Clinton te nupa in atanu House of Representatives tuhsaksawm

Clinton te nupa in atanu House of Representatives tuhsaksawm

Nov. 11, 2016: Hillary in US President kiteelna a lelh hangin mai lam hun ciangin ama’ zalaih thei ding geelna na nei hi. New York City Congressional District ah kum 79 mi, Democrats Nita Lowey in pensen (retire) lak sawm ta ahih manin New York City 17th Congressional District ah Nita Lowey’ za laih dingin Hillary leh Bill Clinton ten a tanu uh, kum 36 mi, Chelsea Clinton pen US House of Representatives tutna tuhsak sawm uh hi.

Nita Lowey in US House zum ah kum 30 na sem khin zo a, Democrats policiante lakah a kizahtak mahmah pawl hi a, tu-in pensen lak sawm ta hi ci-in New York Post in suaksak hi.

Clintonte nupa in US House of Representative a tanu in a tuh theihna dingin August kha-in Chappaqua kiim-a amau teenna (primary residence) kizom lian-a om inn khat Chelsea Clinton leh a pasal leh a tate gel uh – Charlotte leh Aidan’ teenna dingin $1.16 million na leisak uh a, a ngian teng uh tawh mop ding na kithawi panpan ta uh hi. Chelsea pen tu lianin a teenna bit leh a vote sazian sunga a min kikhumna pen Manhattan hi a, Nita Lowey’ tutna a laih/tuh theihna dingin hih a inn thak Chappaqua kiim-ah phalna tawh teen theihna (legal residence) a neih masak ding kisam ahih manin a nu leh pa’n hih bangin a vaihawmsak ahi hi.

Hillary in Presidential kiteelna ah guallelhna a ngah manin amah gumte pawl a kaihkhop kik theihna (regroup) ding uh hun bang tan hiam lut ding a, Clinton brand kici bawl ding nasia takin hanciam hi ci-in source report kisuaksak hi. A beisa hunin Chelsea pen Clinton Foundation leh vote zonna (campaign trail) ah kinak golh/bual mahmah a, a nu’ sulnung teng nak zuih mahmah hi.

Hillary in bel President ngah leh Chelsea politics ah kibual dingin phal lo hi kici hi. Ahih hangin US President kiteelna ah mipite vote (popular vote kici) tam a ngah zawk hangin Trump in Electoral vote tawh zo kiau se ahih manin Hillary in a sung natna a dam theihna dingin a tanu politics ah kaih lut sawm ta hih tuak hi.

#Hillary gumte adingin hih pen thu hoih ahi hi. President, Senate leh House of Representatives ah Japan’ gal bangin na guallelh dikdek hangun ama za laih ding khat hong kipan kik ding ahih manin lungkia loin tha na pia ziahziah pah un. A nu leh pa’ ngian hong la khawm leh khauh mahmah kha ding hi. 😛 -The Hindu/ Thang Khan Lian