Alcatraz tuikulh
Alcatraz tuikulh pen San Francisco,California USA a San Francisco Bay tuinaak pan 2.4 Km a gamlatna muna om ahi hi.Alcatraz pen Arabic pau pana kilasawn hi in Sea-eagle cihna ahi hi.Alcatraz tuikulh mimal a –a nei masa pen Julian Workman ahi hi.Amah pen Mexico governor Pio Pico ii’ lawmpa ahi hi.Governor in hih tui kulh lighthouse bawl nangin kum 1846 June kha in pia khia hi.Aman zong Lighthouse bawl takpi in tuni dongin muh theih in om lai hi.Kum 1846 in California Governor, John C.Fremont in $5,000 tawh United States min in leisawn hi.Kum 1850 ciangin president Millard Fillmore in Alcatraz tuikulh pen galkap mun dingin seh tuam hi.
Mexican-American War a tawp a Treaty of Guadalupe Hildago kici a sign khit ciangun US Army ten galkap 200 leh thaupi 11 koih theihna ding kulh kum 1853 kiimin ciang uh hi.Kum 1861 1 American zcivil War hong pian ciangin thaupi 85 koih theihna dingin khan(liansak) kik uh hi.Ahizongin hih thaupi te khatvei zong zang ngei lo uh hi.Alcatraz zong Confederate mi a matte uh khumna dingin zangzaw uh hi.Galkap mun dingin a phattuamna tam lo ahihmanin US Army ten 1870-76 kiim in galvan selsimna dingin bawl sawm uh hi.Lei sung thukpi vut man uh himahleh khawlsan kik uh hi.Tuikulh a tui khauh banah tuihual zong nasia veve lel ahihmanin galkap thongkia te koihna hisak vet uh hi.
Kum 1898 a Spanish- American war hong pian ciangin mi 60 thongkiat theih na ding beka kibawl pen mi 450 om theihna dingin bawlpha uh hi.Kum 1906 a San Francisco a ziinliing hangin Civil mi thong kia te suanlut uh hi.Kum 1907 March 21 ciang official in Western US Military Prison in ki kipsak hi.Tua khitciangin Pacific Branch US Disciplinary Barrack kici kik hi.Tun bel a kawm khawng kibawl beh in a sung leinuai lamah zong cell kibawl beh hi.Building pen leisung a kitoukuak ah that thum in kilam hi.A inn bawl a zawh siang ciangun galkap ten US Bureau of Prisons te khutah aap uh hi.Tua ciangin Alcatraz Prison hong hi ta hi.US Department of Justice ten October 12, 1933 ciangin lasawn uh hi.Tuaciangin Federal Bureau of Prison nuaiah Alcatraz pen Federal Prison hong hi ta hi.
Alcatraz Prison a minthan mah mahna khat pen taikhiat a haksat man hi.Kum 29 sungin jail pana taikhiat a sawm mi 36 pha hi.Sawm leh li(14) vei taikhiat kisawm ngei hi.Mi 23 te khuamual a tun ma un kiman kik thei hi.Mi 6 kikaplum in 2 tui ah kia lum uh hi.Tuabanah midang 5 a luang uh ki mu zo lo in tui kia hi dingin ki ummawh hi.Kum 1946 may kha ni 2 ni in taikhiat a sawm mi 6 te lam-et bei in Jail sungah kilehkik in buaina nasia tak bawl uh hi.Hih pen Battle of Alcatraz cih tawh leitungin thei hi.
Kum 1962 June kha 11 niin Frank Morris, John Anglin leh a sanggampa Clerance Anglin te Alcatraz pan taikhia thei mawk uh hi.A masa pen in kawm a nip zawk deuhna mun sikkeu tawh sunvang uh hi.Tua banah vanzat a tuam tuam zong amau mah in bawl tawm uh hi.Electric drill zong Vacum cleaner motor a guk pan un bawl uh hi.Huih lut nanga kibawl air vent leh corridor kizopna vangsak thei uh hi.A paikhiat khit ciangun a omloh lam uh aki theih loh nangin amau tawh kibang milim bawl tawm uh hi.Laikhauh tawh bawl in sam meetna pana a lak uh samzangte thuah uh hi.Kawm a vuhna ging a ki zat loh nangin amaute laka mi khatin acordian tum nilouh uh hi.A zawh siang khitciangun guard te round kikal sungin a ban ban in taikhia uh hi.
Alcatraz tuikulh pen tu in National Park dan in ki zang ta hi.Weekend zatna mun nuam mah mah khat suakta hi.Jail a hihna pan Kum 1963 March 21 in kikhak in museum dingin kizang hi.Kum 1986 in National Historic Landmark in kiciamteh hi. N. Pau Tun Thang
Comment piaknop aomleh...