Zogam Lailam Khualzinna -2 (Tonzang, Laaitui, Tedim, Kalay)

Zogam Lailam Khualzinna -2 (Tonzang, Laaitui, Tedim, Kalay)

It leh Ngaih Zomi te aw, A hong tung ding February 3 – 8, 2018 ( Ni 5 sung), Tonzang Lawm (USA) te’ sapna tawh Kawlgam sungah Laigelhsiam minthang Kaung Tant leh Dr. Min Khite Soe San te Zogam sungah hong taam in khantohna ding thu hong gen kawikawi ding uh hi.

Kaung Tant pen Zogam ah sangsya sem in hong om sung a muhkhak thu te laibu khat suahin Zomi leh Zogam hong vei mahmah khat ahihi. Zogam a dingin haksatna tampi thuak a, a mah zong Zogam thu mahtawh Gambup theihpih Pahtawina(National Literature Award-1999) ngah hi. Zomi Zogam tawh a kipelh theilo Kaung Tant a hihi.

A taktak in Zogam saklam teng Kawlgam laigelhsiam te-in hong lunglut na dingin a pankhia/a phukhia pa ahihi. 2016 kum in Zomi bup in I dinmun theilo(Under Identity Crisis) in a om laitak in Zomi Literature Tour ci-in kumpi neih MRTV-4 makai te hong paipih ngiat in, Zomi a hong cover sak a hihi. Sum tawh cial dingin zong a kipai nop lohna gam nawl dongah itna tawh hong pai ngiat ahihi.

Min Khite Soe San(Dr. Kyaw Soe) pen laigelhsiam bek hilo-in Movie-making lam leh music lam ah a siam mahmah khat hi a,Tu laitak I kumpi te’ deih mahmah idea hoih nei khat ahihi. Zomi Zogam pai ding a lunggulh khat hi a, tutung Zogam ah hong zin ding laigelh siam te pen sum zong leh thutaw in hong pai hilo a, Zogam hong itsak ngiat te a hihi.

Tua banah Civic Education Workshop pen Hakha College pan March kha pan kipat dingin a geelsa uh pen Tonzang in a pan masa ding suak hi. Tua a hih manin hi bang hun manpha hong phuangkhia Tonzang Lawm(USA) te tungah I lungdam mahmah hi. A mau te-in Zogam a itna na uh tawh sum leh pai, tha leh ngal tampi bei-a, a vaihawm uh pawm in a nuai a hun geelna te-ah tha vapia ciat ni.

Hunzatzia Ding

• Feb. 3-5 = Tonzaang ah sun sungin Civic Education Workshop leh nitak Thugenna
• Feb. 6 = Laaitui
• Feb. 7 = Zomi Khuapi (Tedim) Innteek sem ding huhna ngen lai
• Feb. 8 = Kalay Univeristy ah Zomi Siamsin te’ Innteekna tawh

# Feb. 12 ni-in Australia gam Sydney leh Melbourne ah စာေပေဟာေျပာပြဲ bawl dingin Sya Kaung Tant hong zin ding hi. Khuapi dangte ah zong Kawlte tawh nasem khawm I om leh na meihset sak un. Tawl om kawm ding a, hun ngah lel ding hi. Zomi te-in thapia in va uap ni. Kham Suumpi