Malaysia Shopping Mall khatah damiah lutin RM700,000 mannei puakhia

Malaysia Shopping Mall khatah damiah lutin RM700,000 mannei puakhia

Malaysia, Sri Petaling aom Shopping Mall khatah damiah te’n suai kizuakna Jewellery Shop khat zanni (Feb 18) ni in buluh leuleu uh cih Bernama pan kiza hi. Suntangpi mahin damiah ataih uh hi a, vanmanpha bekbek akigawm in RM700,000 manneiding puakhia uh cihi.

Brickfields District Police Chief khat ii genna Sri Petaling aom Endah Parade kici Shopping Mall sungah damiah te’n abuluh hunpen 1:17pm hun cihi. Damiah te lutna Wah Chan Jewellery Shop pen Shopping Mall ii Ground Floor ah aom ahihi.

Damiah pen mi 4 hi a, Pistol khatleh hiam tuamtuam keng uh a, suai kikoihna Glass bizu te sakkham in asung ah akikoih suai te lakhia ziahziah uhhi.

Vanmanpha Jewellery tuamtuam akikoihna Tray kuang 2 pan vanmanpha luatkhia uhhi.

Hih damiah te lutlaitak in Jewellery Shop sungah nasem mi 5 aom hi a, tualak ah thautawi Security Guard khatzong kihel hi. Ahi zongin migilo damiah te khatin Security Guard pan Pistol tawh ngimsa in koih a, adang damiah 3 te’n saisung panin vanmanpha teng luatkhia mengmeng uhhi.

Adeihteng uh aluatkhiat khit uhciangin tua damiah 4 te Toyata mawtaw khattawh taikhia vingveng uhhi ci’n Police Statement pan kiza hi.

Nungkum December khasung inzong OUG Plaza aom Jewellery Shop khatah suntangpi mahin damiah te lut uh a, vanmanpha RM1 Million manding puakhia ngei uhhi.

More: Malaysia OUG Plaza ah damiah lut, RM1 Million manneiding gukhia

Migilo damiah te’n ataikhiatma un Security Guard pa leilak sualtung ah boksak muh a, Security Guard pa ii thauzong laksak uhhi. Police te’n CCTV panin Video Footage teng kaikhawm uh a, migilo te azonsan laitak cih kiza hi. ZD Sawltak #zomidaily