Mipi mai ah Thugensiamna (Part 3) ~ AS Thangbawk

Mipi mai ah Thugensiamna (Part 3) ~ AS Thangbawk

21. Na thulu (topic) ding hoihtak telsiam in.

Na topic tungtawn in dotna hong kidongleh buai ding na hihmanin na theihtel mahmah, na tuahkhak thute teelsawm in. Thulu teelsiamna pen thugen siamminthangte lawhcinna thusim khat a hihi.

22. Na tupna thei in.

Na thugenna hangin na tupna, na deihna kiteltak in thei in. Mi kilemsak ding maw, thapia ding maw, nang deihna lam ah a lungsim laksak ding maw tua ahihkeileh lungdamsak ding hi te theitel in. Mi kilemsak ding na hihleh ‘ko’ cihtepawl ‘thumaan, thumaanlo’ cihte pawl tamzat kei in. Na tupna en kawm in thugen in. Thugen khempeuhlakah thapiakna a baihpen pawl a hihi. Gamtatkikhelna dingaa thugen zopen thugen minthang te lak nangawn ah tam hetlo hi.

23. Bulphuh khat tungah gamtangin.

Na thugenkhempeuh (ciamnuih na gente zong) na deihna khat tungah ki ngasak in. Na puansilh dan, na vanzat leh hong huhding powerpoit khempeuh luanzia khat ah a luan ding thupi hi.

24. Mite hong ciapteh theih ding kammal nusiat in.

Obama in thu a genciang kammal khat tamveipi zang aa tua in mi lungsim la deuh se hi. Gtn: ‘I sepkhop leh ih gamkhangto ding hi’. ‘I sepkhop leh ki itna hong khang ding hi’. ‘Ki thutuak in i sepkhop leh ih minam i lamsangzo ding hi. ‘Ki lungtuakin i sepkhop nakleh gualzawhna i mai ah om hi’ cihbangin ‘sepkhopna’ (a bulphuh, topic) genphapha aa tua in mite zo mahmah hi.

25. Na thugen ding outline (thulu neuneu) la hamtang in.

Minute 7 sung topic no khat zawhsawm in. Hitheileh minute 45 val thu gen se kei in. Topic khat a’ding outline 4-5 val hisak kei in. Na thupatna leh thukhupna tawh a vek in minute 45 sung zawhsawm lel in. Thu tampi i genhangin a ciamteh te ciapteh theih tamlua lo cih thei in.

26. Kisinkhol in.

Limlangmai a hihkeileh na lawmte mai ah kisin masa in. Hipen a kipancil dingte cihna a hihi. A gengen khin te kisim kullo a, tuahkhakna pan pilna lak ding hita hi.

27. Na lungsim hong sukha penmah gen in.

Thu na gen dingciangin na ukmahmah thu, na lungsim sungah na lawpmahmah thu te leh na theihtel mahmah thute bek mipi mai ah gen in. Nang uk bek hilo in midangte nuntakna ah phattuamna a piapahlian thei ding thute gen sawm in. Na thugen sungah upna nei in. Na upphatlo thute na genhangin mi kilhel ngeilo ding uh hi.

28. Lau kei in.

Mipi maiah thugen hun tampi a neikhin mite nangawn in zong mipi maiah kimuanlohna a tawm atam neiden hicih phawk in. Banghanghiamcihleh thugen mi peuhmah in a ka thugen in mite lungsim a bunzo taktak dingmahhiam cih a ngaihsutloh a pahmawh thu a hihi.

29. Na thanemna gen kei in.

Mipi mai ah thu i genciangin kampauna, mitmuhna leh awsuahna hih thuthum tawh thupitak in midangte a zol, a kizom i hihi. Ih lungsim sungah kimuanlahna i neihciangin mipi te in tua lungsim hong theihpih khinkhian uh hi. Ei’n tuabehlap in ih kamtawh i thanemna i pulakkhiat ciangin mipi te in i thugen sangsam zo taktak nawnlo uh hi. A lungsim uh ki lawngkha taktak zo nawnlo hi.

30. Lungkia kei in.

Lungsim sungah kisinna leh mipi mai ah gentaktakna pen upmawhna sangin kilamdang zaw hi. Ih lungsim sungah i gendingzia, i gending thute zaknoptak leh khauhpai takin kigen thei aa a hizongin a taktak ciangin tuabang hizo taktak lo hi.
Na kisinna video kila inla enkik in. Limlang mah ah zong suakta tak in na kisin thei hi. Kampau nasiam leh leitung kongkhak na mai ah hong ki hong ziahziah ding hi. Lungkia kei in. (azom Part 4 nasimsuak vemaw) AS Thangbawk