Ampang Park Shopping Center ki phelnen taktakta

Ampang Park Shopping Center ki phelnen taktakta

Malaysia, Kuala Lumpur khuasung aom Ampang Park Shopping Center pen 31 December 2017 ni akipan ki khakcip takpita hi. A tangkosa mahbang un Contractors te’n phelkhiat, suksiat kipan ziahziahta uh cih theStar pan kiza hi.

Shopping Center sungah nasemte’n Ceiling leh aki umna te phelkhia ziahziah uh a, vanzuakna Shoplot tezong avekin siansuahta uhhi.

Shopping Center sungteng hawmhiuheu in, innkhuam sikmung te vivebek omta hi. Shopping Mall sungah Electric mei ngahnawnlo, Power Supply zong ki pianawnlo in, ahi zongin tuibel paipai laisam hi.

Princess Shoe and Handbag Centre Sdn Bhd vanzuakna saineipa in agenna ah abeisa January 02 ni akipan Contractors te nasep kipan in, Shopping Mall sungteng asiansuah uh ahihi ci’n genkhia hi.

Kuala Lumpur khuasung aom Ampang Park ki khakcip tading

Malaysia, Kuala Lumpur khuapisung aom “Ampang Park” pen hongtungding 01 January 2018 ni akipan ki khakciptading cih NST pan kiza hi. Hih Ampang Park pen Malaysia gamsung ah akihong masapenpen Shopping Center hi a, luiluata ahih manin aki phelkhiading “demolition” akibawlding ahihi.

Aki suksiatniding, Demolition akibawlding anipen ki theician nailo a, ahi zongin January 01 ni akipan tua Ampang Park sungah vanzuakna, sumbawlna Business khempeuh avekin ki khawlcipsak tading cihi.

Ampang Park pen akilamzawh asawtkhit mahbangin asungah akizang setkahlei Escalator tezong kuacik mahmah hi. Aki phelkhiat khitciangin hihmun ah Ampang Mass Rapid Transit kici meileng Station kilamding hi.

Hih Ampang Park kici Shopping Center pen akilamzawh, aki zatzawh kum 44 sungbang hikhinta a, tuasung ah atualbialsa Business Operators te’n anutsiatding uhpen hamsa samahmah uhhi.

Hih Ampang Park sungah “Hydac Computer Centre” kici sai ahong kum 52 aphakhin Sharon Sinha in agenna ah hihmun pen khuakhat in ka ngaihsut hi. Hihmun panin sumzonna ah Customers tampi tawh kimu in, lawmlegual zong tampi tawh kaki theihlawh hi. Tuabek thamlo, ka lawmpa zong hih Ampang Park sungpan in kakimuh uh ahihi ci’n genkhia hi.

Hih Ampang Park sungah kimuhcil in aki ngaitheipah “love at first sight” kahi uh a, phawkding tampitak omhi. Ampang Park sungah Business kasepzawh pen kum 30 valbang sawtkhinta a, inn bangdan inzong ka ngaihsut, ka omcipna munkhat ahihi ci’n alungnopna leh adahna te genkhia hi.

Ampang Park Shopping Center pen Kuala Lumpur, Jalan Ampang lampi tungah 1973 kumin akihong ahihi. Akigawm in dawl 5 (five-storey) pha a, vanzuakna saikhan “Lots” akigawm in 253 ahihi. Singapore gamsung aom amasapenpen Shopping Center ahi “People’s Park Complex” tungtawn in Design suai in akilam ahihi.

Tulaitak vanzuakna Shop Lots tampitak ki khakcipkhin in, aomlai sunsun te’nzong “Moving-out Sales” ci’n Discount tampipi khiamin niamzuak mahmah uhhi.

More: Yangon thuthang: inn kicim, hotel meikang, gamdangsum tawh kiman

Akhangto gamte’n inn alam uhciangin kumbangzah ki zangtheiding cih neisak uh a, akum acin ciangin phelzan “Demolition” takpi uhhi. Myanmar gamsung ah innlui tepen akumbei cih ommello a, akicip petmah ciangin akum abei hileh kilawm hi. Sawltak #zomidaily