Lutang le ngawng (Pasal maw, Numei?)
Laisiangtho sungah ‘numei lutang in pasal hi. Pasal lutangin Khazih hi’ ci in ki gelh hi. Ciamnuih cihtak in ‘pasal te a lutang hiaa numei te a ngawng hi. Numei te in pasal te a deih bangbangin hekkawikawi thei hi. Ngawng in lutang pen a deihna mun peuhpeuh ah hek ziau ziau hi ci in ki gen thei zel hi.
Tua ciamnuih sungah ngaihsut ding thutampi om hi. A taktak in cileng ngawng in lutang a deihbangin hekthei ngeilo hi. Ngawng sungah deihna cihzongh omlo hi. Ngaihsut theihna khempeuh lutang sungah a om hizaw hi.
Mit in etnop nei hi. Bil in zaknop nei hi. Kam in gennop nei hi. Nak in a ngimnam dikkha hi. Khua a mu nuam mit, thu a zanuam a hi bil, nak, kam, leh ngaihsutna khempeuh lutang tungah om hi. Ngawng in bangmah theithei lo hi.
Na nunglam pan in a nging khat na za hi. Na bil in a zakkhit ciangin na mit in banghiam cih munuam hi. Tuaciangin na ngawng in na etnopna munlian ah hong kihei a hihi. Lutang tungpan aa khensatna bangbang ngawng in a zui a hihi.
Ngawng sungah theihnopna, theihtheihna, deihna khat zong omlo hi. Lutang tungpan aa deihna bangbang bek in nasem hi. Tuapen lutang leh ngawng kizopna a hihi. Ngawng in lutang a deihbangbang in a hek kawikawi mawk leh tua innkuan nuam tawntung theilo ding hi.
Pawlpi lutangin Khazih hiaa pawlpi in ngawng a hihi. Pawlpi in Khazih a deih bangbangin hek ngeilo ding hi. Khazih deihna bangbang 100% pawlpi in a zuih zawh ding kisam zaw hi.
Nakhempeuh Lutang ahi Khazih lungdamna ding, Khazih lungkim nading in Khazih deihna bang a zuih ding kisam zaw hi. Tuapen laisiangtho sungah a ki gelh pawlpi leh Khazih kizopna, numei leh pasal kizopna thupaizia a hihi.
Ciamnuih cihtak in ngawnin lutuang hek i cih kawmkawm in a taktak in i gamtat khak ding lauhuai hi. Laisiangtho i laih thei kei hi. Tua ahihmanin laisiangtho deihna a ki lehbulhsak ngaihsutna phiat huai hi. Pawlpi leh Khazih kizopna lehngat kei ni.
Innkuan sungah numei dinmun leh pasal dinmun khensiam ni.
A manlo leh a kitelkhial thei ciamnuih tamzat huai lo hi. Banghanghiam cihleh thumanlo mah kizaza leh mitampi te in thuman sa in umkhial thei uh hi.
Numei in khasum a sang zongin a pasal a zahtak ding kisam hi. Sum le paii leh nasepna khempeuh numei vaihawmna a hiphial zongin numei in pasal a zahtak ding kisam hi.
Ngawng le Lutang thu tu aa zahtawh kong khawlbawl ding hi. Laisim mimal tungah lungdam! Remark: Numei te neuzawsak ding cih deihna hilo hi. Siamsin Library
Comment piaknop aomleh...