Canada Shooting: Police akineih Gunman in mi 18 kaplum: Reports
April 21: Canadian modern history adingin #mass_shooting nasia pen piangsak dingin Kiginni panin naikal 12 sung car tawh kidelhna ah a kikaplup madong police bangin a kisiamsia; police a kineih thau tawi pasal khatin Royal Canadian Mounted Police (RCMP) officer numei khat kihelin mi 18 kaplup hi. Police ten thaukap pa in Nova Scotia sung mun tuamtuam ah mi ban mot kaplup a, policete tawh kinawktuahna ah kikaplup hi ci uh hi. Thaukap pa in police car hawl in police kineih hi.
Canadian Prime Minister Justin Trudeau in hih thupiang pen kamsiatna lianpi hi ci a, “Canada gam-ah hih banga ngongtatna adingin mun awng lo hi. Note tawh ka ding khawm uh a, hong dahpih in ka hong thuakpih uh hi,” ci-in zan in gam bup zak dingin a thugenna ah gen hi. Nova Scotia Premier Stephen McNeil in reporters kiangah, “Hih thupiang i province sungah khuaphawkna nei lo ngongtatna nasia pente lak-a khat hi,” ci hi.
Zan in RCMP in hih ngongtatna hangin a thuah kha adang om lai kha ding ci-in inn kihalte panin a luang kimu lo om dingin a ummawhna thu gen hi. PM Trudeau in hih bang ngongtatna a pian’ ma-in ka government in parliament ah assault style weapons bans ding a kisawm laitak hi napi-in coronavirus outbreak in hong lap manin kikhawlsan hi ci a, “Hih pandemic a daih ciangin assault style weapons kham ding vai kimainawtpih ding hi,” ci hi.
BANG PIANG HIAM CIH KOI CIANG KITHEI?
Kiginni 23:32 local time (02:32 GMT on Sunday) in RCMP in a police officers ten khuapi gol lua lo Portapique ah “firearms complaint” om hi cih kiza ahih manin a khua mite kiangah kong a kisungkalh khumna dingun thu kizasak hi ci hi. Tua khitin police officers ten Portapique khua-a inn sung leh inn pua ah siluang pawl khat va mu uh hi. Khuami khatin CBC News kiangah tua bang hun in inn thum kihalte ka mit tawh ka mu hi ci-in gen hi.
08:54 Sunday in RCMP in mi a lom thah thaukap “active shooter investigation” om hi ci-in thukankhiat a neihna thu pulak uh a, a thaukap dinga upmawh kum 51 a upa leh Portapique ah properties thum a nei Gabriel Wortman hi ciin pulak uh hi. RCMP officers in a naikal a sim ding Wortman mat ahih kei leh thah dingin a delhna uh-ah Nova Scotia province sungah Wortman’ crime scenes mun tuamtuam ah mu kawikawi uh a, a crime scenes khempeuh kikhilkhawm sawm hi ci uh hi.
Tua khit a khuanungin Portapique khuapi nisuahna lam Glenholme leh Debert areas ah RCMP police uniform silh leh RCMP car hawl a tai Wortman kimu hi. “Wortman’ car hawl leh RCMP car a kibat lohna khat om a, tua in a #registration_plate hi. Wortman’ car plate no. 28B11 a passenger window mai-ah kisuang ahih manin 28B11 car na muh leh 911 call pah in,” ci-in RCMP force in tweeted hi.
Tua khitin Wortman in a car laih in leitaw lam manawh in Brookfield area panin Highway 102 ah silver Chevrolet Tracker car tawh tai hi ci-in RCMP in gen hi. 11:40 in RCMP in custody ah Wortman kikhum hi ci-in gen hi. Ahih hangin tua khitin Portapique leitaw lam panin 92 km gamla a om Enfield a police station ah Wortman ki-umcih in kikaptuahna a kikaplum hi ci-in gen kik hi. Mit tawh thupiang mute in lei lakah siluang khat lum hi ci uh hi.
