USA pan hawlkhiat athuak Maxico gammi khat amahleh amah kithatlum

USA pan hawlkhiat athuak Maxico gammi khat amahleh amah kithatlum

USA gamsung aom Mexican khat agam ah kipuakkik ahih manin, Mexico gamah aki puakkik khitzawh nailang khitdeuh ciangin amahleh amah ki thatlum cih BBC pan kiza hi. Tuapa minpen Guadalupe Olivas Valencia kici a, kum 45 phakhin hi. US gamsung panin hawlkhiatna Deportation angah pen athumveina hita ci a, tutung agam Mexico ah akipuakkik khitdeuh ciangin gamgi aom lei (Bridge) tungpan lengkhia in kisihbawl cimawk hi.

US gampan in aki hawlkhiat ciangin avanteng zong Plastic Bag khatsung ah kikoihziau a, gamgi aom lei tungpan avantengtawh lengsuk hi. Anuai atuk ciangin khua phawknawnlo in, zato akipuak hangin asawtlo in siveve hi.

US gamsung ah Trump Administration hongkipat ciangin gamsung ah aguk om “illegal immigrants” teng siansuahding, hawlkhiading cih New Guidelines hongkipat ciangin hihbang in sihna apianlawh kici hi.

Lei tungpan atuahsukma amukha te’n agenna ah Mr. Olivas pen lungkiattuak mahmah a, Mexico gamah ciahkik nuamkeng ci’n awngbaba cihi. Hih aki puakkikna gamgi pen US San Diego City leh Mexico Tijuana City kikal gamgi kikal aom El Chaparral ah hi a, gamgi akantanphei khitdeuh ciangin lei tungpan lengkhia in asi cihi.

Mexican Officials te genkhiatna ah Mr. Olivas pen US gampan in hawlkhiatna Deportation angah pen athumveina hita ci’n genkhia uhhi.

US kumpi in Tuesday ni in thuzaksakna Memos nih khahkhia uh a, US gamsung aom bangmah laidal kician neilo in aom “undocumented migrants” te manlangtak in hetkhiat, hawlkhiatding pulak uhhi.

Amasa Memo pen Homeland Security chief John Kelly tungpan hi a, “US Immigration and Nationality Act” thukhun tawh kizui in kumpi thunei te’n illegal in US gamsung ah aomkhatpeuh amatkhakleh koigam koigam pan ahi zongin Mexico gamgi ah puakkhiading cihthu kihel hi.

Mexico gamte’n amau gammi ahilo gamdangmi te nasangzo ding uhhiam, US kumpi thunei te’n asanzawh nading un pumsawltheih omdinghiam cihpen kitheicianlo hi. Ahi zongin Foreign Minister Luis Videgaray in agenna ah Mexico in tuabang in alangkhat lamte thukimna omlo “unilateral immigration proposals” pen piangthei loding hi ci’n genkhia hi.

Hihvai tawh kisai in Homeland Security chief John Kelly leh US Secretary of State Rex Tillerson tezong Wednesday ni in Mexico ah zinding uh a, kikupna neiding uhhi.

Foreign Minister Luis Videgaray inzong Mexican Citizens te ii thuneihna Rights pen dalsak nadingin Mexico in ki hanciam dinghi. Legal Action kilading hi. Akisapleh United Nations dongah ki pulakto dinghi ci’n genkhia hi.

US gamsung ah omtheih nading bangmah kician aneilo “undocumented immigrants” bekbek pen 11 Million bang omding in ki ummawh hi. Tualak ah atamzaw pen Mexico gampan alut vive hizaw hi. US President Donald Trump in President a ngahtheih nadingin Campaign abawl hunlai in agendet thapai pen Immigration leh Border Control vai hiphadiak a, bangci bangin hongsemsuakding cih lunglut huai hi. ZD Sawltak #zomidaily