I Zolai Simbu

I Zolai Simbu ~ Thomas Mung

Zomite Pasian hong piaksa giat: Zolai i neih zawh kum 100 cing ta, Zolai Simbu i neih zawh kum 50 a cing ding hi ta, Zosuan ta ten Zolai Simbu i zat khop diamdiam zawh kum 50 a cing hi ta hi.

Taangpi Taangta in i neihkhop i Zolai Simbu kepsiam tek ni. Zahtak tek ni. I om khinkhian sa i Zolai Simbu va simmawh bawl kei ni. Va zuak zuak kha kei ni. Kipawlna khat, Party khat ii minthan nopna, min deih na hang peuh tawh i Zolai Simbu va khoih kha kei ni, va mangthansak kei ni.

Kawl te hong khenthaangna, hong kheemna Census peuh paulam in i minam sung khenthang kei ni. Kum 50 kiim apha sa Taangthu mungpi khat ni 1-2 tawh kihel theilo, kilaih thei ngei lo ding hi. Taagnthu in thu gen ahi hi.

Makai gina lo khat leh nih hang i minam min siat lawh thei ahi hi. Makai akici ten i mipi te siatna lam tawh i makaih khak leh ei ma lutung hong tung kik thei ding cih phawk huai hi. Mipi te i makaih khialh leh i minambup in guam sung kitung thei dingaa kikiamsuak suk ding ahi hi. I minam hong makaih ding makai apil, a tei, apicing, mite tawh akikhawl thei makai hoih i neih ding Pasian in hong siam ta hen.

Pu Zo pan apiang Zosuan tate kitawt kisel hun bei ta aa, kipumkhat hun leh sepkhop ding hun hi ta hi. I minam sungah thu khat la khat aom teh lungduai takin kikumkhawm diamdiam in thu vaihawm khop hun ta hi. Makai akici ten ngaihsun tek ni. Z = Zomite Hanlung ciam khangto diam!! Thomas Mung

Zolai Simbu Vai

UZO (Myanmar) in March 5, 2020 nimit tawh gambup pilna lam vuanzipa’ tung ah ‘Zolai Simbu’ tawh kisai lai akhakna uh tawh kisai in mipi in na lung uh na duaisak lai phot un cih hong thuum ing. Asawtlo in thu hoih za ding in lam-etna lianpi ihnei hi.

Ki-it kilemna mah athupi hi a, thukhual zawding ih kidem ding ahi hi. Na khatpeuh thagum suang pahpah lo in thudam tawh lungduai tak in sem leng hoihzaw hi.

Mipi in tawm na ngaklai un. Pianpih laizom teng kitot kisiat ding hi zenzen lo hi. Lungdam,
Mung Laan Thang (Secretary, ZYA-Tonzang)