfield Rd, Collingdale, PA 19023 ah daitansakna/Vuina kineidinghi.

I it mahmah Pa Dal ongnusiatna hanga adah akap, alunglengkhuangai pianpih sanggam laizomteng leh khuapihtuipih tanaumeltheih akuamapeuh adiakin a nusiat a itmahmah azi Nu Khup Za Niang leh a tano 3 te tungah Meigong tagahte a nusia ngeilo, a maute pasal/Pa dinmun ah a pangden ibiak Vanglian Pasian khasiangtho in aluang khituite ong nulsakhenla lungnoptawldamna ongguatsak kimciat tahen cih Zomi Innkuan USA kipawlna in thu kongngetpih uhhi.

Dahpihna lianpitawh,

Executive Committee
Zomi Innkuan USA, Inc.
October 14, 2016