Naupang te huhna sum amasa pen honglut tading

Naupang te huhna sum (First Child Tax credit payment) amasa pen hong lut ta ding

Nung deuh aa ki vaihawm khia 1.9 trillion Covid-19 Stimulus Relief Bill pan apia ding naupang te huhna ahi “First Child Tax credit payment” pen tu kal July 15 kiim in 39 million innkuan (65 million naupangte) kiang amasa pen in kipia khia ta dingaa, ei ma bank direct deposit ah Tax return sum lut dan lian in hong lut ta ding hi ci in IRS leh CNBC te report na tungtawn in kimu thei hi.

Check tawh laito (mail) pan hong khak te belh i ngah ding them ngak kul ding dan ahi hi. Tua hi aa, tukal sung i bank sungah sum lut leh lut lo, bang zah tek lut cih i check tek ding ahi hi. Hih naupang te huhna sum pen July kha pan December kha sung US Kumpi in amawkna in hong pia ding uh ahi hi.

Hih child tax credit pen kum 5 pan anuai siah Ta khat in $3,600 leh kum 6 pan kum 17 kikal ta khat in tax credit $3,000 ta ngah ding uh ahi hi. Abeisa 2020 tax return ah tax credit pen kum 17 nuai siah Ta khat $2,000 ki ngah aa, tua pan $ 3000 ah hong khang sak uh ahi hi.

Ahi zongin child tax credit 2021 ngah ding sungpan alang (half amount) pen kha sim in hong kikhak ding aa, July kha pan December kha sung i tax return sum hong kikhak bang lian in hong kikhak ding hi. Mai tax return bawl ciang alang (half amount) pen Tax return ah ki tuat sak thei (claim) ding ahi hi.

Gentehna: – 2020 Tax return pen Nupa “Joint Married” tawh abawl innkuan khat in kumkhat $ 150,000 pan anuai siah ngah in:

~ kum 5 pan anuai siah Ta khat anei ten huhna sum $300 kha sim (July kha pan December kha sung) ngah ding uh aa, kum bei tax return tuat ciang $ 1800 ta claim thei ding uh hi.

~ Kum 6 pan kum 17 kikal Ta 1 anei ten kha sim huhna sum $250 ta ngah ding uh aa, kum bei tax return ciang $ 1,500 ta claim thei ding uh hi.

~ 2020 tax return i tuat dan in hong kipia dingaa, tukum 2021 sung asuak nau no ten hih huhna ngah nailo ding uh hi..

** Ei ma innkuan ciat in bangzah ngah ding cih i theih nop leh anuai aa weblink ah kien ding hi – 2021 Child Tax Credit Calculator:

Hih huhna sum pen mipi te gentheih hun ahi Covid-19 pandemic sung i naupang te aading Kumpi ten hong piak giat uh ahih manin i sum ngah te khol siam in i innkuan, i ta te aading akilawm pen mun ah i zat theih ding leh i khol ciat theih ding thupi mahmah hi.

Ngaih sut mahmah ding thu khat ah Kum bei tax return ciang nidang dan in sum lom tam ki ngah nawnlo kha ding ahih manin hih kha sim aa i ngah sum te zong i khol toh toh ding hong thupi mahmah ding ahi h. Ref: IRS website, CNBC News/ Thomas On Sian Mung (Thomas Mung Guite) Washington D.C July 14, 2021 MOMNO Media & Museum