Naikal 12 sung sa bet bangin Wortman a kiben sungin RCMP officers-te in media kiangah a thugenna uh-ah hih bang thupiang a uplahna uh leh tehpih theih om lo a sakna uh kimu thei a, crime scenes mun tuamtuam a omte a kibang mah cih a kitheihna dingin khatin khilkhawm ding hanciam in investigation hamsapi khat buaipih uh hi. Gamdang tampite mah banah Canada in a beisa hun in mi kilom thahna (mass killings) na tuak ngei hi. A gam mite sungah kipumkhatna a om theihna dingin Canadians mite in a beisa hun in a thuakte phawkna dingin hanmual ah paikhawm ahih kei leh vigil (awareness) nei mun mahmah uh hi. Ahi zong coronavirus pandemic hun in hih bang piang ahih manin Canadians ten vigil leh hanmual ah paikhawmna in hun zang thei lo ding uh hi.
MASS SHOOTING A THUAK KHATE (VICTIMS) A KITHEIHNA AH KUATE HIAM?
Wortman’ ngongtatna hanga sihna tuak mi 18 lakah kum 23 mi RCMP Constable Heidi Stevenson (a nuai-a photo sunga police nu) zong kihel hi. “Heidi in a call of duty sapna dawng a, humbit ding a mawhpuakna a nasep lai-in sihna tuak hi,” ci-in Nova Scotia RCMP Commanding Officer, Assistant Commissioner Lee Bergerman in a Facebook post ah tuangsak hi. “Naupang nih in a nu suplawh uh a, pasal khatin a zi taanlawh hi. Nu-le-pa in a tanu suplawh uh a, midangte in lawm leh a nasep khawmpih uh mihoih khat kitaan hi,” ci-in Commissioner Bergerman in gen beh hi.
Thau tawh kisuamna ah Delbert Elementary School a sangsia Lisa McCully zong a site lakah kihel kha hi ci-in Nova Scotia Teachers Union in a statement ah gen hi. Globe and Mail newspaper in a site a ciamtehna lakah Jamie Blair leh Greg Blair; Portapique nisuahna lam Truro a siamah (nurse) Heather O’Brien zong kihel hi ci hi. RCMP officer pasal khat zong a liam hangin nak liam lo hi. Authorities in Mortman’ suamna hangin mi si zah lian final death toll bang zah hiam cih kikan lai hi ci uh hi.
A GUNMAN MORMAN KUA HIAM?
A inn vengte in Wortman pen Dartmouth ah zalim bawlna denture clinic lawhcing mahmah nei mi hi ci uh a, Global reports in RCMP leh RCMP memorabilia tawh kisai lunglut mahmah hi ci hi. Chief Superintendent Chris Leather in Wortman in violence history ahih kei leh extremist political views a neih lam kithei lo a, a mi thahte tawh zong kizopkhakna nei hi cih kimu lo hi ci hi.
RCMP Commissioner Brenda Lucki in Wortman in a cil in ngimna nei a, ahi zongin a ngimna bek muitum in phengtat gawp hi dingin a upmawh thu gen hi ci-in CBC News in gen hi. Police ten Wortman sih dan a kician in gen lo hi. Zan in PM Trudeau in a press conference bawlna ah Nova Scotia ah Wortman that first reponder (policete) a phat hangin Wortman min lo kha lo a, a gamtat hoih lohna ka gen nuam lo cih teng bek gen hi.
CANADA GAM-AH MASS SHOOTING PIANG MUN HIAM?
US gam bang loin Canada gam-ah gun ownership law khauh ahih manin mass shootings piang mun lo hi. Nung kum in northern British Columbia ah Australian-US couple kihel in mi thum a thahna uh fugitive teenagers nih a gamtatna uh kipholakkhia uh hi. 2017 in Quebec City mosque ah university student Alexandre Bissonnette in mi guk kaplum hi. Royal Canadian Mounted Police (RCMP) ten thau tawh kisuamna tuak thei uh a, 2014 in Moncton, New Brunwick ah RCMP forces thum kikaplum hi. 1989 Polytechnique massacre a kici Montreal a khuapi-ah kilomthahna ah numei 14 si uh hi. A thaukap pa in engineering college classroom sunga numei 14 a kaplum ma-in pasal teng pusuaksak masa hi. Nung kal bei kuan-a Nova Scotia province ah mi 18 a kilom thah ma-in Canadian mass shootings history ah 1989 Polytechnique massacre, Montreal a nasia pen hi. Source: BBC @ Thang Khan Lian #ZUNs reports
Comment piaknop aomleh...