US galkapte’n Afghanistan gamsung Bomb akhiatna hangin IS migilo 36 si

US galkapte’n Afghanistan gamsung Bomb akhiatna hangin IS migilo 36 si

US galkap te’n Thursday ni in Afghanistan gamsung Tunnel Complex ah Bomb golpikhat khiatsuk ahih manin, IS migilo 36 in sihlawh cih Afghanistan Officials in genkhia hi.

Afghanistan Ministry of Defense in Friday ni Statement akhahkhiatna ah US Military te Bomb khiat hangin khuasungmi, tualsungmipi asi omkhalo cihi. Ahi zongin IS te gamtatna kuahawm leh galvan hiamvan honkhat suksiatsak cihi.

US Military te khiatsuk Bomb pen “GBU-43B Massive Ordnance Air Blast” hi a, atom in akilawh ciangin MOAB kici hi. MOAB pen ““Mother Of All Bombs” ci’nzong kitheizaw hi.

Hih Bomb pen 2002 – 2003 kumpek in akibawl hi a, akibawl hunlai in Iraq gamsung kapnading in akibawl ahihi. 2003 kumin zatding in kisinkhin, Test kibawlkhin himahleh galkidona ah kizang ngei naivetlo hi.

Hih MOAB Bomb pipen agihna bekbekzong 21,600 Pound (9797 kg) ciliang hi. Iraq gamsung kapnading in akibawl himahleh kizanglo in, Afghanistan gamin athuaklawh ahihi. Thursday ni in US Military te’n Pakistan tawh gamginaih aom Afghanistan, Nangarhar Province sungah khiatsuk uhhi.

Pentagon spokesman Adam Stump ii genkhiatna ah hih MOAB Bomb pen Afghanistan gamsung ah akisapleh zatding in akipaihpih pen sawtkhinta cihi. Hih Bomb akikhiat ciangin leitawh aki sukkhakma, huihlak ah puakkham in Air Pressure nasiatak in piangsak ahih manin, kuahawm Tunnels leh inn kilam Structures tuamtuamte kicimsakgawp cihi.

Aki gilosak, aki Offensive sak mahmah galte tawh kido ciangin hih khiatsuk masaleng khuasung inn leh lei Infrastructure tuamtuam te siacip in, amite mahmahzong lungsim thanemsak, Morale kiamsaktuam hi ci’n Adam Stump in genbeh hi.

Hih MOAB Bomb pen giklua mahmah ahih manin U.S. Air Force C-130 Cargo Plane tawh kipua in, anunglam kongkhak panin aki khiatsuak ahihi.

Aki khiatsukna Achin District Governor asem ahi Ismail Shinwari in agenna ah hih US Military te Bomb khiatna munpen gamsung mualkuamlak hi a, khuasungmi Civilians te omna innte tawh ki gamla mahmah cihi. Tuakuam tengah abeisa kalsung in Afghan Forces leh ISIS Militants te kilimdo mahmah cihi.

Achin District sungah ateeng Hakim Khan kici kum 50 aphakhin khuasungmi khat ii genna ah IS migilo te kapnadingin hihbangin US galkap te’n hongkhiat uhpen ki lungdam mahmah hi. Hih IS migilo te kapnading in 100 vei bang hong khiatsuklai un ci’n athukimna pulakkhia hi.

Hih Bomb akikhiatma azanni in US galkap khat ahi Green Beret pen IS te’n Nangarhar sungah kaplum uhhi. Tuakhit azingciang in US Military in MOAB Bomb akhiatsuk hi a, Green Beret kikaplupna vaitawh kisaihiam cih akidot ciangin tuavai tawh kithuhna, kisaina omlo hi. Ahun tungta ahih manin azat huai galvan akizang hizaw hi ci’n U.S. defense official in genkhia hi.

Afghanistan gamsung, adiakdiak in Nangarhar sungteng ah ISIS migilo pen 600 panin 800 kikalbang omding in U.S. in ummawh uhhi. ZD Sawltak #zomidaily