Tuni ciang’n gamvai dinmun ~ Bob Tuangpi

Tuni ciang’n gamvai dinmun ~ Bob Tuangpi

Myanmar/ Kawlgam vai bel tuni ciangciang alamet huai cih sangsik-in, lungzinhuai mahmah cih ding hi. Kumpi kineilo himai cih theih dinmun hi. Gammite’ bitna (human security), gam-uk kumpi khat in gammite’tungah tavuanlakna nasepte, gammite nisim nuntak suahtakna (Public services ahi Education, Healthcare, Banking, Social freedom) cihte akhawlcip cih ding hi.

NUG leh SAC/ galkap te kumpi ding kituh/kidemdem, gamsung ah alangnih tuak aa ngongtat buluhna leh tualthatna (Terrorism and criminal cases) tawh kidim, mawhneilo mipi honkhat in mawk thuakthuak khasiathuai khuahun dinmun hi.

UN leh leitung gam tuamtuam in lah NUG ahi a, SAC/ galkap ahizong kumpi dia muanglo, dinpih ngam tataklo hilai hi. Maikha Sep 13, 2021 kiim pawl UNO khawmpi/ general assembly ah tua vai khensatna om ding cih ciang hi a, azenzen aa NUG pen UN in panpih/ recognized mah taleh galkapte in tutna awntuanlo ding, atawpna ah galvai mah tawh kido ding cih teel ding lampi khat bek a om hin lungkham huai mahmah hi.

Mipi leh NUG in bel athu ala tawh azo lua hin MAH leh galkapte pen atutna pan vua Naypyidaw buluh in ih vakaih khiat keh thaumuuk suang aa,apaikhiat sawm ngiatlo himawk ban ah Russia leh China muang uh himawk in vaisah lai mahmah cih ding hi e.

ASEAN thukimnna nam (5) teng lah athu bek mah hin, ASEAN nung ah gamliante ahi China + Russia leh USA + European Union gamte in amau’ thu aluttheih nang ASEAN nung ah na kidemdem/ peipei ban vuah ASEAN in lah athukhunpi om mah bangin asuakta gamkhat ii innsung thu gamvai ah inntek gamte’ lungkimna omlopi ama’thuneihna khengval aa zattheih mawk om tuanlo hi.

Mipi atamzaw dinna bel USA akipan nitumna gamte in athu ala tawh hong panpih mahmah uh hinapi’n leitung gamthu ah atuahkhak uh thu tampite’ ziak leh tulai leitung gamthu kiheizia khuahun zui-in, galkap leh galvan bulphuhna (Military intervention) hong zattuak hetlo uhhi.

Bangbang ai zongh gamthu/ နိုင်ငံရေး ih cih bel zankhat thu a zongh kikhel/ kilaih ziau thei thu hi veve hi. Tua hin lametna leh upna (ခံယူချက်၊ယုံကြည်ချက်) tawh akipai ciat hiphot cih ding hi. Gam kikhel nading zankhat sunkhat thu zongh hithei a, akha a sawt thei, akum leh akum sawm aa sim zongh sawt thei cih dan hi.

More: Khinkhai huai thu ~ Bob Tuangpi

Suahtakna ngah kum (70) valkhit tuhun dong akhangkhanga Kawlmi gam makaite (Politicians) in vandawn aa aksi neelkai lading bangkeek-in a otot uh hang’n, Kawlgam pen leitung aa tualgal leh zawnna gilkialna tawh abuai den Syria, Lybia, Afghanistan, South Sudan cihte dinmun tawh kibang aa leitung in ong ciamteh ban ah ASEAN gam (10) nangawn ah atualniam pen dinmun pan pusuakkhiazo nailo hiphot hi. Na khempeuh Pasian’khut sung leh geelna ah om hi, cih sansiam kei leeng… Bob Tuangpi (020082021)