Itna bulphuh nasep khopna in gualzawhna hi ~ Khup Lian Thang
Tuithang khuami ahi Pa Khai Sawm Pau@Pa Khai Sawm, akum 60 val, pen a lungtang (Heart) natna hangin a dam hetloh pen kum hong tam sim pian ta hi. Mandalay ah Kawlgam aa dingin lungtang lam tawh kisai ah a hoih mahmah khat ahi Siavuan pa kiangah ki lak denden hi. Siavuan pa in hoihtak in a et et khit ciangin, “Na lungtang pen, a khan deina a vang gollua ta hi. Tua hangin na lungtang sunga a si te hoihtak luang theilo bek thamlo in lehluan kik lai hi. A vang zong lianlua ta hih manin ki bawl thei nawnlo kha ding hi. Koikoi na pai uh a, kua Siavuan te tawh na kilak zongun haksa sa kha ding uh hi.
Tua ahih manin na thuakna a nopna dingin zatui nek ding kong pia ding hi. Hih zatui pen na sih dong mah hatkat takin na nek ding hi” ci-in gen ahih manin a lungkiat huai mahmah dinmun hi mawk hi. Tua ahun pen 2016kum laipek hi in, amau zong Siavuan pa cih mah bangin mundang gamdang ah I ki lak hangin a kilam dang lo ding veve, Siavuan pa hong piak zatui nene lel ni, ci-in lam-et om hetlo in anuntakna ah sih ding bek a ngak dinmun ahi hi.
USA a om atapa in bangbang hileh ih lungkim nangin Singapore ah kilak sawm veve leng hoih ding hi, va pai pong dih un ci-in itna taktawh hong sawl ciangin Singapore lam ah kilak dingin hong gel uh ahi hi. A pano ahi Pa Thang Lian Sum@Pa Sumpi pen Singapore ah kum tampi nasem in a om ngei ahih manin, Pa Sumpi in Singapore ah zato kilak nuam ihih leh hong vaihawm pih thei ding om ding hi, ci-in Sm Cing Suan Lian@Sm Suannu na hopih hi. Sm Suannu pen Singapore General Hospital (SGH) ah, lungtang lam tawh kisai ah a sem ngei khat na hi linlian se hi. Sm Suannu in Pa Khai Sawm ii natna tungtawn in, a kilahna ding a Siavuan te tawh a kimuh theihna dingin khamkholhna (Appointment) bawlsak khol sitset pah hi.
Yangon ah Passport vaiteng alem phetphet in Pa Khai Sawm pen a tapa u pen Pa Khupno tawh 25th March,2018 ni-in Singapore lam hong zuan khia ta uh hi. Tun ngeiloh pai ngeilohna, pau leh ham theihlohna lak ah koi ci kalsuan cih lunghimawhna ding om hetlo in, vanleng kuan ah a khuapih ahi Pa Pau Khat Suan@Pa Suanlek leh Pa Khup Lian Thang te in na dawntuah thei pah uh hi. Pa Suanlek te’ inn ah kinga pah uh a, Sm Suannu ii gelkholhna a om sa bangin 27th March,2018 ni in SGH zato ah kilak thei pah uh hi. Vai khempeuh pen hong lem mahmah leh hong nuam mahmah cih ding ahi hi.
A kisam bangin X-ray zaih, a si te sit in a natna bulpi taktak teng a muhkhiat theih nangin Siavuan Siama te hong kipan pah uh hi. Tua ni mah in a natna a bulpi taktak teng zong hong ki theikhia pah ziau hi. Amasa in lungtang at-na lam a siampa (Surgeon), amin Dr. Chua, tawh kimu masa in Siavuan pa’ genna ah, “ Pa Khai Sawm ii lungtang natna pen Kawlgam aa Siavuante’ gensa mah bangin a lungtang khandeina gollua ahi hi. Hih natna pen a suahcil a pianpih natna a hi hi. A thahat laitak in bangmah aki theilo bek hi in, kum hong cingpian in a tha hong kiampian ciangin a natna hong kilang ahi hi. A lungtang a khandeina avang pen lianlua ahih manin a site hoihtak luangthei lo in, a site lehluan kik gawp ahih manin a lungtang in na hoihtak a sem theilo ahi hi.
Tua bangin a lungtangin a si te puakkhia dingin akilawm zah puak khialo in, a lungtang sungah kikhol in, a sit e a lehluan kikna hangin, a sin (Liver) in zong thuak hi. Tu in a sin zong bawk mahmah a, a phacia ding sangin azah khat bang golzaw ta hi. Tua hangin amah pen a lungtang a na kimlai , sin nate bangin amaikhawng a mit khawng a nai ahi hi. Ken bel a lungtang at ding pen at thei ding hing, haksa lualo ding hi. Ahih hangin tua bangin ka at theihna dingin lungtang natna a bawlsiam, atel theih deuh Siavuan khat tawh na kilah beh kul lai ding hi. Na tha in a zo diam, ih at laitak in a sia pen zong hong piang kha diam, at leng hun alap lai hiam cihte pen a dang Siavuan khat in hong et kul ding a, ama muhna tungtawn bek in maban ki zom thei ding hi” na ci hi.
