Jesu tui tungah

Mate 14:22-33 sunga,Jesu tui tungah a paina thu tawh ki zomin,phawk dinga kilawm,kei’ muh zia nam(11) te

(1) Thu-um mite pen,eima deih bangin na khempeuh piang den lo a,lungkham haksatna leh buaina tuamtuam thuak thei zel i hihna hong phawksak hi(Mt 14:24).

(2) Nisim,naisim in,eite’ tungah itna leh hehpihna kicing hong nei a,eite hong liah,hong dal Topa pen,bangmah in ngaihsun loin,ama mai zong nuam lo a,amah i theih tel taktak loh hun tampitak a omna hong phawksak hi(Mt 14:26)

(3) Jesu Khris in,eite sap teng cin’na leh deih teng kimna ahih manin,leitung nate lau lo,lunghimawh loin,ama sungah kip tak leh lungdam takin i om tawntung nading thu hong phawksak hi(Mt 14:27)

(4) Thu-um mite in,upna lianpi nei-in,i lungsim khempeuh leh i nuntakna khempeuh tawh Pasian it in,amah i up/muan ding kul leh kitangsam ahihna hong phawksak hi(Mt 14:28)

(5) Thu-um mite in,upna taktak i neih nak leh na khempeuh piang thei,hi thei ahihna hong phawksak hi(Mt 14:29).

(6) Thu-um mite in,Pasian leh ama deihna sungah nungta in i om laitak in,kiim leh paam leh leitung ci-le-sa deihna te i nial tawntung ding aki sapna hong phawksak hi(Mt 14:29-30).

(7) Thu-um mite in upna lenkip lo a,kiim leh paam a thupiangte peuh lunghimawh leh buai pih in i neih khak leh kipuk thei ahihna hong phawksak hi(Mt 14:30)

(8) Thu-um mite in,ze-etna leh mawhna khialhna tuamtuam sungah kidiah-in pukin i om laitakin,kisikkikna tawh Jesu kiang zuanin,amah i sap nak leh amah in hong honkhia dingin a baihsa in om den ahihna leh hong honkhia zo takpi ahihna hong phawksak hi(Mt 14:30).

(9) I upna neu-in,amah mangngilh a,amah i phawkkhak loh ciangin,Pasian in hong thuhilh in,hong taii thei ahihna hong phawksak hi(Mt 14:31)