US ah piteek khat namsia in petlum ahih manin, Caretaker te thukibawl

US ah piteek khat namsia in petlum ahih manin, Caretaker te thukibawl

USA gamsung ah piteek khat namsia in limpeh luamahmah ahih manin, tuahang tawh sihlawh in, akem Caretaker te thu kibawlding cih NY Daily News pan kiza hi. Tua piteek pen kum 96 aphakhin khat hi a, aminpen Mary Stoner ahihi.

Mary Stoner pen piteek puteek te kikepna Caretaker ah akikoih hi a, tua Caretaker koihna ah namsia tamlua mahmah ahih manin, namsia te’n ahingtang in petlum ciliang hi. Manglai in “eaten alive by bed bugs” ciliang a, lipkhap huaisak mahmah uhhi.

Pennsylvania State sung aom Hanover khua ah nungkum in thupiang hi a, ahi zongin tusung Social Media ah hong minthang mahmahkik hi. Adiakdiak in namsia pehin si cihpen lamdang kisa phadiak hi.

Caretaker ah akikoih Mary Stoner pen damlo semsem ahih manin, a innkuanpih te’n 03 February 2016 ni in Caretaker panin tuahkhia uhhi. Nithum khitciangin apumpi khempeuhphial meima piangin phualgawp ahih manin zato ah kipuak hi.

Doctors te’n hoihtak avelcian khitciangin namsia peh hiding cih mukhia uhhi.

Tuazawh kalnih khitciangin in York Hospital ah tua namsia pehna tawh Pneumonia ngahin simawk hi.

Police te’nzong athu kanding in Mary Stoner akikepna Caretaker a et uhciang in lupnatung, puanza, lukhamtuam, bangkawm khempeuh ah namsia vive omzihziah cihi. Hihbang asiangtholo munah Mary Stoner pen kum 10 val akikem himawk ahih manin, tuateng thuaklah mahmah hiding cih kimukhia hi.

Agei ah piteek akikem adang khatzong omlai a, tua ii lupnatung leh vanzat te tungahzong namsia tamphangphang mahmah cilaimawk hi.

Hih Caretaker ah mikem pen Deborah Butler kici minnei khat hi a, Police te’n tuanu thu asit ciangin hih namsia tepen Mary Stoner in hih innsung ah hongpuak masak hi ci’n dawngkik sawnsawn a, lehngawhkik sawnsawn hi.

Nasia vai U Mungpi gelhzong zaknop hi Namsia Vaina Thu ~ Mungpi Khupson

Hibang asiangtho vetlo munah piteek puteek te akem Mary Stoner pen thudonlohna leh mithat cihtawh thu kibawlta hi. Tulaitak $50,000 Bond tawh kikhahkik himahleh March 09 ni ciangin Court ah thusitna kinei kikding cih kiza hi. ZD Sawltak #zomidaily