Beijing Wildlife World ah numeikhat sahang in petlum, adangzong khatliam

Beijing Wildlife World ah numeikhat sahang in petlum, adangzong khatliam

China, Beijing khuapisung aom Wildlife Park kici ganhing kikhawina ah sahang in numei khat petlum a, adangzong mikhat petin liam cihthu Xinhua News pan kiza hi. Hih ganhing khawina pen Beijing Badaling Wildlife World kici a, hihmun ah Saturday ni in ganhing en in apaite apet ahihi.

Hih ganhing khawina pen Wildlife Park akicih mahbang in gamsa alauhuai simsim tampi akikhawina hi a, asungah lutciang in mawtaw tawh lutsuakthei himahleh mawtaw sungpan kuamah pusuakloding cih ahihi. Safari Style ci uh a, gamsung sabeng bangin ganhing te aomzia anaipan ettheihding in akibawl hi a, ganhing tezong kikhihcip, kikhumcip cih omlo in amau utnatek ah valhialhial lel uhhi.

Hih Accident apianna pen mawtaw sungah atuang numei khat adang atuanpih Passenger te khattawh kitawng, kamkinial uh ahih manin ahehsuak in mawtaw sungpan apusuahleh sahang in apetkha ahihi.

Hih sahang in numeinu apetlaitak CCTV paninzong ki muthei a, mawtaw tungpan apusuahzawh Second 15 sungin sahang hongpai in apet ahihi.

Sahang in petin taalkaihphei a, tua amuhciang in mawtaw sung ah aom numeikhat zong hong pusuah in huhding in akipatleh amahzong sahang in naphuaikha hihtuak hi. Ahi zongin tuanu pen silo hi.

Xinhua News te genna ah hih buaina hangin ganhing khawina pen kikhakcip phot a, thuneite in hoihtak encian, sitcianding uh cihi. Sawltak #zomidaily