Ka muhpak US Gamthu pawlkhat – 36

Ka muhpak US Gamthu pawlkhat – 36

Ankhing Ansa Khamna USA
Laibu kipatna lamah khanglui hauh ih cih pen a sum a paai in zong aki-hau aki-nei venvan hi khol lo in, lokhawh singtuk kivaakna sung pan khawhsa kham innsung bangkuate cihna hi ci’n ih pu-laak khin zo hi. Bek tham lohin ankhing ansa innsung bang kua a’ding cih gen loh in theih kholh loh aa, a khual a tual pan a hong hawh hong lengla khat peuh om leh, ankhing ansa a pia zo a nei zote pen mi nuamsate mi hau mahmahte akici ahihi.

Tua mah bangin America zong ah a kuamah peuh in sum tha-lawh in mang bangin na kisem tek aa, tua mah tawh kizui in ankhing ansa a kua mah peuh giau tau lo in kinungta zo kim ciat tek hi. Man lah lua kisa in an huan hun ding na leng kicing lo in zing leh nitak anneek ding pen, nipi khat ai ding phialphial kihuan khol euau thei hi.

Ahih hangin an khamvalte pen a vot sungah koih peuh leng sawt veipi tak ki-mang hi. Niipi khat sung bang lellel pen an ningh lo in kikoih thei hi. Ih neeknop ciangin gas ahih kei leh electric/gas meitha tawh kibawl anhuannate sang’ aa, a manlang zaw tham lai, anhuanna nam khat ahi, (microwave) kici te tawh minute 1 – 5 sung a namnam zui in kisasak thei ziauziau hi.

A tawpkhakna ah America aa om Zomite om zia pen, nidang lai aa ih Zogam a ansa ankhing kham – mihau mi cithei mi nuamsa ih cihte tawh ki-valaak pian gige kasa hi.

(azom omlai hi…)

Agelh: Awn Za Pau