US khualzinna vai lungdam kohna ~ Pu Thang Khup
02 July 2018: Pasian Hehpihna tawh US ka tung thei aa Zomi pihte ii vaimuakna tawh ka tawl a dam mahmah hi. 11 Aug 2018: US pan Japan lam zuan in naseppihte tawh na zin sawm ta ung.
US zin theih nading hong sam Zomi Innkuan-USA kipawlna makaipite leh US gam aa om mipite tungah ka lungdam mahmah hi. Tua bek thamloin visa vai aa hong buaipih, Kawlgam lam pan aa i Zomi pihte tungah zongh lungdam mahmah hi. Mimal kim khatciat tung ah ka lungdamna hipan kong pulaak pha aa Topa in thupha hong piasemsem lai tahen. Amen.
Tukum US aa Zomi Khawmpi pen Zomi lasak siam, tumging siam leh mipil ulian tampite kikaikhawm zo baan ah Zomi Innpi honpawi tawh zongh kituak kha a hihman in hampha diak ka kisa mahmah hi. Zomi Khawmpi sung aa programs tampite ah kihel thei in, muhna ngaihsutnate sungkhia thei aa kikumkhawm holimkhawm thei i hihman in manpha kasa mahmah hi.
Tua baan ah
Zomi AG-USA khawmpi, ZBCA khawmpite ah kihel kha ka hihman in tha ka ngah mahmah hi. Zomi Biakinn tuamtuamte ah zongh thapiakna thalaakna hunphate zongh ka ngah kha hi.
Mipi hong tang sak
Pahtawina hong pia, sa hong gawh khuapihte aa kipan khuadang Zomipihte leh kipawlna tuamtuamte tung ah zongh lungdam mahmah hi. Zin tunna, zinsuk zintohnate ah hong buaipih, hong kithuahpih, hong panpihte tung ah zongh ka lungdamna lian mahmah hi. No zongh Zogam nong zin uh ciang, inn ah hong baang un.
More: A patauh huai ZCD ~ Pu Thang Khup
A tomkim theipen dingin lungdamkohna kong gelhkhiat hi aa, a ni leh a mun, mimal kim khatciat ii min cihte a vekin baan pulaak ni cileng tamlua a hihman in hizah tawh kong khawlbawl phot hi. Lungdam mahmah, Topa Thupha. Pu Thang Khup
Comment piaknop aomleh...