Tulaitak Zangkong pen khua lah lum lo lah vot lua lo in nuam mahmah hi. Meisia tuisia cihzong omlo nong ahih man in ki navak keei hi.
Tukha 16 ni aa kipan bus line teng hong laih uh hi. YBS (Yangon Bus Service) cih min tawh laih in line 64 tawh hong kipanh uh hi.
Atamzaw bel mawtaw luiteng mah kizangh kik hi. Pawlkhat bel athak hi aa hoih cihtak in hoih hi. New York khuapi kiimvel aa tourist te’ tuanna buspi te tawh kibang dektak phial hi.
BRT (ka upmawh in Bus Rapid Transport acihna hingel inteh) akicite bel standard nei bilbel hi. Amai kongkhak pan kilut in ahawlpa’ gei ah sum khiatna ding bung khat om hi. Tua bung sung ah ei leh ei mawtaw sap kikhia hi. Ih tuah khiat ding teh a nung kong pan kituak hi. Ih tuahnop teh kong tung ah meek ding khat om aa tua meek leng hong khawl hi. Mawtaw nungzui omlo ahih man in daii hithiat in nop mahmah hi. A aircon te zong hoih mahmah lai hi.
YBS akipat ciil ni in bel ki amh tek mahmah hi. NLD khangnote leh sangnaupang te’n bus khawlnate ah tangtha kuan in mipite bus tuan dan ding hilh uh hi. NLD tawh ki aiawh mawtaw nei pawlkhat in zong akhawn khong in mipite’ paina ding puak ziahziah uh hi.
Zan nitak in Kyaukthada NLD khangno makai khat in hong genna ah bus line kibeh laplap ta aa tu’n line 100 val phata hi. Zing teh updated version pen suaksak nung hong ci hi.
Hih YBS system alaih khit vua kipan khuasung lampite bel vang tuam mahmah hi. Private mawtaw aneite bel nuam mahmah uh hi. Ahi zong in Zangkong pen khuapi mahmah ta aa New York khawng Chicago khawng dan mah aa Bus leh Meileng atuang tamzaw ahih man in kumpi in hih bus tuang te adangdangte sang in a awlmawh zawk uh kul ding hi.
Tutung tu aa zah ciphot ni
Lungdam
Mung Laan Thang
Zangkong
Comment piaknop aomleh...