US ah hong khang kik Covid-19 Delta Variant Natna

US ah hong khang kik Covid-19 Delta Variant Natna

WHO in min thak apiak SARS-CoV-2 B.1.617.2 (Delta) Variant COVID-19 natna thak pen India gam pan hong kipankhia aa, leitung gambup hong zel in tu in zong US gam sungah hong kilawh to to ta hi. Tu lai tak i Kawlgam ah zong Covid-19 third wave hong kipan kik aa hih natna thak tawh mitampi in hong sih san ta ahi hi. Hih Delta Variant Covid-19 pen abeisa aa Covid-19 original sang azah tampi lahuai zaw bek thamlo in kilawhna manlang zaw in asi zong kitam mahmah ta ahi hi.

Covid-19 Delta Variant pen US gam sungah May, 2021 sung in Kimawlna Gymnastics Facility, Oklahoma pan mi 26 ten natna ngah uh ci in CDC report ah kimu thei hi. Report dang khat ah belh March 2021 in case pawlkhat kimu khin ci uh hi. Tulai tak tua Covid-19 natna ngah thak zong Oklahoma state sungah kilawh to to ci uh aa, Zomite tenna Tulsa khuapi kiim teng ah zong natna ngah thak khang mahmah kici ahih manin akua mapeuh kidawp huai mahmah hi.

Zanni nikhat sung California ah natna ngah thak mi 2853 leh asi mi 21 leh Texas ah natna ngah thak mi 1229 leh asi mi 11 tawh atam pen in kimu kik aa, mun pawl khat ah natna khang kik ahih manin Covid thukhun pawl khat bawl kik uh hi. US gambup ah natna ngah thak 34,000 val pha kik hi. CDC ii muhkhiatna ah Oklahoma Gym khat pan Covid-19 Delta Variant ngah thak mi 47 lak pan mi 32 pen Covid-19 Vaccine sun nailo, asun vet lo (Unvaccinated) te hi aa, mi 11 te pen vaccine khat veina (Partially vaccinated) bek asun pan te hi in, mi 4 te pen Covid-19 vaccine nih vei sun khin (Fully vaccinated) te hi ci uh hi.

CDC muhkhiatna ah Pfizer leh Moderna Covid vaccine sun khinsa te natna pan atam zaw kidal zo cih mukhia uh aa, natna ngah thak atamzaw pen vaccine sun nailo te cih mukhia uh hi. Tua hi aa, Covid-19 vaccine asun nailo i om leh amanlang thei pen pen in va sut tek ding hong thupi mahmah dingaa, Social distancing bawl kik in maituam (mask) te zong amun zui in i thuah kik ciat ding hong kisam to to kha ding ahi hi.

More: COVID ka kantan zia – Lungsim cidamna muhzia pan ~ Lia Cing Van Kim

Pawlkhat ten Covid-19 vaccine vai pen Politics lam peuh ah mu uh in amawkna aa akisun thei na leng sun nuam lo uh ahih manun amau aading lahuai mahmah ding thu khat ahi hi. Topan i omna ciat ah hong cing kem ta hen. Ref: CDC, WHO/ Thomas On Sian Mung (Thomas Mung Guite) Washington D.C July 13, 2021.