Tua ni mah in lungtang natna lam alen Siavuan nu Dr. Tan tawh kimu in, “Na sin zong bawk lua in tua zong a kiam nangin vaihawm kul ding, sinlam tawh kisai Siavuan te zong dotkul ding hi. Tua teh na ci na sate bawklua, na khe khawng bawklua ahih manin tua te a kiam kul ding, a thupi penpen ah na si luanzia, na tuap sungah na si luanna ii a hatna(pressure) leh a si a lehluan kikna (resistance) ii a hatna pen ih teh kul phot ding hi. Tua tungtawnin at theih ding leh at theihloh ding ki gen thei ding pan ding hi. Tua a si ii thahat na ih theihna dingin na lungtang si-hui sungah setvan khat ih thun ding a, tua tungtawn in ki thei thei ding hi.
Tua setvan ih thun theihna dingin na ci bawkte, na pumpi sunga om akisam lo a tui te (liquid) hong kiamkul masa dinga, tua teh na si luanna adal a tawpsak ding ahi si-kham si zong tawmlua ahih manin tuate tampi hong om nangin kibawl kul phot ding hi” ci-in zatui nek ding honkhat na pia hi. Nipi khat a cin ciangin khatvei kilak kik uh a, Siavuan nu in a si te asit ciangin deih bang nailo ahih manin ni 4 khawng sawttoh beh lai hi. Tua a kik taktak ciangin lem ta ahih manin 3rd April, 2018 in a si-hui sungah setvan thun in, minor operation dankhat bawl a, tua pen nai 4 sungkhawng sawt hi. Tua aman ciangin zato lupna ah Pa Khai Sawm na paisak kik a, tua mun aa Dr.Tan hong pai in hoihtak ki at thei ding hi, lung himawh huailo hi, cih a result na pia thei pah hi.
Ki at thei ding cih nuam mahmah kawmkal ah, sum pen tampi tak tung ding cih pen theihsa ahih manin a Siavuan nu mahmah in zong, na ki at takpi ding uh hiam ci-in ana dong phapha hih tuak hi. Ih mel leh ih sa hong et ciangin a sum a zo hetlo dingin hong muangmawh mahmah dan na hi hi. USA aa om ahi Pa Khai Sawm Pau ii tapa David Mungsen in, “Ka pa cidam na ding ahih nakleh bangbang ahi zong ka sum zon teng bei in lei kaba phial zongin ka bawl veve ding hi” ci lian ihih manin amah mah in sum kisam teng ahi thei bangbangin lampi zongin Yangon aa om tanau te’ panpihna tungtawn in ahi zongin, lampi tuamtuam zongin Singapore lam ah hong khak ziahziah uh hi. (A vekpi in SG$ 80,000 sang a tawmzaw lo bei kha ding hi)
A lungtang ki at thei ta ding acih aa kipan Zato Siavuan te in zatui a namdang khat pia a, a pumpi a thakhauhna dingin zatui piapia phot uh hi. 16th April, 2018 ciangin hoihtak leh buaina om vetlo in a ki at thei suak ta hi. Hoihtak in a at theih khit ciangin nipi khat sung zato ah lumsuak sak a, tua khit ciangin Pa Suanlek te inn ah cidam in takin zoto pan in tuak thei ta hi. Tua khit zawh nipi thum sung bang ahunhun in kilak kikkik uh a, a tawpna taktak ciangin 16th May,2018 ni in Kawlgam lam cidam takin ciah zo ta uh hi. 20th May, 2018 taktak in a tengna Kawlpi ah cidam takin tungta uh hi.
Hih a tungah Pa Khai Sawm Pau ii cidam na, lamkhat pan a si ding dinmun pan in a cidam kik theihna tungtawn in ei Zomite in etteh ding, ciin ding thu tampi hong phawksak sa ing.
1) A pa ii kibawl na dingin asum a khol teng, it sit hetlo in akisam bangin vaihawm in apa’ cidam na dingin a neih leh alamh teng asung khia a tapa te’ gamtat zia pen nak etteh taak mahmah sa ing. Zahtak huai mahmah, picing mahmah leh tapa hoihte ahihna uh hong phawksak hi. Singapore ah apa hong paipih ahi atapa upen Pa Khupno in zong lungduai takin apa a khoi a kep nate thupi leh etteh tak mahmah hi. Tapa hoih tapa gina taktak te ahi hi. Zomi bup in et teh ciat ni. Minam khat leh gam khat a khantohna dingin akisam ih kal masa ding ahi hi.
