Pasian’ hehpihna tawh 2017 kum January 28 pan February 14 dong Zogam ah gospel ka pai hi. Kawlpi, Gamlai khualui/khuathak, Tung Tuang, Tonzang, Val Vum, Dimlo, Tuilangh, Anlangh khuateng ah Pasian’ thu nungta genkhuan kangah hi. Hih ka khualzinna sung ah ka muhkhak leh ka zakkhak thu pawlkhat kong luikhia nuam ni.
Lampi
Lampi deihtak kikek in kipuah mahmah hi. Ahi zong in sumbawlna suakzaw aa deihsakna taktak tawh kisem om khollo ahih man in tuk tun teh buai kik zeel ding dan hileng kilawm kasa hi.
Kawlpi leh Tedim kikal mun thum bang ah lamkekte om lai hi. Tua munte ah nai 1 dekdek ngakkul thei hi.
Tedim khuasung pen kultal hoihtak na kizut ahih man in nuam mahmah hi. Tonzang ah bel hawkguam hoihtak concrete tawh abawl laitak uh ahih man in lungdam huai hi.
Kumpi budget tawh khua khat leh khat kizopna lampi kisial ziahziah ahih man in lungdam huai mahmah hi.
A kisampi pen bel kumpi te’n M & E mechanism (Monitoring and Evaluation abawl pawl) koih le uh tuktun sial aa buaidetna pen hong veng pah ding hi.
Mei
Khua kim ah solar tawh mei kivak tek aa nuam mahmah hi. Ahi zong in solar pen akhan sawt hetlo ahih man in kum tam kimanglo ding hi.
Falamte na ngawn in kumpi meipi (maha dat aa line) ngah khin uh aa en ih ngah nailoh pen khasiat huai kasa hi. A diak in Tuunnu Zogam hehpihhuai kasa mahmah hi. Tol khinta hi. Sing tawh an huanloh phamawh ahih man in ih gam tul mahmah hi.
Ih MP te’n India pan beek in gas baihtak hong luttheihna ding hong phule uh tawm beek phatuam samlo ding ahiam kaci hi.
Nuntak Khuasakna
Nasem nuam ta ding in tulaitak sum thalawh theihna tam mahmah hi. Inn kilam ziahziah, lam kito ziahziah, suang kisek ziahziah ahih man in nasep tam mahmah hi.
Ih gunzang suangte nangawn sum suakmang ta hi. Company pawlkhat in contract lamang ta uh hi. Suang gawina set om kawikawi hi.
A dahhuai Zomi dinmun
Tuiha lei, Vialcian lei, Nakzang lei, Tui Thang lei, cihbang in construction pipi om mah tase leh atamzaw Zomi ahilote vive in ngah hi. Zomite akipia nuamlo hilo aa Zomite’n qualify zolo hizen hi.
Zomi company atamzawte minsia uh hi. Duh hop lua uh hi. Naypyitaw dong ah sap athuak om hi. Pasian’ thu-umte cihding nangawn maizum huai dinmun ahi hi.
Ih gam ah sa tawiman tawh azuak mi 1 bek om zen hi. Sezang khuakhung ah sa tawiman zuakna mun khat bekbek ah om zen hi.
Bus line te ah zong Zomite’ mawtawte hoihlo deuhse hi. Puah nuamlo uh. Ngah ding bek ut. Duhhopna leh huaihamna lian mahmah ta hi.
Sepna khempeuh ah huaihamna leh duhhopna tawh ih kidimta hi.
Biakinn
Biakinnte bel hoih thei mahmah hi. Pasian zahtakna tawh ki hoihlamh ahih leh hoih hi. Kei’ muhna ah bel atamzaw kidemna tawh kibang kasa hi. Leiba thangba liang in alamgawp pawlkhat om hi.
Gal et aa a etlawm teutau ding khawng ki hanciam mahmah tawh kibang kasa hi.
Ngaih sun taktak leng a building sang a mite thupi zaw hi. America aa biakinnte khawng apuapan en leng hoih hetlo hi. Biakinn tawh zong kibanglo hi. Asung lut leng na hoih mahmah lel hi. Music khawng zong Zomite sang namtam zaw pek tum uh aa gamlum siasua lo napi avek in kiza sialsial hi.
Kawlte tawh ih kinai luat man aa tungtham etlawmna athupi sak zong ih hikha ding hi. Amau zong azawng tata bang ahau dan aa omnuam kan zawlai uh hi. Phungzi sang (monastery) te bang en leng apiate’ min ki at deudau dep hi. Zomite’ biakinn pawlkhat ah zong tuadan aa apiate’ min khawng akisuang deudau kamu hi. LST in bel na taklam khut ii piak na veilam khut theisak kei in ci hi.
Alungdam Huai Thu
Ka paina khuate in Pasian’ thu na lunggulh mahmah uh hi. Pasian’ thu akinlote Zomi sung ah athawl nawn phalo khat suak hi. Suangbawl suaibawl Zomite bang zune sane zong om nawn mello in Pasian’ thu hat thei mahmah uh ahih man in lungdam huai taktak kasa hi.
NGO tampi na omta ahih man in nuamtuam mahmah hi. Zato lum peuhmah dangka tengkhat tawh aveh lianlian NGO khawng zong na om a hih man in lungdam huai hi.
Ka zinna khuate zindo siamthei mahmah uh aa hong ki suangsak mahmah uh hi. Pasian’ Min tawh ahih nak leh thupi ngaihsut ngiat uh hi.
Zomi te’n Pasian mah pom teetaa in Ama’ zia leh tong tawh kituak in ih nuntak nak leh ih pallun peelmawh ding hi.
Ka paina khuamite khempeuh tung leh hih lai hong simsak khempeuh tung ah lungdam mahmah ing.
Note’ Itna Sung Ah
Mung Laan Thang
Zangkong
Comment piaknop aomleh...