Indonesia gamsung aom Sinabung meimual puakkhamkik leuleu

Indonesia gamsung aom Sinabung meimual puakkhamkik leuleu

Indonesia gamsung ah tuni Wednesday (Apr 12) ni in meimual puakkham omkik leuleu cih AFP News pan kiza hi. Tua meimual “Volcano” pen Sumatra Island tungah aom hi in, abeisa Friday ni akipan apuakkhamkik hi a, meikhu leh mei am vandawn ah kiloto ziahziah cihi.

Local Disaster Agency te genkhiatna ah Mount Sinabung kici meimual pen puakkham in, vandawn ah 3km bang sangto in Hot Gas Clouds kilawnto ziahziah hi ci’n genkhia uhhi.

Hih meimual Volcano kitampen North Sumatra Province aom sanginn khatpan in kigaldawh mahmah a, limtak in ki enthei hi. Ahi zongin sanginn pen angei mahbangin kihong in, sangnaupang tepen sangtual ah kimawl hithiatlel uhhi.

Local Authorities te genna ah Volcano tawh akinai paitheihloh nadingin akikhamcip Restricted Area panin hih School pen 7 km bang kigamla ahih manin, lauhuaina omlo a, sanginn akikhaklo hi ci’n genkhia uhhi. Hih Volcano pen 2013 kum akipan apuakkham zelzel hi a, ageinai aom khuanu khaupa te’n ki ngeinasehphial hileh kilawm hi.

Khuasung mipi tezong meimual puakkham aomzenzen hangin asepngei tengmah uh semhiathiat lel uhhi. Pawlkhatin vutvuikhu tam ahih manin maituam Mask thuah uh cihciang hi a, vanzuak vanlei te angei mahbangin gamtalel uhhi.

Hih Sinabung meimual pen asikhinsa in akituat hi a, apuakkhap lohzawh kum 400 bang aphakhin kicihi. Ahi zongin 2010 kum ciangin hong puakkhamkik mawk hi. Tuakhit ciangin tawlpikhat daicip leuleu a, kum 3 khitzawh ciangin puakkhamkik leuleu cihi.

More: “Mount Etna Volcano” meimual puakkham in ageinai aom mi 10 liam

Indonesia gampen meimual Volcano atam mahmahna gamkhat ahihi. “Ring of Fire” akici tungah omkha ahih manin, meimual atamphadiak ahihi. Indonesia gamsung ah Volcano bekbek akigawm in 130 bang omding kici hi. ZD Sawltak #zomidaily