2) Zato hong kilah ding ciangin inn lam pan Singapore tawh kizop theihna dingin avai hawmpih hi Pa Sumpi ii deihsakna leh itna bulphuh in a kisam bangin Singapore lamtawh akizop theihna dingin avaihawmsakna, Singapore General Hospital ah aki sam bangin Appointment alaksak leh akisam bangin na khempeuh a van kholhsak ahi Sm Suannu , amau te in amipih te a itna akisam aomnak leh a mipihte a huh dingin amau hih theihna tawh ma apanna pen et teh huai mahmah hi. Zomi mimal in zong, ei hih theihna pan in akisam khatpeuh a kisap hun in itna leh deihsakna taktawh ih huh ih panpih theih na dingin Pa Sumpi leh Sm Suannu in lam hong hilh uh hi. Zomi bup in et teh ciat zo leng ih minam hong cidam mahmah dingin ka lam en hi.
3) A zin tunna a kingakna a inntek ahi Pa Suanlek te in, a kisam bangin pelh vet lo in zato paipih ciatciat den uh hi. Amau zato kahpih nangin a nasep khempeuh nusia in ahunteng khempeuh pia khia ngiat uh hi. Itna deihsakna veina anei inntek te innkuan ii a zindo dan, a u anau leh khuapih tuipih te a itna leh a adeihsakna pen etteh tak mahmah hi. Zomite in hih bangin a picing lungtang vom ciat ni. Ih khuasung nuntakna hong kilam dang hanhan zo ding hi.
4) Zato alup sungin Singapore aa om Zomi khempeuh phial in veh in, akisam bangbangin ki en diamdiam uh ahih manin Zomite ki itzia pen bangmah tawh teh theih a om hetlo hi. Nak et lawm lua mahmah hi. Hih bang ih neihsa ngeina hoihte ih zop tohtoh theih ding thupi mahmah ding hi. Tha nem laitak tha kiam lai tak in ih geina ui no hong pai nangawn a nop tuam hi ki ci in, hih bangin mundang gamdang ah it teng ngaihteng tawh kigam latna ah zato lup lai tak in, ih ki veh ih ki delh tanghtangh pen thupi lua mahmah hi.
5) Zomite in Sum leh pai ih zon leh zong, ih nu le pa ih u le nau ih beh leh phung leh ih minam pihte in hong noptuam pih ding pen a thupi penpen ahi hi. Tua ih zon sum leh pai in ih nu ih pa te’ nuntakna ahonkhia, nuntakna thak a pia, khantohna a pia ahih nangin ih zat theih ding thupi mahmah ding hi. Ih zon sum leh pai hangin lampial in kiphasak in ih mipihte leh, ih u ih naute’ aa dingin bangmah aa a kizat theih kei leh a khiatna anei hetlo huana ahihna hong phawk sak hi. Sum leh pai te ei cidam nangin, ei khantoh nangin ih zat ding hi in, ei kiamsukna ding ei mangthang na dingin, ei ki hihsakna dingin zat ding ahih lohna athak in hong phawk sak hi.
6) Singapore General Hospital aa Siavaun te in, amau siamna thahatna ciat ah na sem uh hi. A at siamte in hong at in, a natna kankhiat a siamte in hong kankhit sak in, sin lam a siam Siavuan te in sin lam hong et uh hi. Amau mun ciat ah siam mahmah ciat uh a, khat leh khat zong a hihna uh ki zahtak sak ciat uh hi. Zomite in zong ei mun ciat ah ih siamna dingin hanciam ciat ni. Siavuan ih sep leh siam mahmah sawm ni. Engineering ih hih leh zong siam mahmah sawm ni. Gam vai minam asem ihih leh zong kan takpi in siam mahmah sawm ni. Ih zuihna lampi ah gina tak leh thuman takin na sem ciat sawm ni.
7) Hih bangin zato hoih mahmah, Siavuan pil mahmah tampi tak Zogam ih neih zawh dingin sunmang in nei ciat ni. Hih bangin zato hoih mahmahte Zogam ah nei zo le hangin ih nuntaknate kumpi tampi hong khansau sak dinga, hong cidam sak zo ding hi. Tua Zato hoih leh a pil Siavuante ih neih zawh nangin hanciam ciat ni. nangin a kisam penpen ahi gam leh minam makaite in mipite phattuam na ding, mite te pilna cidamna ah a lungnop khamuan theihna dingin a vei, a sem ding makai hoih tampi zong a kisam ihihna hong mu sak hi. Ei zong nikhat niteh hih bangin Siavuan a siam ih nei thei dinga, Singapore bangin Zato hoihte ih nei zo ding hi.
Tua dinmun ih tun theihna dingin sunmang gel in, hanciam in, khut kilen in, mipi’ noptuamna dingin sep kipat hun mahmah ta hilo hiam? Lungdam, Khup Lian Thang
Comment piaknop aomleh...