Aksa
Khatvei pata khat in Nipini zingsanga meh dingin Ninoni nitak in ak go uh hi. Bawl khin, huan dingin bel sungah koih khin, a bel sin tawh siin in zingsang ciang a zi in a zingthawh cianga a huan lian dingin koih hi.
Tapa: “Pa, Pasian in hong thukimpih leh zingsang ciang aksa meh ding mate!”
Pa: “Thukimpih, thukimpih loh kul kei. Bel sungah a kikhahsa hi. Zingsang ciang aksa kimeh ding hilel.”
Lumta uh. Zingsang ciang a zi in huan dingin bel thuk tungah a suan toh leh zang sa pian ahih ciang a sin hong in a et leh ….. aksa na om nawnlo! A tapa hong thawh ciang… a pasal hong thawh ciang a zi in: “Aksa meh bangin kingaihsun unla, ne un,” ci hi.
Japan gal zawh ka gang Khup Do Thang leh a lawm Cin Do Thang te India pan sumbawl in Kawlgam zin uh a Ciingpikot khua tung uh hi. Ciingpikot khua pen ka gang adingin a sunghte lam tamna khua ahih manin meltheih om zaw deuh hih tuak hi. India pan a vanpuakte uh zuak in khuasung vakkawikawi uh a, khuataw lam ah a kitheihpih mahmah khat tawh kimu uh hi. A nitak ciang hawh in holim uh a, ‘si leh hing kimu’ acih uh bangin sawtpi kimulo kimu uh ahih manin kingai in kikhen thei lo uh a, a gennop uh tam hi. A lup ding uh ciangin inntekpa in, “Zingsang ciang ann hong ne in. I kimuh ding i lamet loh kimu kha zenzen lungdam hang; anne khawm ni. Akpi tui lai na go ning in, zing ann hong siim in,” ciin kivaikhak uh hi. Amah zong ciah in a zin uh a tun ciangin a lawmte kiangah gen a, zingsang ciangin a zawlte in ak a gawh thu leh zingann a sim ding thute a gen hi. A lawmpa Cin Do Thang in a ngaihsut ciang amau midang tengin aksa mehlo dinga, a lawm uh Khup Do Thang bek in aksa meh ding cih a ngaihsut ciangin hi sa mello ding hiven lol takin thawhpih in zing paipih in ciahpih hi. [Amau gel pen lawmta kingai lua mahmah ahih manun a kimaingap lua, a kici giapgiap khat ahi uh hi.] Aksa meh ding ki haza a ki zing paipih zong a om thei ding mah hi a, tuni dong a kimuh uh ciangin gen khawm in nuihpih den uh a, a khualzinna uh phawkna khat in nei bilbel uh hi.
Zomite adingin aksa pen a lim mahmah leh a kithupi bawl mahmah sa khat hi gige hi. A kisap huna zat theih dingin ak pen innkiu akbu sungah om lel ahih manin lawm leh gual, zin leh leng gina a om ciangin kiman in kigo ziauziau hi. Hun thupi leh nipini ciangin zong ak kigo in meh lim kimeh zawdeuh hi. Zomi te nuntakna ah aksa in thupina lianpi nei a, manphatna, mun lianpih luah hi. Innkuan hong kikhawlsak, innkuan hong lungnuamsak, meltheih u leh nau hong kikhawlsak, vai thupi ah ann lim hong neisak aksa hi….
A ban tampi omlai, mailam ah zom lai ni. Noh e leh, innkuan in zingsang ciang aksa na meh ding uh hiam?
Hau Za Cin
Phuitong Liim
www.hauzacin.blogspot.com
Comment piaknop aomleh...